ប្រសិនជាមន្ត្រីក្រសួងកសិកម្ម និងបរិស្ថាន ខិតខំពន្យល់ថា ទង្វើរឹបអូស«សត្វតោ» ជាការអនុវត្តច្បាប់នោះ ទីបំផុតទៅ លោក ហ៊ុន សែន បានចេញបញ្ជាឲ្យប្រគល់សត្វតោនេះ ត្រឡប់ទៅឲ្យម្ចាស់ដើម ដែលជាជនជាតិចិនវិញ។ បុរសខ្លាំងនៅកម្ពុជា បានប្រកាសឲ្យដឹង អំពីការសម្រេចរបស់លោក តាមរយៈសារខ្លីមួយ ដែលលោកបង្ហោះ នៅលើបណ្ដាញសង្គម នៅយប់ថ្ងៃអាទិត្យនេះ។
នាយករដ្ឋមន្ត្រីកម្ពុជា បានសរសេរថា៖
«ក្រោយក្តាប់បានរឿងសត្វតោ ល្ងាចនេះ ខ្ញុំបានពិភាក្សាជាមួយរដ្ឋមន្ត្រីក្រសួងកសិកម្ម និងបានឯកភាពគ្នាថា អនុញ្ញាតឱ្យម្ចាស់យកទៅចិញ្ចឹមវិញ ក្នុងលក្ខខណ្ឌម្ចាស់ត្រូវធ្វើទ្រុង ឱ្យបានត្រឹមត្រូវ ដើម្បីធានាសុវត្ថិភាព ទាំងមនុស្សក្នុងផ្ទះ និងអ្នករស់នៅជិតខាង។»
កាលពីព្រឹកថ្ងៃអាទិត្យ សប្ដាហ៍មុន (ទី២៧ ខែមិថុនា ឆ្នាំ២០២១) កងកម្លាំងអាជ្ញាធរចម្រុះបានចុះធ្វេីការដកហូត យកសត្វតោឈ្មោលរស់មួយក្បាល ពីជនជាតិចិនម្នាក់ ដែលបានចិញ្ចឹមនៅក្នុងលំនៅដ្ឋានរបស់ខ្លួន ស្ថិតក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
កិច្ចសហប្រតិបត្តិនោះ ដឹកនាំដោយ លោក គាំ សីហា នាយខណ្ឌរដ្ឋបាលព្រៃឈេីភ្នំពេញ សហការជាមួយព្រះរាជអាជ្ញារងអមសាលាដំបូងរាជធានីភ្នំពេញ និងមានការចូលរួម ពីអង្គការសម្ព័ន្ធមិត្តសត្វព្រៃ «Wildlife Alliance» ព្រមទាំងកងកម្លាំងសមត្ថកិច្ចចម្រុះមូលដ្ឋាន។
សម្រាប់លោក គាំ សីហា បានអះអាងថា ពលរដ្ឋមិនមានសិទ្ធិ ក្នុងការចិញ្ចឹមសត្វព្រៃ ដែលជាប្រភេទសត្វកម្រនោះទេ។
ការអះអាងខាងលើ ក៏ត្រូវបានលោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បញ្ជាក់ប្រាប់បណ្ដាញសារព័ត៌មាននានាដែរ ដោយបានលើកយកមាត្រា៤៩ នៃច្បាប់ស្តីពីព្រៃឈើ និងមាត្រា៥៨ នៃច្បាប់ស្តីពីតំបន់ការពារធម្មជាតិ មកអះអាងបន្ថែម។
រីឯអង្គការសម្ព័ន្ធមិត្តសត្វព្រៃ បានពន្យល់អំពីការចូលរួម ក្នុងប្រតិបត្តិការខាងលើ ដោយលើកឡើងថា សត្វតោមួយក្បាលនេះ ត្រូវបានចិញ្ចឹមខុសពីក្របខណ្ឌជីវិត ដែលជាធម្មជាតិរបស់សត្វព្រៃ។ អង្គការ«Wildlife Alliance»លើកឡើងថា
«ល័ក្ខខ័ណ្ឌចិញ្ចឹមសត្វតោ នៅក្នុងលំនៅដ្ឋានដូច្នេះ គឺមិនសមរម្យសម្រាប់សត្វព្រៃទេ។ លើសពីនេះ ធ្មេញចង្កូម និងក្រញ៉ាំរបស់សត្វតោ ត្រូវបានកាត់ចេញ ដែលទង្វើនេះ បានកាត់បន្ថយយ៉ាងខ្លាំង នូវគុណភាពជីវិត ជាធម្មជាតិរបស់វា។»
សត្វតោវ័យជំទង់ (អាយុ១ឆ្នាំកន្លះ) ដែលមានទម្ងន់៧០គីឡូក្រាម ត្រូវបានចាប់ដាក់ក្នុងទ្រុង និងបញ្ជូនចេញទៅកាន់មណ្ឌលសង្គ្រោះសត្វព្រៃ ភ្នំតាម៉ៅ ក្នុងថ្ងៃដដែល (ថ្ងៃអាទិត្យសប្ដាហ៍មុន)។
ប៉ុន្តែបណ្ដាជនជាច្រើន បានប្រតិកម្មអំពីចំណាត់ការខាងលើ ដោយពួកគេបារម្ភថា មណ្ឌលភ្នំតាម៉ៅ អាចថែរក្សាសត្វតោ មិនបានល្អដូចពេលវានៅជាមួយម្ចាស់របស់វានោះឡើយ។ នៅលើបណ្ដាញសង្គម ពួកគេបានលើកឡើងថា នៅក្នុងមណ្ឌលនោះ សត្វព្រៃជាច្រើនក្បាល មានរូបរាង«ស្គមស្គាំង» ដែលទំនងជាគ្មានអាហារចិញ្ចឹមគ្រប់គ្រាន់៕
