អង្គការលើកលែងទោស អន្តរជាតិ «Amnesty International» បានអំពាវនាវទៅកាន់សហព័ន្ធបាល់ទាត់អន្តរជាតិ «FIFA» ក្នុងថ្ងៃចន្ទទី២២ ខែមីនា ឆ្នាំ២០២១នេះ ឲ្យដាក់សម្ពាធបន្ថែមទៀត ទៅលើប្រទេសកាតា ដែលត្រៀមរៀបចំទទួលការប្រកួតបាល់ទាត់ពិភពលោក ឆ្នាំ២០២២ ដើម្បីធ្វើឲ្យប្រសើរឡើង នូវលក្ខខណ្ឌការងារ សម្រាប់បណ្ដាពលករបរទេស ដែលបានចូលមកធ្វើការ នៅក្នុងប្រទេសនេះ។
ប្រទេសអ្នកមានជាងគេ ក្នុងតំបន់ឈូងសមុទ្រ«Golfe»មួយនេះ មានបណ្ដាជនអន្តោប្រវេសន៍ជាច្រើន ចូលមករស់នៅលើទឹកដីរបស់ខ្លួន ជាពិសេសពលករបរទេស ដែលបានសំរុកចូលមកធ្វើការ បន្ទាប់ពីប្រទេសនេះ ត្រូវបានជ្រើសរើស ឲ្យទទួលព្រឹត្តិការណ៍បាល់ទាត់ពិភពលោក ឆ្នាំ២០២២ខាងមុខ។
អង្គការលើកលែងទោសអន្តរជាតិ ដែលមានស្នាក់ការធំ ក្នុងក្រុងហ្សឺណែវ (ប្រទេសស្វីស) បានសរសេរនៅក្នុងសេចក្ដីថ្លែងការណ៍មួយ របស់ខ្លួនថា៖
«ប្រទេសកាតា បានអះអាងអំពីការធ្វើកំណែទម្រង់ជាច្រើន និងទទួលបានលទ្ធផលវិជ្ជមានខ្លះដែរ នៅក្នុងរយៈពេលប៉ុន្មានឆ្នាំកន្លងមក (…) តែជារឿយៗ កំណែទម្រង់ទាំងនោះ មិនត្រូវបានយកមកអនុវត្តន៍ ឲ្យបានត្រឹមត្រូវទេ ហើយពលករបរទេស រាប់សិបពាន់នាក់ បន្តរងនូវការធ្វើអាជីវកម្ម និងការរំលោភបំពាន។»
ការស៊ើបអង្កេតរបស់អង្គការអន្តរជាតិ បានអះអាងថា មានសេចក្ដីព្រាងច្បាប់ជាច្រើន ត្រូវបានស្នើឡើង ទៅកាន់អាជ្ញាធរនៃប្រទេសកាតា ហើយអត្ថបទច្បាប់ទាំងនោះនឹងបំផ្លាញសមិទ្ធិផលទាំងឡាយ ដែលសម្រេចឡើង ក្រោមកំណែទំរង់។ មានជាអាថ៌ សេចក្តីព្រាងច្បាប់ បានដាក់កំហិតឡើងវិញ ជុំវិញសិទ្ធិរបស់ពលករបរទេស ក្នុងការផ្លាស់ប្ដូរការងារ និងចាកចេញពីប្រទេសជាដើម។
យ៉ាងណា ប្រភពផ្លូវការរបស់ប្រទេសកាតា ត្រូវបានទីភ្នាក់ងារសារព័ត៌មានបារាំង «AFP» ស្រង់សំដីមកបញ្ជាក់ថា អត្ថបទស្នើច្បាប់ទាំងនោះ នឹងមិនទទួលបានការយល់ព្រម ពីរដ្ឋាភិបាលកាតានោះទេ៕
