រ៉ាត់ រ័ត្នមុនី ធ្វើកិច្ចការបង្ហាញពី«ភាពអសកម្មរបស់រដ្ឋាភិបាល»
ទណ្ឌកម្មដាក់ទៅលើលោក រ៉ាត់ រ័ត្នមុនី មានបំណងគម្រាមកំហែង ទៅដល់បណ្ដាសកម្មជនផ្សេងទៀត ដែលធ្វើការងាររួមចំណែក ក្នុងការបង្ហាញឱ្យឃើញ អំពីវិបត្តិនៅក្នុងសង្គម និង«ភាពអសកម្មរបស់រដ្ឋាភិបាល»។
ខាងលើនេះ ជាការអះអាង នៅក្នុងសេចក្ដីថ្លែងការណ៍ របស់អង្គការលើកលែងទោសអន្តរជាតិ ហៅជាភាសាអង់គ្លេសថា «Amnesty International» ដែលទស្សនាវដ្ដីមនោរម្យ.អាំងហ្វូ ទទួលបានកាលពីម្សិលម៉ិញ។
កាលពីថ្ងៃទី៣០ ខែឧសភា ឆ្នាំ២០១៩ តុលាការរាជធានីបានបើកសវនាការ លើសំណុំរឿងរបស់លោក រ៉ាត់ រ័ត្នមុនី អតីតអ្នកបកប្រែភាសាឲ្យទូរទស្សន៍រុស្ស៊ី «RT» ពាក់ព័ន្ធភាពយន្តឯកសារមួយរបស់ទូរទស្សន៍នេះ ដែលមានចំណងជើងថា «ម្ដាយខ្ញុំលក់ខ្ញុំ»។
អតីតអ្នកបកប្រែអាយុ៤៧ឆ្នាំ ត្រូវបានតុលាការចោទប្រកាន់ ពីបទញុះញង់ធ្វើឲ្យមានការរើសអើង និងបញ្ជូនទៅដាក់ឃុំជាបណ្ដោះអាសន្ន នៅពន្ធនាគារព្រៃស។ នៅក្នុងសវនាការសួរដេញដោល របស់សាលាដំបូងនោះ មិនមានដើមបណ្ដឹងចូលរួមទេ។
សេចក្ដីថ្លែងការណ៍ របស់អង្គការលើកលែងទោសអន្តរជាតិ បានហៅបន្ទុកនៃបទចោទទាំងនោះ ថាមានលក្ខណៈមិនទំនង និងទាមទារឲ្យអាជ្ញាធរកម្ពុជា ដោះលែងលោក រ៉ាត់ រ័ត្នមុនី ឲ្យមានសេរីភាពវិញ ជាបន្ទាន់ និងដោយគ្មានលក្ខខណ្ឌ។
លោក «Nicholas Bequelin» នាយកអង្គការនេះ ប្រចាំតំបន់អាស៊ីអាគ្នេយ៍ ត្រូវបានសេចក្ដីថ្លែងការណ៍ស្រង់សំដី មកចុះផ្សាយថា៖
«លោក រ៉ាត់ រ័ត្នមុនី បានរងទណ្ឌកម្ម ព្រោះមូលហេតុតែមួយគត់ គឺដោយសារលោកបានដើរតួ នៅក្នុងការបកអាក្រាក អំពីការជួញដូរផ្លូវភេទ ទៅលើកុមារមិនទាន់គ្រប់អាយុ នៅកម្ពុជា។»
«បទចោទប្រកាន់មិនទំនងទាំងអស់ ដែលធ្វើឡើង ដើម្បីដាក់បន្ទុកលើរូបលោក មានបំណងដើម្បីគម្រាមកំហែង ទៅដល់បណ្ដាសកម្មជនទាំងឡាយ ដែលធ្វើការងាររួមចំណែក ក្នុងការបង្ហាញឱ្យឃើញ អំពីវិបត្តិនៅក្នុងសង្គម និង”ភាពអសកម្មរបស់រដ្ឋាភិបាល”។»
លោក រ៉ាត់ រ័ត្នមុនី ត្រូវបានអាជ្ញាធរថៃចាប់ខ្លួន មុននឹងត្រូវបញ្ជូនខ្លួន មកឲ្យអាជ្ញាធរកម្ពុជា ក្នុងថ្ងៃទី១៣ ខែធ្នូ ឆ្នាំ២០១៨ ហើយលោកបានរងការឃុំខ្លួន រហូតមកដល់ថ្ងៃនេះ។ នាយកអង្គការ «Amnesty International» ប្រចាំក្នុងទ្វីបអាស៊ី បានបន្តថា៖
«អាជ្ញាធរគួរតែទម្លាក់ចោល ការចោទប្រកាន់លោក រ៉ាត់ រ័ត្នមុនី និងដោះលែងលោកជាបន្ទាន់ និងដោយគ្មានលក្ខខណ្ឌ។»
យ៉ាងណា សវនាការថ្ងៃទី៣០ ខែឧសភាកន្លងមក នៅមិនទាន់បញ្ចប់នៅឡើយ ដោយចៅក្រមជំនុំជម្រះ លោក កូយ សៅ បានយកសំណុំរឿងនេះ ទៅបន្តជំនុំជម្រះ នៅថ្ងៃទី១២ ខែមិថុនា ឆ្នាំ២០១៩ ខាងមុខទៀត។
បើទោះជាលោក រ៉ាត់ រ័ត្នមុនី អះអាងក្នុងសវនាការថា លោកគ្រាន់តែជា អ្នកបកប្រែភាសាម្នាក់ប៉ុណ្ណោះនោះ តែសម្រាប់រដ្ឋាភិបាលកម្ពុជា បានចាត់ទុកភាពយន្ដឯកសារនោះ ថាជាទម្រង់មួយ នៃការផ្សាយព័ត៌មានមិនពិត ដែលនាំដល់ការអាប់ឱនកិត្តិយស សម្រាប់ប្រទេសកម្ពុជា ហើយជាការមួលបង្កាច់កិត្យានុភាព កិតិ្តយស និងសេចក្ដីថ្លៃថ្នូររបស់ស្ត្រីខ្មែរ៕
