មេដឹកនាំប្រឆាំងកម្ពុជា លោក សម រង្ស៊ី បានអះអាងជាថ្មីថា លោក«ប្ដេជ្ញាវិលចូលកម្ពុជាវិញ» ឲ្យខាងតែបាន នៅក្នុងឆ្នាំ២០១៩នេះ។ ការអះអាងរបស់លោក សម រង្ស៊ី បានធ្វើឡើងជាថ្មីទៀត បើទោះជាលោកនាយករដ្ឋមន្ត្រី ហ៊ុន សែន និងមន្ត្រីរបបក្រុងភ្នំពេញផ្សេងទៀត អះអាងយ៉ាងសន្ធាប់ ក្នុងរយៈពេលចុងក្រោយនេះ នឹងបញ្ជាឲ្យចាប់ខ្លួនលោក យ៉ាងណាក្ដី។
លោក សម រង្ស៊ី បានថ្លែង ពីការប្ដេជ្ញារបស់លោក នៅលើបណ្ដាញសង្គម ទ្វីសធើរ កាលពីប៉ុន្មានម៉ោងមុន ដូច្នេះថា៖
«មិនមានឧទាហរណ៍ណាផ្សេង ដែលខ្ញុំបានសន្យាថា នឹងវិលត្រឡប់ មកកាន់ប្រទេសកម្ពុជាវិញ ក្នុងថ្ងៃជាក់លាក់ណាមួយ ក្រៅតែពីថ្ងៃ ដែលខ្ញុំបានបញ្ជាក់ នៅរដ្ឋធានីសេអ៊ូល កាលពីឆ្នាំ២០១៥ នោះឡើយ។»
លោកបន្តទៀតថា៖
«ភាពមិនច្បាស់លាស់ និងមិនស្មោះត្រង់ ដែលចោទខ្ញុំថា បានក្បត់ពាក្យសន្យានោះ គួរត្រូវបញ្ចប់។ ហើយខ្ញុំប្តេជ្ញាថា នឹងត្រលប់មកវិញ ក្នុងឆ្នាំ២០១៩នេះ។»
បើទោះជាមិនបានបញ្ជាក់ ពីថ្ងៃជាក់លាក់ក៏ដោយ ក៏ក្នុងពេលកន្លងមក លោក សម រង្ស៊ី ធ្លាប់បានបញ្ជាក់ ជាច្រើនលើក ច្រើនសារហើយ អំពីការត្រឡប់របស់លោក វិលចូលកម្ពុជាវិញ។ ម្ដងនោះ ថានឹងធ្វើក្នុងឆ្នាំ២០១៧ និងម្ដងទៀត ថានឹងធ្វើ ក្នុងឆ្នាំ២០១៨។ តែម្ដងណាក៏ដោយ ក៏លោក សម រង្ស៊ី នៅតែរស់នៅនិរទេសខ្លួន នៅក្រៅប្រទេស ដដែលដែរ។
ភស្តុតាងនៃការលើកឡើងនោះ មានតាមរយៈការបង្ហោះ របស់លោកផ្ទាល់ ក្នុងបណ្ដាញសង្គម កាលពីខែកក្កដា ឆ្នាំ២០១៧ ដូចខាងក្រោម៖
