នៅថ្ងៃអាទិត្យទី១៤​ ខែមីនានេះ «ហូឡង់»បានក្លាយជាប្រទេសទី៦ ក្នុងសហភាពអ៊ឺរ៉ុប ដែលប្រកាសផ្អាក​ការចាក់ថ្នាំ​វ៉ាក់សាំង របស់សហគ្រាសផលិតឱសថ​«AstraZeneca» ក្រោមហេតុផល«ដើម្បីភាពប្រុងប្រយ័ត្ន»។ នេះបើតាម​ការសម្រេច របស់អាជ្ញាធរ​សុខាភិបាលហូឡង់ ដែលអះអាងថា ត្រូវរង់ចាំការអង្កេត ឲ្យបានស៊ីជម្រៅបន្ថែមទៀត ទៅលើថ្នាំវ៉ាក់សាំង បង្ការជំងឺកូវីត- ១៩ (Covid-19) មួយនេះ។

ក្រសួងសុខាភិបាលរបស់ប្រទេសហូឡង់ បានឲ្យដឹងតាមរយៈសេចក្ដីប្រកាសព័ត៌មានមួយថា ដោយអនុលោមតាមទិន្នន័យថ្មីៗ ដែលទើបនឹងទទួលបាន អាជ្ញាធរជាតិទទួលបន្ទុកឱសថ (របស់ប្រទេសហូឡង់) បានផ្ដល់អនុសាសន៍ ឲ្យផ្អាកការចាក់វ៉ាក់សាំងប្រភេទខាងលើ ក្រោមហេតុផល «សុវត្ថិភាព និងរង់ចាំការអង្កេត ឲ្យបានស៊ីជម្រៅ»។

រដ្ឋមន្ត្រីសុខាភិបាលហូឡង់ លោក «Hugo de Jonge» ត្រូវបានស្រង់សំដី មកបញ្ជាក់ក្នុង​សេចក្ដីប្រកាសព័ត៌មាន​នោះថា៖

«រឿងដែលសំខាន់ នៅត្រង់ការចង់ដឹងឲ្យច្បាស់ថា តើបញ្ហាទាំងអស់ វាអាចកើតឡើង បន្ទាប់ពីចាក់វ៉ាក់សាំងរួច ឬដោយសារ​ការចាក់វ៉ាក់សាំង។ បើអញ្ចឹងទេ រាល់ថ្នាំវ៉ាក់សាំងទាំងឡាយ មិនគួរបង្កឲ្យមានការសង្ស័យ សម្រាប់​ពលរដ្ឋឡើយ។»

លោកបន្តថា៖

«យើងត្រូវតែប្រយ័ត្នជានិច្ច។ ហេតុដូច្នេះហើយ វាជារឿងដ៏ប្រសើរបំផុត ដែលយើងត្រូវផ្អាក (ការចាក់វ៉ាក់សាំង​ប្រភេទនេះ) ក្នុងពេលនេះ ដើម្បីជាការប្រុងប្រយ័ត្ន។»

ការប្រកាសរបស់ប្រទេសហូឡង់ ចេញផ្សាយក្រោយបន្តិច ពីការប្រកាសរបស់ប្រទេសអៀរឡង់ ដែលបាន​សម្រេច​ឡើង ក្នុង​ហេតុផល​ប្រហាក់​ប្រហែល​គ្នា។

កាលពីថ្ងៃព្រហស្បត្តិ៍ទី១១ ខែមីនា ប្រទេសដាណឺម៉ាក អ៊ីស្លង់ និងណ័រវេស បានប្រកាសផ្អាកការចាក់ថ្នាំវ៉ាក់សាំង «AstraZeneca» ដោយអះអាងថា វាជា«គោលការណ៍នៃការប្រុងប្រយ័ត្ន»។ បន្ទាប់មក នៅថ្ងៃសុក្រទី១២ ខែមីនា ប្រទេសប៊ុលហ្គារី បានធ្វើដូចគ្នា ខណៈប្រទេសថៃ បានប្រកាសពន្យាពេលយុទ្ធនាការចាក់វ៉ាក់សាំង ដែល​ប្រើថ្នាំ​វ៉ាក់សាំង​ខាងលើ។

សម្រាប់អង្គការសុខភាពពិភពលោក (WHO /OMS) ដែលបានប្រកាសទទួសស្គាល់វ៉ាក់សាំង «AstraZeneca» បានលើកឡើង​កាលពីថ្ងៃសុក្រ ទី១២ ខែមីនាថា គ្មានហេតុផលណាមួយ ដែលតម្រូវមិនឲ្យប្រើវ៉ាក់សាំងនេះ ហើយ​មក​ដល់ពេលនេះ មិនទាន់មាន​ការពាក់ព័ន្ធណាមួយ ដែលបង្កឲ្យមានជំងឺផ្សេងទៀត តាមរយៈការចាក់ថ្នាំ​វ៉ាក់សាំង​នេះនៅឡើយ។

សម្រាប់សហគ្រាសផលិតឱសថ «AstraZeneca» ដែលមានទីតាំងធំ នៅក្នុងចក្រភពអង់គ្លេស បានប្រកាស​កាលពី​ថ្ងៃសៅរ៍ ទី១៣ ខែមីនា ការពារវ៉ាក់សាំងរបស់ខ្លួនថា គ្មាន​ភស្ដុតាងណាមួយ បង្ហាញពីហនិភ័យធ្ងន់ធ្ងរ សម្រាប់អ្នក​ដែលបានទទួល​ថ្នាំវ៉ាក់សាំង​នេះឡើយ៕



You may also like

វប្បធម៌ និងជីវិត

គុណតម្លៃ​នៃ​កន្លែង​ការងារ ដែល​ផ្តល់​នូវ​សុខុមាលភាព​ផ្លូវ​ចិត្ត​ល្អ

«គុណតម្លៃ​នៃ​កន្លែង​ការងារ» ៖ យើងទាំងអស់គ្នាដឹងថា ការងារគ្រប់ទម្រង់ទាំងអស់ មានឥទ្ធិពលយ៉ាងខ្លាំង ទៅលើសុខុមាលភាពខាងផ្លូវចិត្ត និងអារម្មណ៍របស់យើង ដោយធ្វើឱ្យយើង បានល្អប្រសើរឬកាន់តែអាក្រក់ទៅ ៗ ជាពិសេសគុណភាព នៃសុខភាពផ្លូវចិត្ត ក្នុងបរិយាកាសការងារ។ ...
ដំណឹង

Covid-19៖ ម៉ាក្រុង កោះប្រជុំពី«ភាពយឺតយ៉ាវ» នៃយុទ្ធនាការ​​វ៉ាក់សាំង

លោក អេម៉ានុយអែល ម៉ាក្រុង (Emmanuel Macron) ប្រធានាធិបតីបារាំង បានកោះប្រជុំ ក្នុងរសៀលថ្ងៃចន្ទទី៤​ ខែមករានេះ ដើម្បីផ្ដោតលើ​យុទ្ធនាការ​ចាក់វ៉ាក់សាំង បង្ការជំងឺកូវីដ-១៩ (Covid-19) ដែលរងការរិះគន់ថា ...
ដំណឹង

Covid-19 ៖ ក្រិច​ដាក់​បម្រាម​ឲ្យពលរដ្ឋ​នៅតែ​ក្នុង​ផ្ទះ នៅ​ថ្ងៃ​ចន្ទ​នេះ

នៅ​ថ្ងៃ​ចន្ទ​នេះ ប្រទេសក្រិចបានអនុវត្តបម្រាម ដាក់ពលរដ្ឋនៅទូទាំងប្រទេស ឲ្យនៅតែក្នុងផ្ទះ ដើម្បីប្រយុទ្ធប្រឆាំង នឹងការរីករាលដាល នៃមេរោគ«កូរូណា» ឬ«Covid-19» និងតាមការសម្រេច របស់រដ្ឋាភិបាល របស់លោកនាយករដ្ឋមន្ត្រី «Kyriakos Mitsotakis»។  ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...