កម្ពុជា«អត់គាំទ្រការឈ្លានពាន»ប្រទេសអ៊ុយក្រែន ពីសំណាក់ប្រទេសរ៉ុស្ស៊ី យ៉ាងដាច់ណាត់ និងនៅគ្រប់វេទិកា។ ជាការប្រកាសឡើង របស់លោក ហ៊ុន សែន នាយករដ្ឋមន្ត្រីកម្ពុជា ដើម្បីបញ្ជាក់អំពីជំហរជាថ្មី និងជាផ្លូវការរបស់ប្រទេសកម្ពុជា ជុំវិញសង្គ្រាមរវាងប្រទេសរ៉ុស្ស៊ី និងអ៊ុយក្រែន ដែលបានផ្ទុះឡើង តាំងពីថ្ងៃទី២៤ ខែកុម្ភៈ។ កម្ពុជាដែលកំពុងកាន់តំណែង ក្នុងឆ្នាំ២០២២នេះ ជាប្រធានប្ដូរវេន នៃសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន (ASEAN)។
ថ្លែងក្នុងពិធីសម្ពោធ ដាក់ឲ្យប្រើប្រាស់ផ្លូវជាតិលេខ២១ ក្នុងក្រុងតាខ្មៅ ខេត្តកណ្ដាល ក្នុងព្រឹកថ្ងៃទី២៣ ខែមីនា ឆ្នាំ២០២២នេះ បុរសខ្លាំងនៅកម្ពុជា បានថ្លែងបញ្ជាក់ពីជំហររបស់ប្រទេសកម្ពុជា ជាសាធារណៈ និងជាពិសេសដើម្បីប្រាប់ ទៅមន្ត្រីការទូតកម្ពុជាទាំងអស់ ឲ្យដើរតាមខ្សែបន្ទាត់តែមួយដូច្នេះ។
លោក ហ៊ុន សែន ប្រកាសឡើងថា ៖
«ព្រឹកមិញ ឃើញផ្ញើរសារមកសុំយោបល់ ថាតើបោះឆ្នោតគាំទ្រ ឬបោះឆ្នោតអនុបវាទ ឬប្រឆាំង? លើបញ្ហារ៉ុស្ស៊ី និងអ៊ុយក្រែន […] យកជំហរឲ្យច្បាស់ អត់ញ៉ិញញ៉ុញទេ បន្ទាត់នយោបាយការបរទេសយើងយ៉ាងដូចម្ដេច? យើងអត់នៅអនុបវាទទេ ហើយយើង អត់គាំទ្រការឈ្លានពាន ពីប្រទេសមួយ ទៅកាន់ប្រទេសមួយទេ។ អាហ្នឹង ជាគោលជំហរដាច់ណាត់របស់យើង។»
ទម្លាប់អាក្រក់…
សង្គ្រាមឈ្លានពានអ៊ុយក្រែន បានឈានមកដល់ថ្ងៃទី២៨ហើយ ជាពិសេសទីក្រុងធំៗ និងជាយុទ្ធសាស្ត្រជាច្រើន របស់ប្រទេសអ៊ុយក្រែន កំពុងស្ថិតក្រោមការឡោមព័ន្ធ តាំងពីច្រើនថ្ងៃកន្លងមក ដោយកងទ័ពរ៉ុស្ស៊ី។ ទោះយ៉ាងណា ក៏ស្ថានភាពវាយប្រយុទ្ធ រវាងកងទ័ពទាំងសងខាង ស្ថិតក្នុងភាពមិនចាញ់-មិនឈ្នះ។
ក្នុងពេលកន្លងមក លោកនាយករដ្ឋមន្ត្រី ហ៊ុន សែន តែងបង្ហាញជំហរ ស្និតស្នាលជាមួយប្រទេសចិនដែលខណៈនេះ កំពុងឈរនៅកណ្ដាល ក្នុងសង្គ្រាមឈ្លានពានប្រទេសអ៊ុយក្រែន មុននឹងត្រូវបានសហរដ្ឋអាមេរិកព្រមាន និងប្រាប់ឲ្យក្រុងប៉េកាំង ត្រូវជ្រើសរើសរវាងប្រទេសរ៉ុស្ស៊ី និងបស្ចឹមលោក។
បុរសខ្លាំងនៅកម្ពុជា បានបន្តថ្លែងថា ៖
«អញ្ចឹងឲ្យគោលការណ៍ទៅ ឲ្យជាក់តែម្ដង ប្រាប់ថា ទៅគ្រប់ទីកន្លែងទាំងអស់ ឲ្យតែមានសេចក្ដីសម្រេច ទាក់ទងនឹងសង្គ្រាមរ៉ុស្ស៊ី-អ៊ុយក្រែន គឺយើងបោះឆ្នោតប្រឆាំងនឹងការឈ្លានពាន ប្រឆាំងនឹងការប្រើប្រាស់កម្លាំង […] ព្រោះរឿងនេះមិនមែនរឿងតូចតាចទេ រឿងបង្កើតឡើង នូវទម្លាប់អាក្រក់លើពិភពលោក អ្នកខ្លាំងវ៉ៃអ្នកខ្សោយ អញ្ចឹងបើថ្ងៃក្រោយ អ្នកខ្លាំងវ៉ៃអ្នកខ្សោយ វ៉ៃមកលើ[កម្ពុជា]យើង នរណាជួយយើងទៀត បើយើងមិន (…) អាហ្នឹងនិយាយគ្នាឲ្យច្បាស់៕»
