ប្រតិកម្មបានផ្ទុះឡើង នៅពេញផ្ទៃប្រទេសបារាំង ក្នុងថ្ងៃអាទិត្យនេះ ដើម្បីឧទ្ទិសដល់គ្រូបង្រៀនមួយរូប ដែលត្រូវបាន«កាត់ក» ដោយភេរវជន កាលពីថ្ងៃសុក្រ និងបង្ហាញពីការរួបរួម នៃប្រជាជាតិមួយ ដើម្បីប្រឆាំងនឹងទង្វើព្រៃផ្សៃ ជាពិសេសប្រឆាំង នឹងភាពជ្រុលនិយម នៃក្រុមអ្នកកាន់សាសនាអ៊ីស្លាម។
ពលរដ្ឋ រួមនឹងមេដឹកនាំនយោបាយ បានប្រមូលគ្នា ជួបជុំនៅតាមទីធ្លាធំៗ នៃក្រុងសំខាន់ៗ ក្នុងប្រទេសបារាំង ដើម្បីបញ្ជូនសារចម្រុះ ដូចជា «កុំផ្ដាច់ការនិយម ចំពោះការគិត» «ខ្ញុំជាសាស្ត្រាចារ្យ» «ខ្ញុំជា Samuel» «សេរីភាពនៃការបញ្ចេញមតិ គឺសេរីភាពនៃការបង្រៀន»។ល។
លោក សាមូអែល ប៉ាទី (Samuel Paty) គ្រូបង្រៀន«ភូមិសាស្ត្រ-ប្រវត្តិវិជ្ជា» ថ្នាក់ទី៤ នៃអនុវិទ្យាល័យក្រុង «Conflans-Sainte-Honorine» ត្រូវបានសម្លាប់ ដោយ«កាត់ក» កាលពីថ្ងៃសុក្រ បន្ទាប់ពីលោកបានបង្ហាញរូបត្លុក «មហាមេដ (Mahomet – ព្យាការីសាសនាអ៊ីស្លាម)» ទៅដល់កូនសិស្ស ក្នុងថ្នាក់របស់ខ្លួន កាលពីជាង១០ថ្ងៃមុន។
បើតាមលោក «Jean-François Ricard» រដ្ឋអាជ្ញានៃសាធារណរដ្ឋបារាំង ជំនាញខាងប្រឆាំងភេរវកម្ម បានឲ្យដឹងថា ជនដៃដល់អាយុ១៨ឆ្នាំ គឺជាជនអន្តោប្រវេស កើតនៅរដ្ឋធានីម៉ូស្គូ មានសញ្ជាតិរ៉ុស្ស៊ី និងមានដើមកំណើត ឆេកឆិន។ ជននេះត្រូវបានក្រុមនគរបាលបាញ់សម្លាប់ នៅល្ងាចថ្ងៃសុក្រដដែល។
មេដឹកនាំនយោបាយសំខាន់ៗ មានវត្តមាន នៅក្នុងបាតុកម្មកណ្ដាលរដ្ឋធានីប៉ារីស រួមមាននាយករដ្ឋមន្ត្រី លោក ហ្សង់ កាស្ដិក (Jean Castex) អភិបាលរដ្ឋធានីប៉ារីស អ្នកស្រី «Anne Hidalgo» ប្រធានក្រុមប្រឹក្សាតំបន់ «Ile-de-France» អ្នកស្រី «Valérie Pécresse» និងប្រធានគណបក្សឆ្វេងនិយមជ្រុល លោក «Jean-Luc Mélenchon» ជាដើម។
ពលរដ្ឋជាគ្រូបង្រៀនម្នាក់ ដែលចូលរួមនៅក្នុងបាតុកម្មនោះ បានថ្លែងថា៖
«ខ្ញុំមានវត្តមាន នៅទីនេះ ក្នុងនាមជាសាស្ត្រាចារ្យ ក្នុងនាមជាម្ដាយ ជាពលរដ្ឋបារាំង និងជាអ្នកសាធារណរដ្ឋនិយម។»
ស្ត្រីម្នាក់ទៀត ជាមន្ត្រីសង្គមកិច្ច បានថ្លែងដែរថា៖
«មិនត្រូវឲ្យអំពើហិង្សាបែបនេះ កើតមានជាបន្តបន្ទាប់ និងក្លាយជារឿងប្រចាំថ្ងៃ ឬក្លាយជាទម្លាប់នោះដែរ៕»
