កម្ពុជាដំណឹង

សម រង្ស៊ី ប្រាប់ ស ខេង ដែល​ត្រៀម​កម្លាំង​រួច ឲ្យ​កម្ចាត់ ហ៊ុន សែន មុន

លោក សម រង្ស៊ី បានប្រកាសនៅថ្ងៃនេះ ឲ្យបុរសទីពីរនៃរបបក្រុងភ្នំពេញ គឺលោក ស ខេង ដែលមេដឹកនាំប្រឆាំងជឿថា បានត្រៀមកម្លាំងរួចជាស្រេចនោះ ឲ្យបើកប្រតិបត្តិការ​«វាយកម្ចាត់»​លោក ហ៊ុន សែន ឲ្យបានមុន ដោយមិនត្រូវទុកឲ្យលោក ហ៊ុន សែន ធ្វើប្រតិបត្តិការកម្ទេចមុន នោះឡើយ។

ថ្លែងតាមកិច្ចសម្ភាសមួយ ក្នុងវិទ្យុអាស៊ីសេរី ពីប្រទេសកូរ៉េខាងត្បូង កន្លែងដែលលោក សម រង្ស៊ី កំពុងចូលរួមក្នុងកម្មវិធីជាច្រើន នៅទីនោះ មេដឹកនាំប្រឆាំងបានអះអាងជាថ្មី អំពីដំណើរវិលត្រឡប់ ចូលមាតុភូមិវិញ ក្នុងពេលខាងមុខ។ លោកបន្តបញ្ជាក់ទៀតថា៖

«ខ្ញុំវិលត្រឡប់ទៅវិញនេះ គឺខ្ញុំមិនឲ្យ ហ៊ុន សែន ចាប់ខ្ញុំ ដូច ហ៊ុន សែន ចាប់ កឹម សុខា នោះទេ (…) មិនមែនឲ្យ ហ៊ុន សែន លួចសម្លាប់ខ្ញុំ ដូចគាត់លួចសម្លាប់ កែម ឡី ទេ។ ខ្ញុំទៅស្រុកខ្មែរវិញ គឺខ្ញុំប្រមូលកម្លាំង ពីប្រទេសកូរ៉េ ម៉ាឡេស៊ី ថៃ ហើយមកតាំងពីអាមេរិក តាំងពីអូស្ត្រាលី បារាំង… យើងទៅរួមគ្នា យើងបុក​សម្រុកចូល​ទៅក្នុង​ប្រទេសកម្ពុជា។»

«ពេលនោះ កងកម្លាំងប្រដាប់អាវុធមួយចំនួនធំ គឺឈប់ការពារអំណាចផ្ដាច់ការហើយ គឺបែរមកការពារប្រជាពលរដ្ឋវិញ ដែលងើបឈរប្រឆាំងអំណាចផ្ដាច់ការ អំណាចក្បត់ជាតិ ដឹកនាំដោយ ហ៊ុន សែន។»

ប្រធានស្ដីទីគណបក្សប្រឆាំង បានបន្តថា៖

«ក្នុងជួរគណបក្សប្រជាជន ខ្ញុំជឿថា លោក ស ខេង គាត់ត្រៀមហើយ គាត់រៀបចំកម្លាំងហើយ។ យើងសុំប្រាប់ទៅលោក ស ខេង វិញថា លោក ស ខេង វ៉ៃមុនទៅ ពីព្រោះ ហ៊ុន សែន នឹងកម្ចាត់លោក ស ខេង ឯងហើយ។ អ្នកណាមិនមែនត្រកូល ហ៊ុន សែន មិនមែនកូនបង្កើត មិនមែនសាច់ឈាម ហ៊ុន សែន គឺ ហ៊ុន សែន អត់ទុកចិត្តទេ គេដកម្ដងមួយៗ គេទុកតែគ្រួសារកូនបង្កើតរបស់គេទេ។»

ការលើកឡើងប្រហាក់ប្រហែលគ្នា ក្នុងពេលកន្លងមក ធ្លាប់ត្រូវបានលោក ស ខេង ចេញមុខបដិសេធរួចហើយ។ លោក ហ៊ុន សែន ក៏ធ្លាប់បានចំអកដាក់លោក សម រង្ស៊ី វិញដែរថា ដោយសារមេដឹកនាំប្រឆាំង មិនស្គាល់ច្បាស់ ពីសាមគ្គីភាពផ្ទៃក្នុង របស់គណបក្សប្រជាជនកម្ពុជា​ដូច្នេះហើយ ទើបធ្វើនយោបាយ មិនដែលឈ្នះលោក។

ធានាជ័យជំនះ…

លោក សម រង្ស៊ី បានបញ្ជាក់ទៀតថា ការស្នើរបស់លោក ជាសាធារណៈ​ឲ្យលោក ស ខេង បើកប្រតិបត្តិការមុននេះ គឺជាការធានាជ័យជំនះ ជូនលោក ស ខេង ទាំងស្រុងតែម្ដង។ មេដឹកនាំប្រឆាំងថា៖

«ការអំពាវនាវនេះ​គឺធានា​ជោគជ័យ​ជូនលោក ស ខេង។ គឺលោក ស ខេង ហ៊ានវ៉ៃលោក ហ៊ុន សែន មុន ប្រជារាស្ត្រខ្មែរនឹងគាំទ្រលោក ស ខេង ពេញទំហឹង។ ហើយមិនមែនតែប្រជារាស្ត្រខ្មែរទេ នៅមានប្រទេសជិតខាងទៀតព្រោះ ហ៊ុន សែន ទៅអែបជាមួយចិន យកចិន​ធ្វើជាអ្នក​គ្រប់គ្រង​កម្ពុជា ដាក់ទ័ពដាក់មូលដ្ឋានសិកអី… គឺប្រទេសទាំងនោះគេអត់ពេញចិត្តទេ។»

ចុងខែធ្នូកន្លងទៅ លោក សម រង្ស៊ី ធ្លាប់បានលើកឡើងថា គឺលោក ស ខេង ជាអ្នកនៅពីក្រោយ​ការនិរទេសខ្លួន​របស់លោក​ កាលពីអំឡុងចុងឆ្នាំ២០១៥ ដើម្បីទុកឱកាសឲ្យលោក​រៀបចំផ្ទៃក្នុង​គណបក្សប្រជាជនកម្ពុជា​សិន។ ប៉ុន្តែលោកឧបនាយករដ្ឋមន្ត្រី​និងជារដ្ឋមន្ត្រីមហាផ្ទៃ​​បានតបវិញថា លោកមិនល្ងង់ធ្វើទង្វើបែបនេះ ដែលអាចបើកផ្លូវឲ្យលោក សម រង្ស៊ី វាយប្រហារមកលើលោកវិញនៅពេលក្រោយ​ដូច្នេះឡើយ។

លោក ស ខេង បានអះអាងថា៖

«ប្រការនេះខុសទាំងស្រុង ពីច្បាប់រដ្ឋធម្មនុញ្ញ និងអាចផ្តល់ឱកាសគ្រប់ពេលវេលា ឲ្យ សម រង្ស៊ី មានលេសវាយប្រហារ មកលើរូបខ្ញុំវិញ នៅពេលដែលសមត្ថកិច្ច បានទទួលដីកា ដើម្បីចាប់ខ្លួន សម រង្ស៊ី រួចហើយ»៕



You may also like

កម្ពុជា

ហ៊ុន សែន ថា«វណ្ណៈកណ្ដាល»​កើនឡើង តាមរយៈ​ផ្ទះស្បូវ​ថ្លៃជាង​ផ្ទះក្បឿង

នាយករដ្ឋមន្ត្រីបីទសវត្សន៍ជាង របស់កម្ពុជា បានអះអាងថា ក្រោមការដឹកនាំរបស់លោក រហូតមកដល់ថ្ងៃនេះ «វណ្ណៈកណ្ដាល»នៃអ្នកមានទ្រព្យធន នៅក្នុងប្រទេស បានកើនឡើងយ៉ាងច្រើន។ មិនមានអំណះអំណាង ជាតួលេខ ឬរបាយការណ៍ណាមួយជាក់លាក់ ដើម្បីជួយបញ្ជាក់ នូវការលើកឡើង ...
របាយការណ៍

«គង់ វិបុល ពាក់​ព័ន្ធ​នឹង​លុយ​កខ្វក់​រាប់​លាន​ដុល្លារ​នៅ​អូស្ត្រាលី»

«អ្នកឯងមានអំណះអំណាង ពីណាមក» បន្ទាប់មកថា «មិនមែនជាការពិតទេ» មុននឹងទទួលស្គាល់នៅទីបំផុត ថាពិតជាធ្លាប់មានក្រុមហ៊ុន ទាំងនោះមែន តែ«បានផ្ទេរឈ្មោះ ទៅឲ្យអ្នកផ្សេង»រួចហើយ និងចោទត្រឡប់ទៅវិញ ថានាយកដ្ឋានចុះបញ្ជីក្រុមហ៊ុន របស់ប្រទេសអូស្ត្រាលី មិនបានធ្វើ ...
កម្ពុជា

CNRP ថ្កោលទោស​ការចាប់ផ្សឹក​សង្ឃ ហោ សុខុន ព្រោះ​ការបញ្ចេញមតិ

ការចាប់ផ្សឹក​ព្រះតេជគុណ ហោ សុខុន អតីតចៅអធិការវត្តច្បារអំពៅ និងជាអតីតសង្ឃទីប្រឹក្សា រងការថ្កោលទោស«យ៉ាងដាច់អហង្កា» ពីគណបក្សសង្គ្រោះជាតិ ដោយហៅទង្វើនេះ ថាជា«ការបង្ក្រាប និងគម្រាមកំហែងដល់សិទ្ធិសេរីភាព»។ គណបក្សប្រឆាំងបានអំពាវនាវឲ្យគណបក្សប្រជានកម្ពុជា និងលោក ហ៊ុន ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...