នាយករដ្ឋមន្ត្រីកម្ពុជា បានអះអាងឡើងវិញថា ប្រទេស«កម្ពុជាត្រូវតែមានសន្តិភាពជានិច្ច» ហើយលោកបានអំពាវនាវ ឲ្យរួមគ្នាថែរក្សាការពារសន្តិភាពនេះ ឲ្យខាងតែបាន និងបញ្ចៀសប្រទេស កុំឲ្យវិលធ្លាក់ទៅក្នុងភ្នក់សង្គ្រាមជាថ្មី។
ជាមួយនឹងរូបថតច្រើនសន្លឹក ក្នុងនោះមួយសន្លឹក បង្ហាញពីភាពបាក់បែក នៃអគារធនាគារជាតិ កណ្ដាលរាជធានីភ្នំពេញ ដែលត្រូវបានបំផ្លាញ នៅក្នុងសម័យសង្គ្រាម និងច្រើនសន្លឹកទៀត បង្ហាញពីទិដ្ឋភាពបច្ចុប្បន្ន នៃបេះដូងប្រទេសកម្ពុជា លោក ហ៊ុន សែន បានសរសេរថា៖
«រូប១សន្លឹកសខ្មៅ ដែលយើងបានឃើញ គឺជាទិដ្ឋភាពមួយផ្នែក នៃទីក្រុងភ្នំពេញ ដែលត្រូវបានបំផ្លាញ និងបោះបង់ចោលដោយសារសង្រ្គាម និងរបបប្រល័យពូជសាសន៍ប៉ុលពត កាលពីឆ្នាំ ១៩៧៥-១៩៧៩។»
«ក្រោយពីកម្ពុជាមានសន្តិភាពពេញលេញ ជាង២០ឆ្នាំមកនេះ ទីក្រុងភ្នំពេញត្រូវបានអភិវឌ្ឍ ឲ្យរីកលូតលាស់ទៅមុខឥតឈប់ឈរ។ យើងត្រូវរួមគ្នាថែរក្សា ការពារសន្តិភាព អោយខានតែបាន ដើម្បីកុំឲ្យប្រទេសជាតិវិលធ្លាក់ ទៅក្នុងភ្នក់ភ្លើងនៃសង្រ្គាម និងការបំភ្លិចបំផ្លាញសារជាថ្មី។»
ការថ្លែងរបស់លោក ហ៊ុន សែន ធ្វើឡើងបន្ទាប់ពីការប្រកាសរបស់លោក សម រង្ស៊ី គូបដិបក្ខនយោបាយដ៏ធំមួយរបស់លោក អះអាងជាច្រើនលើក ប្ដេជ្ញាថានឹងវិលត្រឡប់ចូលប្រទេសកម្ពុជា ឲ្យខាងតែបាន ក្នុងពេលខាងមុខ ដើម្បីដឹកនាំចលនាប្រឆាំង ឲ្យងើបឈរឡើងទាំងអស់គ្នា ប្រឆាំងរបបដឹកនាំសព្វថ្ងៃ។
កាលពីចុងសប្ដាហ៍មុន លោកនាយករដ្ឋមន្ត្រី បានព្រមានថា នឹងកម្ទេចកងទ័ពទាំងឡាយណា ដែលងាកក្បាលមកប្រឆាំងលោក និងរំឭកឲ្យកងកម្លាំង ត្រៀមកម្ទេចក្រុមបដិវត្តពណ៌ ដែលលោកថា ប៉ុនប៉ងផ្តួលរំលំរដ្ឋាភិបាលស្រប់ច្បាប់របស់លោក៕
