ឯកអគ្គរដ្ឋទូត នៃសហរដ្ឋអាមេរិកប្រចាំនៅកម្ពុជា បានបញ្ជាក់ជាថ្មី ថាសហរដ្ឋអាមេរិក ចង់ឃើញលោក កឹម សុខា ប្រធាន​គណបក្ស​សង្គ្រោះជាតិ មានសិទ្ធិ​ធ្វើ​នយោបាយវិញ ក្នុងខណៈមេដឹកនាំប្រឆាំងរូបនេះ កំពុងរងចាំ​ថ្ងៃបើក​សវនាការ របស់តុលាការរាជធានី ដែលចេះតែបន្តលើកពេល ម្ដងហើយម្ដងទៀត ឬផ្អិបសំនុំរឿងនេះ មិនចាត់ការ។

សរសេរនៅលើទំព័រទ្វីសធើរផ្លូវការ លោកឯកអគ្គរដ្ឋទូត ប៉ាទ្រីក ម័រហ្វី (Patrick Murphy) បានហៅការលើកពេល ឬការពន្យាពេល​បើកសវនាការ របស់តុលាការកម្ពុជា ថាជាការបដិសេធក្នុងការផ្ដល់យុត្តិធម៌ សម្រាប់ជនជាប់ចោទ ដូចលោក កឹម សុខា ដែលត្រូវបាន​ស្ថានទូត​អាមេរិក ចាត់ទុកក្នុងពេលកន្លងមក ថាជាមនុស្សស្អាតស្អំ។ ការបង្ហោះសារនោះ ធ្វើឡើងក្រោយជំនួបរវាងលោក និងលោក កឹម សុខា កាលពីថ្ងៃព្រហស្បត្តិ៍។

លោកបានសរសេរថា៖

«ខ្ញុំមានក្ដីសោមនស្ស ដែលបានជួបជាមួយលោក កឹម សុខា ដើម្បីផ្លាស់ប្ដូរពរឆ្នាំថ្មី (ឆ្នាំសាកល) និងដើម្បីសាកសួរអំពី ការពន្យាពេល​ថ្ងៃបើកសវនាការ ជុំវិញសំណុំរឿង​ចោទប្រកាន់​លោក។ ការពន្យារពេល​រកយុត្តិធម៌ គឺជាការបដិសេធ​ការផ្តល់យុត្តិធម៌។»

ឯកអគ្គរដ្ឋទូតប្រទេសមហាអំណាច បានបញ្ជាក់ជាថ្មី ជុំវិញជំហររបស់ប្រទេសលោកថា៖

«សហរដ្ឋអាមេរិក ចង់ឃើញលោក (កឹម សុខា) មានសិទ្ធិ​ធ្វើ​នយោបាយវិញ ដូចក្ដីសង្ឃឹមរបស់យើង ដែលចង់ឃើញ​ពលរដ្ឋកម្ពុជា​គ្រប់រូប អាចចូលរួម​​ក្នុងសកម្មភាព​នយោបាយ។»

ប្រធានគណបក្សសង្គ្រោះជាតិ ត្រូវបានអាជ្ញាធរកម្ពុជា ក្រោមបញ្ជាពីលោកនាយករដ្ឋមន្ត្រី ហ៊ុន សែន ចូលចាប់ខ្លួន​ពីក្នុងគេហដ្ឋាន​លោក ទាំងកណ្ដាល​យប់ កាលពីដើមខែកញ្ញា ឆ្នាំ២០១៧ មុននឹងយករូបលោក ទៅឃុំខ្លួន​នៅក្នុងពន្ធនាគារ​ត្រពាំងថ្លុង ជិតព្រំដែន​វៀតណាម។ លោក ត្រូវបាន​ចោទប្រកាន់ ពីបទ«​សន្ទិដ្ឋភាព​ជាមួយ​បរទេស​» ជុំវិញការថ្លែងដោយផ្ទាល់មាត់មួយ ដែលលោកបានធ្វើ​ទៅកាន់​អ្នកគាំទ្រ ក្នុងប្រទេស​អូស្ត្រាលី កាលពីច្រើនឆ្នាំមុន។

តែប្រសិនជាសវនាការ ត្រូវបានផ្អាក ក្នុងពេលកន្លងមក និងលើកពេលជាបន្តបន្ទាប់នោះ ដោយសារហេតុផលមួយ ពីក្នុងហេតុផល​ជាច្រើនទៀត នោះគឺគ្មានភស្ដុតាងរឹង​ ក្នុងការដាក់បន្ទុកលើបទចោទ។

សម្រាប់លោក ជិន ម៉ាលីន អ្នកនាំពាក្យក្រសួងយុត្តិធម៌ បានបញ្ជាក់​នៅលើ​បណ្ដាញសង្កម ជាថ្មីដែរថា សំណុំ​រឿង​លោក កឹម សុខា កំពុង​ស្ថិត​ក្នុង​ដៃ​តុលាការ ហើយ​ការ​សម្រេច​បែប​ណា​នោះ គឺ​ជា​ឆន្ទានុសិទ្ធិ​របស់​តុលាការ ដែល​លោក​ហៅ​ថា ជា​ស្ថាប័ន​ឯករាជ្យ។ លោកបន្តទៀតថា៖

«ដោយករណី កឹម សុខា គឺមិនមានការឃុំខ្លួននោះទេ ហេតុដូចនេះ ការបើកសវនាការលើសំណុំរឿងនេះ គឺមិនមែនជា​អាទិភាព​នោះទេ។ អាទិភាពពិតប្រាកដ គឺការបើកសវនាការ ចំពោះសំណុំរឿង ដែលមានអ្នកជាប់ឃុំ ដើម្បីជៀងវាង កុំឱ្យមានការឃុំខ្លួន​ហួសកាល​កំណត់ របស់ច្បាប់។»

ការចាប់ខ្លួន និងការចោទប្រកាន់លោក កឹម សុខា បានអនុញ្ញាតឲ្យរបបដឹកនាំ ក្រោមបញ្ជារបស់លោក ហ៊ុន សែន ធ្វើការរំលាយ​គណបក្សសង្គ្រោះជាតិ និងហាមឃាត់សិទ្ធិធ្វើនយោបាយ សម្រាប់មន្ត្រីគណបក្សនេះ ជាង១០០នាក់ ទាំងបើលោក កឹម សុខា មិនទាន់ត្រូវបានតុលាការរកឃើញ ថាមានទោសនោះក្ដី។

ដំណើរការអនុវត្តច្បាប់ និងការស្វែងរកយុត្តិធម៌ ដ៏ចម្រូងចម្រាស់ខាងលើ ត្រូវបានសហភាពអ៊ឺរ៉ុប «EU» និងសហរដ្ឋអាមេរិក មើលឃើញថា ធ្វើឡើងក្រោម​ហេតុផលនយោបាយ។ ហេតុផលដែលជំរុញ​ឲ្យមហា​អំណាច​ធំទាំងពីរ អនុវត្តន៍ទណ្ឌកម្មជាបន្តបន្ទាប់ ក្នុងនោះ​មានការព្យួរប្រព័ន្ធអនុគ្រោះពន្ធ «EBA» ចំនួន២០ភាគរយ និងការដាក់មន្ត្រីកម្ពុជាជាច្រើន ចូលក្នុងបញ្ជីខ្មៅ ដើម្បីបង្កក​ទ្រព្យសម្បត្តិ និងហាមជាន់ទឹកដី​អាមេរិក ជាដើម៕



លំអិតបន្ថែមទៀត

កម្ពុជា

សម រង្ស៊ី បង្ហើប​ថា ស ខេង ជា​អ្នក​រៀបចំ​គម្រោង​ឲ្យ​លោក​និរទេស​ខ្លួន

ប្រធានស្ដីទីគណបក្សសង្គ្រោះជាតិ លោក សម រង្ស៊ី បានបង្ហើបឲ្យដឹង នៅថ្ងៃនេះថា ការខកខាន នៃការវិលចូលប្រទេសកម្ពុជាវិញ កាលពីថ្ងៃទី១៦ ខែវិច្ឆិកា ឆ្នាំ២០១៥ ហើយដែលធ្វើឲ្យលោក រស់នៅនិរទេសខ្លួន ...
កម្ពុជា

សម រង្ស៊ី ថា​​កំពុង​ត្រៀម​វិធានការ​«ការពារ​អ្នកគាំទ្រ» ពេល​លោក​វិល​ចូល​ស្រុក

«ខ្ញុំត្រូវតែ ការពារ​អ្នកគាំទ្រ គណបក្សសង្គ្រោះជាតិ និងអ្នកដែលចូលរួម រៀបចំដំណើរ​មាតុភូមិនិវត្តន៍របស់ខ្ញុំ» នេះ ជាការអះអាងឡើង របស់មេដឹកនាំប្រឆាំង លោក សម រង្ស៊ី ពីរដ្ឋធានីប៉ារីស ប្រទេសបារាំង ...
កម្ពុជា

អាមេរិក​នៅពីក្រោយ កឹម សុខា? ជិន ម៉ាលីន ថ្លែងផ្ទុយពី ផៃ ស៊ីផាន

នៅចំពោះការថ្លែង របស់ឯកអគ្គរដ្ឋទូតអាមេរិក ទាក់ទងនឹងករណីប្រធានគណបក្សសង្គ្រោះជាតិ លោក កឹម សុខា អ្នកនាំពាក្យក្រសួងយុត្តិធម៌ លោក ជិន ម៉ាលីន បានចេញមុខមកអះអាងថា រដ្ឋាភិបាលលោក ហ៊ុន ...

Comments are closed.

យល់ស៊ីជម្រៅផ្នែក កម្ពុជា

កម្ពុជា

Covid-19៖ កម្ពុជាមានអ្នកជំងឺ​កើន«ដល់​២២៣៣​ករណី ស្លាប់១០នាក់»

កម្ពុជា

Covid-19៖ កម្ពុជាប្រកាស​«ករណីស្លាប់ទី៩» ពីចំណោម​អ្នកស្លាប់១៥នាក់

ប្រទេសកម្ពុជា បានប្រកាសឲ្យដឹងពី​«ករណីស្លាប់ទី៩» ដោយសារជំងឺកូវីដ-១៩ (Covid-19) ក្នុងរសៀលថ្ងៃសៅរ៍​ទី២៧ ខែមីនានេះ។ ករណីនេះ ជាមរណភាពទី២ ដែលត្រូវបានប្រកាស​ក្នុងថ្ងៃសៅរ៍តែមួយ តែមរណភាពទី១ មិន​ត្រូវបាន​​រាប់​បញ្ចូលថា ស្លាប់ដោយជំងឺរាតត្បាតទេ។ នេះ ...
កម្ពុជា

Covid-19៖ កម្ពុជាមានអ្នកជំងឺស្លាប់ ២នាក់ទៀត ក្រោយ​ផ្លាស់មន្ទីរពេទ្យ

អ្នកជំងឺ ២នាក់ទៀត បានទទួលមរណភាព ដោយសារជំងឺកូវីដ-១៩ (Covid-19)។ ជនរងគ្រោះទាំងពីររូបនោះ ដែល​ម្នាក់ជាជនជាតិខ្មែរ និងម្នាក់ទៀត ជាជនជាតិចិន ត្រូវបានដាក់ឲ្យព្យាបាលដំបូងឡើយ នៅទីកន្លែងផ្សេង ពីមន្ទីរពេទ្យ​រុស្ស៊ី។ រហូតលុះត្រាស្ថានភាពជំងឺធ្ងន់ធ្ងរ ...