តើលោក សម រង្ស៊ី និងមន្ត្រីគណបក្សសង្គ្រោះជាតិ (CNRP) វិលចូលកម្ពុជាវិញ នៅថ្ងៃណា? សេចក្ដីថ្លែងការណ៍មួយ របស់គណបក្ស​ប្រឆាំង ចុះថ្ងៃទី១៦ ខែសីហា ឆ្នាំ២០១៩ ដែលទើបធ្លាក់មកដល់ដៃអ្នកសារព័ត៌មាន បានកំណត់យកថ្ងៃទី៩ ខែវិច្ឆិកាខាងមុខ ដើម្បីព្រឹត្តិការណ៍ នៃការធ្វើមាតុភូមិនិវត្តន៍ របស់ក្រុមមេដឹកនាំគណបក្សប្រឆាំង។

សេចក្ដីថ្លែងការណ៍នោះ បានសរសេរថា គណៈកម្មាធិការអចិន្ត្រៃយ៍គណបក្ស បានកំណត់យកថ្ងៃទី៩ ខែវិច្ឆិកា ឆ្នាំ២០១៩ ជាថ្ងៃធ្វើមាតុភូមិ​និវត្តន៍ ទៅកាន់ប្រទេសកម្ពុជាវិញ របស់ថ្នាក់ដឹកនាំគណបក្ស ដឹកនាំដោយលោក សម រង្ស៊ី ដែលជាប្រធាន​ស្ដីទី​គណបក្ស។

អត្ថបទផ្លូវការដដែល បានបញ្ជាក់បន្ថែមថា៖

«ថ្ងៃទី៩ ខែវិច្ឆិកា ឆ្នាំ២០១៩ខាងមុខនេះ គឺជាខួបទី៦៦ នៃទិវាឯករាជ្យជាតិ ដែលកម្ពុជាទទួលបាន ពីអាណានិគមនិយមបារាំង នាថ្ងៃទី៩ ខែវិច្ឆិកា ឆ្នាំ១៩៥៣ ក្រោមការដឹកនាំរបស់សម្ដេច ព្រះនរោត្ដម សីហនុ។»

ការសម្រេចកំណត់ថ្ងៃ ធ្វើមាតុភូមិនិវត្តន៍ វិលចូលកម្ពុជាវិញនេះ ធ្វើឡើងខណៈលោក សម រង្ស៊ី និងមន្ត្រីជាន់ខ្ពស់គណបក្ស «CNRP» ជាច្រើននាក់ កំពុងមានវត្តមាននៅក្នុងប្រទេសម៉ាឡេស៊ី ដែលនៅកៀក នឹងប្រទេសកម្ពុជា ក្នុងជំនួបជាមួយយុវជន និងសកម្មជន​គណបក្ស។

ព្រះតេជគុណ ប៊ុត ប៊ុនតិញ បានមានថេរដីកាថា ជំនួបនោះ មានបំណងបណ្ដុះស្មារតីនយោបាយ ដល់យុវជនសង្គ្រោះជាតិ ហេីយត្រៀមខ្លួន​ទទួលលោក សម រង្ស៊ី ធ្វេីមាតុភូមិនិវត្តន៍។

លោក សម រង្ស៊ី បានរស់នៅនិរទេសខ្លួន នៅក្រៅប្រទេសកម្ពុជា តាំងពីចុងខែវិច្ឆិកា ឆ្នាំ២០១៥នោះ ដើម្បីគេចចេញពីចំណាត់ការ របស់ប្រព័ន្ធយុត្តិធម៌ក្នុងប្រទេស ដែលលោកចាត់ទុកថា គ្រាន់តែជា«អាយ៉ងនយោបាយ» របស់លោកនាយករដ្ឋមន្ត្រី ហ៊ុន សែន។

ប្រធានស្ដីទីគណបក្សប្រឆាំងរូបនេះ ធ្លាប់បានបញ្ជាក់ ជាច្រើនលើក ច្រើនសារហើយ អំពីការត្រឡប់របស់លោក វិលចូលកម្ពុជា​វិញ តែមិនបានបញ្ជាក់ ពីកាលបរិច្ឆេទច្បាស់លាស់ ដូចថ្ងៃនេះទេ។ លោកធ្លាប់លើកឡើងថា នឹងវិលចូលស្រុក ក្នុងឆ្នាំ២០១៧  ក្រោយមកថា នឹងធ្វើក្នុងឆ្នាំ២០១៨ និងចុងក្រោយ ថានឹងធ្វើក្នុងឆ្នាំ២០១៩

ក្នុងពេលកន្លងមក លោក ហ៊ុន សែន រួមនឹងក្រុមអ្នកហែហមទាំងឡាយ តែចាត់ទុកថា ការប្រកាសរបស់លោក សម រង្ស៊ី ជាការប្រកាស​«ខ្យល់» របស់មនុស្ស«កំសាក» ដែលពូកែតែ«ខាងរត់»ប៉ុណ្ណោះ។

បុរសខ្លាំងកម្ពុជា ថែមទាំងចេញបញ្ជា ជាសាធារណៈ ឲ្យធ្វើការចាប់ខ្លួនលោក សម រង្ស៊ី ភ្លាម នៅពេលណាគូបដិបក្ខនយោបាយ ដ៏ស្រួចស្រាវរូបនេះ មានវត្តមាននៅលើទឹកដីកម្ពុជា ហើយថា លោកនឹង«មិនស្នើសុំ»ព្រះមហាក្សត្រ ដើម្បីការព្រះរាជទាន​លើកលែងទោស ឲ្យលោក សម រង្ស៊ី សារជាថ្មីទៀតឡើយ។

បន្ថែមពីលើនេះ លោក ហ៊ុន សែន ធ្លាប់គម្រាមមិនតិចដងទេ ពីការបញ្ជូនភ្នាក់ងារចារកម្មរបស់លោក ទៅតាមចាប់ខ្លួនលោក សម រង្ស៊ី ក្នុងករណីដែលមេដឹកនាំប្រឆាំងរូបនេះ បង្ហាញវត្តមាន នៅក្នុងតំបន់អាស៊ី ក្បែរៗកម្ពុជា។ ប៉ុន្តែការគម្រាមនោះ ត្រូវបានអ្នកឃ្លាំមើល និងវិភាគស្ថានការណ៍នយោបាយកម្ពុជា ពន្យល់ថា លោក ហ៊ុន សែន ខ្លាចលោក សម រង្ស៊ី មកក្បែរទឹកដី នៃប្រទេសកម្ពុជា។

ជាពិសេស ការគម្រាមរបស់បុរសខ្លាំងកម្ពុជា អាចនឹងក្លាយជាការគម្រាម «ខ្យល់» វិញម្ដង បើគេបានស្ដាប់សំដី របស់អ្នកនាំពាក្យក្រសួងមហាផ្ទៃ លោក ខៀវ សុភ័គ ក្នុងល្ងាចថ្ងៃទី១៦ ខែសីហានេះ។

អ្នកនាំពាក្យត្រូវបានវិទ្យុសម្លេងក្នុងស្រុក ស្រង់សំដីមកបញ្ជាក់ថា អាជ្ញា​ធរ​កម្ពុជាមិនចាំបាច់ ទៅ​ចាប់​ខ្លួន​លោក សម រង្ស៊ី ដល់​ប្រទេស​ម៉ាឡេស៊ី​នោះ​ទេ ព្រោះលោក ​សម រង្ស៊ី នឹង​ដើរ​ចូល​ឲ្យចាប់​ខ្លួន​ នៅ​ពេល​ខាង​មុខ​នេះ ​រួចជាស្រេចហើយ៕



You may also like

កម្ពុជា

សភាអ៊ីតាលី​អនុម័ត​ញត្តិ​ស្នើឲ្យ​ភាគីកម្ពុជា​ជជែកគ្នា និង​ចូលរួម​នីតិវិធីព្យួរ EBA

រដ្ឋសភានៃប្រទេសអ៊ីតាលី ដែលជាសមាជិកដ៏សំខាន់មួយ របស់សហភាពអ៊ឺរ៉ុប បានអនុម័តញត្តិមួយ កាលពីថ្ងៃអង្គារទី១២ ខែកុម្ភៈ ឆ្នាំ២០១៩ ដើម្បីចាត់រដ្ឋាភិបាលរបស់ខ្លួន ឲ្យ«អញ្ជើញ»ភាគីជម្លោះខ្មែរទាំងអស់ធ្វើការជជែកគ្នា និងត្រូវចូលរួមយ៉ាងសកម្ម ក្នុងដំណើរការនីតិវិធី របស់គណៈកម្មការអ៊ឺរ៉ុប ដើម្បីឈានទៅព្យួរប្រទេសកម្ពុជា ...
កម្ពុជា

សម រង្ស៊ី បង្ហើប​ថា ស ខេង ជា​អ្នក​រៀបចំ​គម្រោង​ឲ្យ​លោក​និរទេស​ខ្លួន

ប្រធានស្ដីទីគណបក្សសង្គ្រោះជាតិ លោក សម រង្ស៊ី បានបង្ហើបឲ្យដឹង នៅថ្ងៃនេះថា ការខកខាន នៃការវិលចូលប្រទេសកម្ពុជាវិញ កាលពីថ្ងៃទី១៦ ខែវិច្ឆិកា ឆ្នាំ២០១៥ ហើយដែលធ្វើឲ្យលោក រស់នៅនិរទេសខ្លួន ...
និមិត្តសញ្ញារបស់ស្ថានទូតអាមេរិក និងលោក កឹម សុខា មេដឹកនាំគណបក្សសង្គ្រោះជាតិ។ (រូបថតកាត់ត)
កម្ពុជា

កម្ពុជាថា អាមេរិក​«គឃ្លើន»​ដែល​បរិហារ​ជាថ្មី ការបោះឆ្នោត​ឆ្នាំ​២០១៨

គឃ្លើន – របបក្រុងភ្នំពេញ បានប្រតិកម្ម​ខ្លាំងៗ តបការលើកឡើង របស់ស្ថានទូតសហរដ្ឋ​អាមេរិក ដែលបង្ហោះសារ នៅលើទំព័រហ្វេសប៊ុករបស់ខ្លួន រំលឹកឡើងវិញ ហៅការបោះឆ្នោតសកល ខែកក្កដា ឆ្នាំ២០១៨ ថា«មានកំហុសឆ្គងយ៉ាងខ្លាំង» ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...