កម្ពុជាដំណឹង

រលំអគារចិន៖ យន្ដ មីន លាលែង ខណៈ ញឹម វណ្ណដា ត្រូវ​ដកចេញ​ពីតំណែង

ជាការសម្រេចរបស់លោកនាយករដ្ឋមន្ត្រី ហ៊ុន សែន ដែលទើបនឹងធ្លាក់មកដល់ នៅមុននេះបន្តិច ទាក់ទងនឹងហេតុការណ៍រលំស្រុតអគារ កំពស់៧ជាន់ កាលពីព្រឹកថ្ងៃសៅរ៍ នៅខេត្តព្រះសីហនុ។ លោក យន្ដ មីន ដែលជាអភិបាលខេត្ត បានសុំលាលែងពីតំណែង ខណៈលោក ញឹម វណ្ណដា ត្រូវដកចេញ ពីតំណែងជាទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិ គ្រប់គ្រងគ្រោះមហន្តរាយ (គ.ជ.គ.ម)។

បុរសខ្លាំងកម្ពុជា បានសម្រេចដូច្នេះក្នុងថ្ងៃនេះ ដោយអះអាងថា លោក យន្ដ មីន បានសុំលាលែង ចេញពីតំណែងជាអភិបាលខេត្ត ដោយខ្លួនលោក រីឯលោក ញឹម វណ្ណដា រងទណ្ឌកម្ម ពីការមិនទទួលខុសត្រូវ និងពីការភូតភរ។ លោកនាយករដ្ឋមន្ត្រី បានប្រកាសជាសាធារណៈ នៅលើបណ្ដាញសង្គម ឡើងថា៖

«ក្នុងពេលបំពេញការងារ នៅខេត្តព្រះសីហនុ ឯកឧត្តម យន្ត មីន អភិបាលខេត្តព្រះសីហនុបានទទួលស្គាល់កំហុស លើការគ្រប់គ្រង ក្នុងដែនសមត្ថកិច្ចរបស់ខ្លួន ដែលបណ្តាល ឲ្យមានរឿងឈឺចាប់កើតឡើង។ គាត់បានស្នើមកខ្ញុំ ដើម្បីលាលែងចេញពីអភិបាលខេត្តព្រះសីហនុ។»

តុល្យភាពមនុស្សស្លាប់ កើនឡើងដល់២៥នាក់…

មកដល់ព្រឹកនេះ គ្រោះរលំស្រុតអគារ ដែលសង់ដោយក្រុមហ៊ុនចិន បានបណ្ដាលឲ្យមានមនុស្សស្លាប់ រហូតដល់២៥នាក់ហើយ។ នេះ បើតាមតុល្យភាពថ្មី ដែលផ្ដល់ដោយរដ្ឋបាលខេត្តព្រះសីហនុ ដោយបញ្ជាក់បន្ថែមថា ចំនួនមនុស្សរងរបួស នៅមានចំនួន២៤នាក់ដដែល។

អាជ្ញាធរខេត្តមួយនេះ បានអះអាងថា ខ្លួនបានចុះត្រួតពិនិត្យការដ្ឋានសាងសង់អគារខាងលើ ចំនួនពីរដងហើយ និងបានដឹងថា សំណង់មួយនេះ ត្រូវបានសាងសង់ឡើង ដោយគ្មានការអនុញ្ញាត។

តែលោក ហ៊ុន សែន មិនបានលើកឡើង ពីកង្វះចំណាត់ការរបស់អាជ្ញាធរខេត្ត នៅក្នុងការសម្រេចរបស់លោកទេ។ លោកនាយករដ្ឋមន្ត្រី បានបន្តឲ្យដឹងថា៖

«ខ្ញុំបានយល់ព្រមឲ្យគាត់ [យន្ដ មីន] លាលែង និងបានពិភាក្សា ជាមួយសម្តេច ស ខេង យកឯកឧត្តម គួច ចំរើន ពីអភិបាលខេត្តកំពង់ចាម មកធ្វើជាអភិបាលខេត្តព្រះសីហនុវិញ។ ទោះជាមានការរៀបចំបែបនេះក៏ដោយ ក៏ឯកឧត្តម យន្ត មីន នៅបន្តដឹកនាំយុទ្ធនាការរុករក និងសង្រ្គោះតទៅទៀត រហូតចប់កិច្ចការ និងអភិបាលខេត្តថ្មី ចូលកាន់តំណែង។»

លោក ហ៊ុន សែន បានសរសេរបញ្ជាក់ថា៖

«ខ្ញុំក៏សូមបញ្ជាក់ថា ថ្ងៃនេះខ្ញុំបានសម្រេចចិត្ត ដកឯកឧត្តម ញឹម វណ្ណដា ចេញពីតំណែងជាទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយដោយមូលហេតុខ្វះការទទួលខុសត្រូវ និងភូតភរ៕»



You may also like

កម្ពុជា

ហ៊ុន សែន ចេញទៅវៀតណាម ដើម្បីគោរពសព ឡេ ឌឹកអាញ់

នាយករដ្ឋមន្ត្រីកម្ពុជា លោក ហ៊ុន សែន បានដឹកនាំគណៈប្រតិភូមួយ កាលពីរសៀលថ្ងៃព្រហស្បត្តិ៍ ទី២ ខែឧសភានេះ ចេញពីកម្ពុជាឆ្ពោះទៅកាន់រដ្ឋធានី ហាណូយ ប្រទេស​វៀតណាម ដើម្បីចូលរួមគោរពវិញ្ញាណក្ខន្ធសពលោក ឡេ ...
កម្ពុជា

អ្នកវិភាគ៖ បើចាប់ខ្លួន អំ សំអាត តើគួរចាប់ខ្លួន ហ៊ុន សែន មុនឬទេ ?

បើមាន«ច្បាប់ចាប់លោក អំ សំអាត តើគួរចាប់ខ្លួនលោក ហ៊ុន សែន មុនឬទេ ?» នេះ ជាសំនួរ របស់អ្នកវិភាគ​នយោបាយ និងសង្គម លោក ...
កម្ពុជា

កម្ពុជា​មានពេល​៦ខែ ដើម្បី​«ស្ដារស្ថានភាព»​បើចង់រក្សាទុក EBA

ការប្រកាសបើកនីតិវិធីផ្លូវការ ដើម្បីឈានទៅដកប្រទេសកម្ពុជា ចេញពីកម្មវិធីអនុគ្រោះពន្ធ «EBA» មិនមែនជាសេចក្ដីសម្រេចចុងក្រោយ របស់សហភាពអ៊ឺរ៉ុប ដែលថានឹងត្រូវព្យួរប្រព័ន្ធអនុគ្រោះពន្ធ ក្នុងពេលនេះទេ។ ប៉ុន្តែសម្រាប់សហភាពអ៊ឺរ៉ុប វាជាការកំណត់ពេលវេលា ដែលមានកាលវិភាគច្បាស់លាស់ ដើម្បីឈានទៅកាន់ទិសដៅនោះ ប្រសិនណាជាប្រទេសកម្ពុជា ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...