សំដីរបស់នាយករដ្ឋមន្ត្រីកម្ពុជា ពិតជាបានឮដល់ អ៊ឺរ៉ុប! នោះគឺការគម្រាម របស់លោក ហ៊ុន សែន កាលពីព្រឹកម៉ិញ ដែលអះអាងថា នឹងកម្ទេចគណបក្សប្រឆាំង នៅកម្ពុជាចោល ប្រសិនជាសហភាពអ៊ឺរ៉ុប និងសហរដ្ឋអាមេរិក ដាក់ទណ្ឌកម្មប្រឆាំងនឹងរបបដឹកនាំ របស់លោក។
ហើយប្រតិកម្ម ក៏ចាប់ផ្ដើមធ្លាក់ចុះមក ជាបណ្ដើរៗដែរ។ មន្ត្រីទទួលខុសត្រូវមួយរូប ក្នុងប្រទេសអ៊ីតាលី បានហៅការគម្រាមនោះ មានចរិតបែប ម៉ាហ្វីយ៉ា (Mafia) នៃជនផ្ដាច់ការមួយរូប។
ថ្លែងក្នុងពិធីបើកការដ្ឋានសាងសង់ ផ្លូវក្រវាត់ក្រុងទី៣ ក្នុងខេត្តកណ្ដាល ប្រមុខរដ្ឋាភិបាលកម្ពុជា បានថ្លែងគម្រាមថា ការដាក់ទណ្ឌកម្មសេដ្ឋកិច្ច មកលើប្រទេសកម្ពុជា គឺដូចសម្លាប់បក្សប្រឆាំង។ បុរសខ្លាំងដែលអង្គុយក្នុងតំណែង ជាង៣ទសវត្សន៍ បានព្រមានបណ្ដាប្រទេសទាំងនោះ ថាឲ្យឈប់មកនិយាយ ជាមួយលោក ពីបញ្ហាសិទ្ធិមនុស្ស និងប្រជាធិបតេយ្យ។
នាយករដ្ឋមន្ត្រីកម្ពុជា បានថ្លែងថា៖
«ដោយសារអ្នកជ្រុល តែដាក់ទណ្ឌកម្មខ្ញុំហើយ អ្នកក៏គ្មានសិទ្ធិ ដើម្បីនិយាយប្រដៅខ្ញុំ រឿងសិទ្ធិមនុស្ស ឬប្រជាធិបតេយ្យអីនោះដែរ គឺអត់ទេ។ ហើយខ្ញុំចង្អុលបង្ហាញថា បើសិនអ្នកឯងដាក់ទណ្ឌកម្មខ្ញុំ គឺស្មើនឹងវ៉ៃសម្លាប់គណបក្សប្រឆាំង នៅកម្ពុជា។ ខ្ញុំនិយាយប្រាប់អ្នកឯង ឱ្យច្បាស់ ព្រោះគ្មានរឿងអី ដែលខ្ញុំត្រូវថ្នាក់ថ្នម ព្រោះវាបានតែជ្រុលអីចឹងទៅហើយ ឱ្យវាទៅបណ្តោយទៅ។ ជាន់កហ្អែងថែម។»
សម្រាប់លោក ម៉ាតេអូ អង់ជោលី (Matteo Angioli) អគ្គលេខាធិការ នៃគណៈកម្មការពិភពលោក ដើម្បីនីតិរដ្ឋ (GCRL) ដែលជាអង្គការអន្តរជាតិមួយ នៅក្នុងប្រទេសអ៊ីតាលី បានអះអាងថា សំដីរបស់លោក ហ៊ុន សែន ធ្វើឡើងតាមបែបឧក្រិដ្ឋជន ម៉ាហ្វីយ៉ា ហើយថា ការថ្លែងគម្រាមនេះ ហាក់ដូចជាការបង្ក្រាបកន្លងមក ទៅលើគណបក្សប្រឆាំងនៅកម្ពុជា មិនទាន់ធ្វើឲ្យមេដឹកនាំរូបនេះ ឆ្អែតឆ្អន់នៅឡើយ។
លោក ម៉ាតេអូ អង់ជោលី បានលើកឡើងថា៖
«នៅក្នុងចរិតបែបឧក្រិដ្ឋជន ម៉ាហ្វីយ៉ា ជនផ្ដាច់ការកម្ពុជា លោក ហ៊ុន សែន បានគម្រាមកម្ទេចបក្សប្រឆាំងចោល ប្រសិនជាសហភាពអ៊ឺរ៉ុប ដកប្រទេសគាត់ ចេញពីការនាំចូលទំនិញ ដោយមានប្រព័ន្ធអនុគ្រោះពន្ធ។»
លោកបន្តថា៖
«វាហាក់ដូចជា មិនទាន់គ្រប់គ្រាន់នៅឡើយ ដែលបានដកគណបក្សប្រឆាំង ចេញពីការបោះឆ្នោត និងបានរារាំង ប្រធានបក្ស ទាំងពីររូប លោក សម រង្ស៊ី និងលោក កឹម សុខា។»
ការគម្រាមខាងលើ របស់នាយករដ្ឋមន្ត្រីកម្ពុជា ក៏អាចនឹងឮទៅដល់ មេដឹកនាំច្រើននាក់ នៃសហភាពអ៊ឺរ៉ុបដែរ ដោយគ្រាន់តែយូរ ឬឆាប់។ នេះ បើតាមការបង្ហោះមួយ នៅលើទំព័រទ្វីសធើរ របស់មន្ត្រីអ៊ឺរ៉ុបមួយរូបទៀត គឺលោក «Umberto Gambini» ដែលជាជំនួយការ របស់សមាជិកសភាអ៊ឺរ៉ុប លោក «Ramon Tremosa»។
លោក «Umberto Gambini» បានចោទសួរ ទៅស្ថានទូតនៃសហភាពអ៊ឺរ៉ុប ប្រចាំនៅកម្ពុជាថា នៅចំពោះការគម្រាមរបស់មេដឹកនាំកម្ពុជា តើគេចាំបាច់ ត្រូវចេញសេចក្ដីថ្លែងការណ៍ តបវិញឬទេ?
