នៅពេល សួន សេរីរដ្ឋា និយាយពី«ឆ្កែពីរក្បាល»ដណ្ដើមឆ្អឹងគ្នា…
លោក សួន សេរីរដ្ឋា ដែលគេស្គាល់ថា ជាអ្នកនយោបាយសំដីថ្លោស បានលើកឡើងនៅថ្ងៃនេះ អំពី«ឆ្កែពីរក្បាល» ដែលត្រូវបានគេដាក់ ឲ្យ«ស៊ីបាយក្នុងចានតែមួយ» ឬគេបោះឆ្អឹងឲ្យមួយដុំ។
បើទោះជាលោក សេរីរដ្ឋា មិននិយាយឲ្យចំឈ្មោះ តែការលើកឡើងនេះ ត្រូវបានក្រុមអ្នកប្រើប្រាស់បណ្ដាញសង្គម យល់ថា ជាការសំដៅទៅមេដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា។
បុរសអាយុ៤៦ឆ្នាំរូបនេះ បានសរសេរនៅលើទំព័រហ្វេសប៊ុករបស់លោកថា៖
«ពេលដែលសត្វ ឆ្កែពីរក្បាល ត្រូវបានគេដាក់ឲ្យស៊ីបាយ ក្នុងចានតែមួយជាមួយគ្នា ឬគេបោះឆ្អឹងឲ្យពួកវា តែមួយដុំ គឺបែបនេះ!»
«ដូចនេះឆ្កែពីរក្បាលនេះ វាឈ្លោះបែកសាមគ្គីគ្នា ដោយសារតែសារជាតិពួកវា ជាសត្វឆ្កែ តាំងពីថ្ងៃវា ស៊ីចំណីក្នុងចានតែមួយ នោះមកម្លេះ! អ្នកផ្កាប់មុខ ស្រលាញ់ឆ្កែពីរក្បាលនេះ សូមកុំបង្វៀងការពិត រួចរកលេសទម្លាក់កំហុស លើអ្នកនេះ លើអ្នកនោះ ថាគេទៅបង្អៅ ឲ្យពួកវាខាំគ្នា ឈ្លោះបែកបាក់គ្នានោះ!»
ពាក្យពេជន៍ខាងលើ គឺជាសារនយោបាយដំបូងបង្អស់ បន្ទាប់ពីលោក សួន សេរីរដ្ឋា ដែលជាអតីតអ្នកទោស ត្រូវបានលោកនាយករដ្ឋមន្ត្រី ហ៊ុន សែន ទូលព្រះមហាក្សត្រ ឲ្យមានតំណែង ជារដ្ឋលេខាធិការក្រសួងអភិវឌ្ឍន៍ជនបទ កាលពីថ្ងៃទី១០ ខែកក្កដាកន្លងមកថ្មីៗ។
តែនៅថ្ងៃទី៩ ខែកក្កដា (មួយថ្ងៃមុន) លោក ឆាំ ឆានី អ្នកបង្ហោះសារដ៏ល្បីមួយរូប មាននិន្នាការគាំទ្រគណបក្សប្រឆាំង បានទម្លាយឲ្យដឹងជាមុន ថាលោក សួន សេរីរដ្ឋា បានទៅជួបលោក ហ៊ុន សែន ដើម្បីទទួលយកតំណែង ជារដ្ឋលេខាធិការខាងលើ និងបានសន្យាជាមួយលោក ហ៊ុន សែន ថានឹងរកមធ្យោបាយបំបែកសម្ព័ន្ធភាព សម រង្ស៊ី-កឹម សុខា។
គ្មានប្រភពណាផ្សេង អាចបញ្ជាក់ពីព័ត៌មានបែកធ្លាយ របស់លោក ឆាំ ឆានី បានទេ តែយ៉ាងហោចណាស់ ព័ត៌មាននោះបានបញ្ជាក់ថា ការមានតំណែងថ្មី របស់លោក សួន សេរីរដ្ឋា គឺជាការពិត។
គួរបញ្ជាក់ដែរថា លោក សួន សេរីរដ្ឋា ដែលជាស្ថាបនិក និងប្រធានចលនាអំណាចពលរដ្ឋខ្មែរ ដែលបានក្លាយជាគណបក្សអំណាចខ្មែរ ត្រូវបានអាជ្ញាធរក្រោមបញ្ជារបស់លោក ហ៊ុន សែន ចាប់ខ្លួននៅថ្ងៃទី១៣ ខែសីហា ឆ្នាំ២០១៧ បន្ទាប់ពីលោកបានបង្ហោះសារតាមហ្វេសប៊ុក រិះគន់លោក ហ៊ុន សែន និងក្រុម«មេទ័ពចោរ»នៅកម្ពុជា។
បន្ទាប់មក លោក សួន សេរីរដ្ឋា ត្រូវបានតុលាការផ្ដន្ទាទោស ពីបទញុះញង់ កុំឲ្យយោធិនស្ដាប់បង្គាប់ និងបទញុះញង់ ឲ្យប្រព្រឹត្តបទឧក្រិដ្ឋជាអាទិ៍ ឲ្យជាប់ពន្ធនាគារ ៥ ឆ្នាំ និងពិន័យជាប្រាក់ ១០ លានរៀល។ ប៉ុន្ដែនៅថ្ងៃទី ២៣ សីហា ឆ្នាំ ២០១៨ លោក សួន សេរីរដ្ឋា ត្រូវបានព្រះមហាក្សត្រលើកលែងទោស តាមសំណើរបស់លោក ហ៊ុន សែន៕
