«យើងធ្វើសេដ្ឋកិច្ច មិនមែនពឹងពាក់ តែវិស័យណាមួយ ដែលទុកឲ្យគេខ្ទប់ច្រមុះយើង ស្លាប់នោះទេ» នេះ ជាការអះអាងឡើង របស់នាយករដ្ឋមន្ត្រីកម្ពុជា នៅក្នុងការថ្លែងមួយរបស់លោក កាលពីព្រឹកម៉ិញ ជុំវិញនយោបាយ «សេដ្ឋកិច្ច» ថ្មី ដែលលោកហៅថា ជា«ការធ្វើសេដ្ឋកិច្ច ច្រើនផ្នែក ច្រើនយ៉ាង និងច្រើនប្រទេស»។
បន្ទាប់ពីការបង្ហើប នូវវិធានការមួយចំនួន កាលពីចុងសប្ដាហ៍មុន ដើម្បីទប់ទល់នឹងការលើកប្រព័ន្ធអនុគ្រោះពន្ធ ពីសំណាក់សហភាពអ៊ឺរ៉ុប និងសហរដ្ឋអាមេរិកនោះ លោក ហ៊ុន សែន បានថ្លែងក្នុងពិធី បើកការដ្ឋានសាងសង់ ផ្លូវក្រវាត់ក្រុងទី៣ នាខេត្តកណ្ដាល ដោយធ្វើការប្រៀបធៀបថា លោកមានរន្ធច្រមុះពីរ និងមាត់មួយ បើបិទរន្ធណាមួយ នៅមានរន្ធផ្សេងទៀត ដើម្បីដកដង្ហើម។
បុរសខ្លាំងកម្ពុជា បានពន្យល់ថា៖
«យើងធ្វើសេដ្ឋកិច្ច មិនមែនពឹងពាក់ តែនៅលើផ្នែកណាមួយ ដែលនៅពេលគេ គ្រាន់តែបិទក្បាលវ៉ាល់មួយ ធ្វើឲ្យយើងស្លាប់នោះទេ។ បើប្រៀបធៀប ជាមួយនឹងសេរីរាង្គមនុស្ស យើងមានរន្ធច្រមុះពីរ និងមាត់មួយ បើតឹងច្រមុះម្ខាង នៅសល់ម្ខាង គ្រាន់នឹងដកដង្ហើម។ ហើយបើតឹងច្រមុះទាំងពីរ ហ្អែងដកដង្ហើមតាមមាត់។»
លោកនាយករដ្ឋមន្ត្រី បានធ្វើសេចក្ដីសន្និដ្ឋានថា៖
«អញ្ចឹងទេ មិនងាយស្លាប់កម្ពុជាទេ»៕
