កម្ពុជាដំណឹង

RSF នឹង​ប្រតិកម្មលើការ​ចាប់​អ្នក​កាសែត សុខ ឧត្ដម នៅដើម​សប្ដាហ៍​នេះ

អង្គការអ្នកយកព័ត៌មានគ្មានព្រំដែន (RWB / RSF) គ្រោងចេញសេចក្ដីថ្លែងការណ៍ ប្រតិកម្ម​​ចំពោះករណី​​ចាប់ខ្លួន អ្នកកាសែត សុខ ឧត្ដម ដែលឈាន​ទៅបិទស្ថានីយ៍វិទ្យុ និងគេហទំព័រ «រិទ្ធិសែន» របស់អ្នកកាសែតរូបនេះ កាលពីពេលថ្មីៗ។ នេះ បើតាម​ការអះអាង របស់លោក ដានីញែល បាស្ដាដ៍ (Daniel Bastard) នាយកការិយាល័យ អាស៊ី-ប៉ាស៊ីភិក របស់​អង្គការ​នេះ កាលពីថ្ងៃសុក្រ។

អ្នកសារព័ត៌មាន លោក សុខ ឧត្ដម ដែលជាម្ចាស់​ស្ថានីយ​វិទ្យុ ៩៩.៧៥ MHz និង​គេហទំព័រ «រិទ្ធិ​សែន» ដ៏ល្បី នៅ​ខេត្ត​កំពង់ឆ្នាំង  ត្រូវ​បានក្រុមនគរបាលចាប់ខ្លួន ​កាលពី​ថ្ងៃទី១៣ ខែឧសភា ឆ្នាំ២០២០។

ការចាប់ខ្លួននោះ ធ្វើឡើង​បន្ទាប់ពី​លោក បានចុះទៅ​ធ្វើការ ផ្សាយ​បន្តផ្ទាល់ អំពីការ​តវ៉ា​របស់ពលរដ្ឋ នៅមុខ​សាលាឃុំ​ ជៀប កាលពី​ថ្ងៃទី១២ ខែឧសភា ឆ្នាំ២០២០ ស្ថិត​ក្នុង​ស្រុក​ទឹកផុស ជុំវិញជម្លោះដីធ្លី ដែល​ប្រជាពលរដ្ឋ​ចោទ​ថា អាជ្ញាធរ​បាន​ដកហូត​ដីធ្លី រាប់សិប​ហិចតា ​របស់​ពួកគាត់។

ក្រោយការចាប់ខ្លួន ស្ថាប័នវិទ្យុ និងគេហទំព័រព័ត៌មាន របស់លោក សុខ ឧត្ដម ក៏ត្រូវ​បាន​ក្រសួងព័ត៌មាន ចេញប្រកាស ​ឲ្យបិទទ្វាដែរ។ នេះ បើតាមសេចក្ដីសម្រេចមួយ របស់​ក្រសួង ដែលចុះហត្ថលេខា ដោយលោករដ្ឋមន្ត្រី ខៀវ កាញារិទ្ធ នៅថ្ងៃទី១២ ខែឧសភា តែទើប​នឹង​ឃើញ​ចេញ​ផ្សាយ នៅថ្ងៃទី១៣ ខែឧសភា។

ការចាប់ខ្លួនអ្នកកាសែត និងការបិទស្ថាប័នព័ត៌មាន ក្រោមបទចោទ«ញុះញង់» បាន​បង្ក​ឲ្យមានប្រតិកម្ម ពីបណ្ដាក្រុមអ្នកការពារ សិទ្ធិអ្នកសារព័ត៌មាន ទាំង​នៅក្នុងស្រុក និង​នៅ​ក្រៅស្រុក ជាពិសេស ពីអង្គការ​អ្នកយកព័ត៌មាន​គ្មានព្រំដែន ដែលជាអង្គការ​អន្តរជាតិ មាន​បណ្ដាញ​របស់ខ្លួន នៅពាសពេញពិភពលោក។

តបនឹងការសាកសួរ របស់ទស្សនាវដ្ដី មនោរម្យ.អាំងហ្វូ កាលពីថ្ងៃសុក្រ នាយក​ការិយាល័យ ទទួល​បន្ទុក​កិច្ចការ អាស៊ី-ប៉ាស៊ីភិក លោក ដានីញែល បាស្ដាដ៍ បានថ្លែង ពីទីស្នាក់ការធំ ក្នុង​រដ្ឋធានី​ប៉ារីស (បារាំង) មកថា អង្គការ «RWB / RSF» កំពុង​តាមដាន យ៉ាងយក​ចិត្ត​ទុកដាក់ ចំពោះ​ករណីចាប់ខ្លួន លោក សុខ ឧត្ដម។

លោក បាស្ដាដ៍ បានបញ្ជាក់ថា៖

«យើងកំពុងតាមដាន សំនុំរឿងខាងលើ ហើយមិនសង្ស័យ​ឡើយថា យើងនឹងចេញ​សេចក្ដី​ថ្លែងការណ៍ អំពី​ករណីនេះ នៅដើម​​សប្ដាហ៍ក្រោយ។»

អាជ្ញាធរកម្ពុជា បញ្ជាក់ថា ការចាប់ខ្លួននោះ ធ្វើឡើងដោយអនុវត្ត តាមច្បាប់កម្ពុជា ដើម្បីអ្វីមួយ ដែលក្រុមអាជ្ញាធរទាំងនោះ អះអាងថា ជាការផ្សាយព័ត៌មាន​បំភ្លៃ និង​មាន​លក្ខណៈ «ញុះញង់ ឲ្យប្រព្រឹត្តិបទឧក្រិដ្ឋជាអាទិ៍»។

ករណីចាប់អ្នកកាសែត​​​ដាក់ពន្ធនាគារ បិទស្ថាប័នព័ត៌មាន និងការរាំងខ្ទប់គេហទំព័រ​ នៅ​កម្ពុជា បានកើតមានជាហូហែរ ក្នុងរយៈពេល ចាប់ពីចុងខែមីនាមក។

កាលពីដើមខែមេសា លោក សុវណ្ណ រិទ្ធី ម្ចាស់ស្ថាប័ន«FBTV» ក៏ត្រូវបានចាប់ខ្លួន ដាក់​ពន្ធនាគារដែរ បន្ទាប់ពីលោក បាន​ចុះផ្សាយ នៅលើបណ្ដាញសង្គម នូវការដកស្រង់សំដី របស់លោកនាយករដ្ឋមន្ត្រី ហ៊ុន សែន ដែលបានថ្លែង ឲ្យអ្នករត់ម៉ូតូឌុប លក់ម៉ូតូ ដើម្បី​ទិញ​អង្ករហូប នៅក្នុងរយៈពេល នៃវិបត្តិ«Covid-19»។

នៅចុងខែមីនា គេហទំព័រ របស់ទស្សនាវដ្ដីមនោរម្យ «MONOROOM.info» បានរង​ការរាំងខ្ទប់ ដោយមិនឲ្យប្រិយមិត្តបើកចេញ នៅក្នុងប្រទេសកម្ពុជា បន្ទាប់ពីស្ថាប័ន​មិនចំណុះ​មួយនេះ បានផ្សាយរបាយការណ៍ ជាបន្តបន្ទាប់ ស្ដីពីជំងឺ «Covid-19» នៅ​កម្ពុជា និងនៅ​ប្រទេស​ចិន។

ចំពោះករណីទាំងពីរលើក តែងត្រូវបានថ្កោលទោស ដោយអង្គការ​អ្នកយកព័ត៌មាន​គ្មាន​ព្រំដែន (ចុចអានទីនេះ និងទីនេះ) ដោយហៅទង្វើទាំងនេះ ថាជាការគម្រាមកំហែង ទៅលើ​សិទ្ធិ អ្នកសារព័ត៌មាន និងសិទ្ធិទទួលបានព័ត៌មាន របស់ពលរដ្ឋកម្ពុជា។

នៅក្នុងបញ្ជីសន្ទស្សន៍ របស់អង្គការអន្តរជាតិខាងលើ ប្រទេសកម្ពុជាបានបន្តធ្លាក់ ចំណាត់ថ្នាក់​ប្រចាំឆ្នាំ របស់ខ្លួន ស្ដីពីសេរីភាពសារព័ត៌មាន ពីលេខរៀងទី១៤៣ ក្នុងឆ្នាំមុន មកលេខ១៤៤ ក្នុងឆ្នាំ២០២០នេះ ពីក្នុងចំណោម​១៨០ប្រទេស នៅជុំវិញ​ពិភពលោក៕



លំអិតបន្ថែមទៀត

កម្ពុជា

អតីត​ចៅសង្កាត់ CNRP ត្អូញពីការរំខានតាមផ្លូវតុលាការ ទៅលើសិទ្ធិខ្លួន

«ខ្ញុំរស់នៅ វាពិបាកណាស់! ហើយខ្ញុំមិនដឹងថា តើពេលតទៅមុខទៀត ខ្ញុំនឹងប្រឈមអ្វីទៀតទេ។» នេះ ជាការអះអាងឡើង របស់កញ្ញា ស៊ិន ចាន់ពៅរ៉ូហ្សែត នៅខណៈដែល អតីត​ចៅសង្កាត់ អូចារ ...
កម្ពុជា

RSF៖ «Fresh News» ជា​«រោងចក្រផលិតព័ត៌មាន​ក្លែងក្លាយ»

ពីរដ្ឋធានីប៉ារីស អង្គការអ្នកយកព័ត៌មានគ្មានព្រំដែន ដែលមានបណ្ដាញរបស់ខ្លួន នៅពាសពេញពិភពលោក បានហៅសារព័ត៌មាន «Fresh News» ដែលជាប្រព័ន្ធផ្សព្វផ្សាយក្នុងស្រុកមួយ ថាជាសារព័ត៌មាន ដែលស្រែកតាមតែម្ចាស់ខ្លួន។ របាយការណ៍របស់អង្គការនេះ ដែលចេញផ្សាយកាលពីថ្ងៃពុធ បានបន្ថែមឈ្មោះ ...
កម្ពុជា

សម រង្ស៊ី ប្រាប់​រដ្ឋាភិបាល​បរទេស​ថា ​តុលាការ​នៅ​ភ្នំពេញ​ជា​«អាយ៉ង»

មេដឹកនាំប្រឆាំងរបស់កម្ពុជា លោក សម រង្ស៊ី បានសរសេរលិខិតមួយ នៅថ្ងៃនេះ ទៅកាន់រដ្ឋាភិបាល នៃបណ្ដាប្រទេសនានា ដើម្បីប្រាប់ឲ្យប្រទេសទាំងនោះ កុំយកចិត្តដាក់ចំពោះដីកាឲ្យចាប់ខ្លួន ដែលចេញកាលពីដើមខែមិនា ដោយតុលាការរាជធានី ប្រឆាំងមេដឹកនាំប្រឆាំង ...

Comments are closed.

យល់ស៊ីជម្រៅផ្នែក កម្ពុជា

កម្ពុជា

សម រង្ស៊ី៖ របបក្រុងភ្នំពេញ និងចិន​ឃុបឃិតគ្នា ដើម្បីកំណត់​តម្លៃ​វ៉ាក់សាំង

កម្ពុជា

កម្ពុជា៖ អ្នកជំងឺស្លាប់កើនដល់ ជាង១ពាន់នាក់ – ថ្ងៃនេះស្លាប់៣៩នាក់

ប្រទេសកម្ពុជា មានអ្នកជំងឺកូវីដ-១៩ (Covid-19) ស្លាប់កើនឡើងដល់ ជាង១ពាន់នាក់ បន្ទាប់ពីអ្នកជំងឺ៣៩នាក់​ទៀត បានស្លាប់ក្នុង​ថ្ងៃពុធទី១៥ ខែកក្កដា ឆ្នាំ២០២១។ នេះ បើតាមសេចក្ដីប្រកាសព័ត៌មាន របស់ក្រសួង​សុខាភិបាល​កម្ពុជា ដែលចេញផ្សាយ​នៅមុននេះបន្តិច។ ...
កម្ពុជា

ហ៊ុន សែន ឲ្យប្រគល់​«សត្វតោ»​ទៅម្ចាស់វិញ ខណៈ​មន្ត្រីថា​អនុវត្តច្បាប់

ប្រសិនជាមន្ត្រីក្រសួងកសិកម្ម និងបរិស្ថាន ខិតខំពន្យល់ថា ទង្វើរឹបអូស«សត្វតោ» ជាការអនុវត្តច្បាប់នោះ ទីបំផុតទៅ លោក ហ៊ុន សែន បានចេញបញ្ជាឲ្យប្រគល់សត្វតោនេះ ត្រឡប់ទៅឲ្យម្ចាស់ដើម ដែលជាជនជាតិចិនវិញ។ បុរសខ្លាំងនៅកម្ពុជា ...