បន្ទាប់ពីមិនអើពើ តាំងពីច្រើនថ្ងៃមក នៅថ្ងៃនេះអាជ្ញាធរកម្ពុជា បានប្រកាសបើកការស៊ើបអង្កេតទៅលើ ករណីចាប់ពង្រត់ លោក វ៉ាន់ឆាឡឺម សាតស័ក្តិសិទ្ធ (Wanchalearm Satsaksit) សកម្មជននយោបាយថៃម្នាក់ ពីខាងមុខអាគារស្នាក់នៅរបស់លោក កណ្ដាលរាជធានីភ្នំពេញ កាលពីថ្ងៃព្រហស្បត្តិ៍ សប្ដាហ៍មុន។
ការប្រកាសរបស់អាជ្ញាធរកម្ពុជា ធ្វើឡើងដើម្បីឆ្លើយតប នឹងកំណត់ទូតរបស់ស្ថានទូតថៃ ប្រចាំនៅកម្ពុជា ដែលបានផ្ញើរមកក្រសួងការបរទេសកម្ពុជា កាលពីម្សិលមិញ ដើម្បីស្នើសុំឱ្យអាជ្ញាធរកម្ពុជា ពិនិត្យ និងផ្ទៀងផ្ទាត់ ពីព័ត៌មានដ៏ភ្ញាក់ផ្អើលមួយនេះ។
លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ និងជាអ្នកនាំពាក្យស្ថាប័នមួយនេះ ត្រូវបានស្រង់សំដី ដោយសារព័ត៌មានក្នុងស្រុក មកចុះផ្សាយថា សមត្ថកិច្ចកម្ពុជា កំពុងធ្វើការស្រាវជ្រាវ អំពីករណីខាងលើ។ តែមន្ត្រីអ្នកនាំពាក្យ បានបដិសេធថា កម្ពុជាមិនបានចាប់ខ្លួន លោក វ៉ាន់ឆាឡឺម សាតស័ក្តិសិទ្ធ នោះទេ។
លោក កុយ គួង អ្នកនាំពាក្យក្រសួងការបរទេសកម្ពុជា បានស្រង់ខ្លឹមសារ នៃកំណត់ទូតរបស់ស្ថានទូតថៃ មកបញ្ជាក់ថា ស្ថានទូតថៃបានសួរនាំ អំពីព័ត៌មាននៃការចាប់ខ្លួន សកម្មជនខាងលើ ដោយសួរថា ពិតជាមានការចាប់ខ្លួនពិតមែន ឬយ៉ាងណា។ ជាមួយគ្នានេះ ស្ថានទូតថៃក៏បានស្នើសុំ ឱ្យអាជ្ញាធរកម្ពុជាផ្ទៀងផ្ទាត់ ជុំវិញព័ត៌មាន ដែលបានផ្សព្វផ្សាយ ជាបន្តបន្ទាប់ ពីការចាប់ខ្លួនដ៏គួរឲ្យសង្ស័យ។
កាលពីម្សិលម៉ិញ បណ្ដាជនថៃប្រមាណជិត១០០នាក់ បានប្រមូលគ្នាធ្វើបាតុកម្ម នៅខាងមុខស្ថានទូតកម្ពុជា ប្រចាំនៅរាជធានីបាងកក ដើម្បីទាមទារឲ្យអាជ្ញាធរកម្ពុជា បើកការស៊ើបអង្កេត អំពីករណីនេះ។
សកម្មជនប្រជាធិបតេយ្យ លោក វ៉ាន់ឆាឡឺម សាតស័ក្តិសិទ្ធ បាននិរទេសខ្លួន មករស់នៅក្នុងប្រទេសកម្ពុជា តាំងពីឆ្នាំ២០១៤។ លោកមានទំនាក់ទំនង យ៉ាងជិតស្និត ជាមួយរណសិរ្សរួបរួម ដើម្បីលទ្ធិប្រជាធិបតេយ្យ ប្រឆាំងនឹងរបបផ្តាច់ការ (The United Front for Democracy Against Dictatorship – UDD) ដែលគេស្គាល់ថា ជាក្រុមអាវក្រហមរបស់ប្រទេសថៃ។
ក្នុងរយៈពេល នៃការរស់នៅនិរទេសខ្លួន យុវជនអាយុ៣៧ឆ្នាំរូបនេះ នៅតែបន្តធ្វើការរិះគន់ ដោយមិនសំចៃមាត់ ទៅលើលោក ប្រាយុទ្ធ ចន្ទអស្ចារ្យ (Prayut Chan-O-Cha) ដែលជានាយករដ្ឋមន្ត្រីសព្វថ្ងៃ របស់ប្រទេសថៃ។ វីដេអូចុងក្រោយ របស់លោក វ៉ាន់ឆាឡឺម ធ្វើឡើងនៅថ្ងៃទី៣ ខែមិថុនា ក៏ជាការរិះគន់ ទៅលើអតីតមេទ័ពថៃរូបនេះ ដែលបានដឹកនាំធ្វើរដ្ឋប្រហារ កាលពីឆ្នាំ២០១៤នោះដែរ។
សាក្សីជាច្រើននាក់ បានអះអាងថា ហេតុការណ៍នៃ«ករណីចាប់ពង្រត់»នោះ កើតឡើងនៅវេលាម៉ោង ប្រមាណជាង៥ល្ងាច នៅថ្ងៃព្រហស្បត្តិ៍ ទី៤ ខែមិថុនា។ នៅខណៈលោក វ៉ាន់ឆាឡឺម សាតស័ក្តិសិទ្ធ ចុះមកទិញចំណីអាហារ នៅខាងមុខអាគារស្នាក់នៅរបស់លោក ក្រុមមនុស្សបិទមុខមួយក្រុម បានចុះពីរថយន្ដពណ៌ខ្មៅ និងបានចាប់ក្រៀក សកម្មជនរូបនេះ ដាក់ចូលក្នុងរថយន្ដ ហើយបើកចេញទៅបាត់ស្រមោល។
រូបភាពកាម៉េរាសុវត្ថិភាព បានបង្ហាញថា ភ្នាក់ងារសន្តិសុខខ្មែរពីរនាក់ មានបំណងចូលទៅធ្វើអន្តរាគម តែបានអាក់ខានវិញ ដោយទំនងជាខ្លាច ក្រុមជនបិទមុខទាំងនោះ ដែលប្រដាប់ដោយអាវុធ។
លោក «Andrew MacGregor Marshall» អ្នកសារព័ត៌មាន ជាតិអង់គ្លេស ដែលជំនាញខាងប្រមាញ់ព័ត៌មាន ចេញពីព្រះបរមរាជវាំងថៃ បានអះអាងថា គឺព្រះរាជាថៃផ្ទាល់តែម្ដង ជាអ្នកបញ្ជាឲ្យចាប់ពង្រត់ លោក វ៉ាន់ឆាឡឺម សាតស័ក្តិសិទ្ធ ហើយសកម្មជននយោបាយរូបនេះ ទំនងជាត្រូវបានសម្លាប់ភ្លាមៗ នៅក្រោយនាំខ្លួនចេញផុត ពីរាជធានីភ្នំពេញ។
អ្នកសារព័ត៌មានដ៏ល្បីខាងលើ បានអះអាងនៅលើទំព័រទ្វីសធើររបស់លោកថា៖
«សពលោក វ៉ាន់ឆាឡឺម សាតស័ក្តិសិទ្ធ ទំនងជាត្រូវបានកប់ នៅក្នុងតំបន់ដាច់ស្រយ៉ាលមួយ ក្នុងប្រទេសកម្ពុជា ឬក៏ត្រូវបានពន្លិច ចូលទៅបាតស្ទឹង ឬបាតបឹងណាមួយ នៅកម្ពុជា។»
យ៉ាងណា បើទោះជាដំណឹងខាងលើ ត្រូវបានបញ្ជាក់ ដោយសកម្មជនមួយចំនួន នៃអង្គការក្រៅរដ្ឋាភិបាលក្ដី ក៏គ្មានប្រភពផ្លូវការណាផ្សេង បានអះអាង ឬផ្ទៀងផ្ទាត់បន្ថែម ពីព័ត៌មានចាប់ពង្រត់ បញ្ជាដោយព្រះមហាក្សត្រថៃនេះទេ។
សារព័ត៌មាននានាក្នុងទ្វីបអ៊ឺរ៉ុប បានអះអាងថា ក្នុងអំឡុងពេល នៃការចាប់ពង្រត់សកម្មជន នៅរាជធានីភ្នំពេញ ព្រះមហាក្សត្រថៃ កំពុងគង់ប្រថាប់ នៅក្នុងសណ្ឋាគារ «Waldegg» នៃក្រុង «Engelberg» (ភាគកណ្ដាលប្រទេសស្វីស) ជាមួយព្រះជាយាទ្រង់ គឺព្រះនាង សុធីតា (Suthida) ដើម្បីប្រារព្ធពិធីបុណ្យចម្រើនព្រះជន្ម ថ្វាយព្រះនាង នៅទីនោះ៕
