នៅប្រទេសឥណ្ឌា បុរសអ្នកមានប្រាក់ម្នាក់ ត្រូវបានតុលាការផ្ដន្ទាទោស ឲ្យបន្តរស់នៅក្នុងពន្ធនាគារ រហូតដល់ថ្ងៃស្លាប់។ បុរសអាយុ៣៨ឆ្នាំ ដែលជាអ្នកជំនួញខាងត្បូងពេជ្រ ត្រូវបានតុលាការរកឃើញថា ជាអ្នកទទួលខុសត្រូវ ក្នុងការប្រកាសអាសន្នមិនពិតមួយ ដែលថាមានចោរប្លន់យន្ដហោះ។ ទង្វើនេះ ធ្វើឡើងព្រោះមូលហេតុ«ស្នេហ៍អូន»។
គេត្រូវវិលត្រឡប់ ទៅអំឡុងឆ្នាំ២០១៧ ដើម្បីដឹងពីរឿងដ៏អស្ចារ្យនេះ ឡើងវិញ។ គឺអាជ្ញាធរបានរកឃើញថា បុរសអ្នកមានខាងលើ បានចូលទៅសរសេរការប្រកាសអាសន្នមួយ នៅក្នុងបន្ទប់ទឹក នៃយន្ដហោះរបស់ក្រុមហ៊ុន «Jet Airways» ដែលភ្ជាប់ជើងហោះហើរ នៅក្នុងស្រុក។
ការប្រកាសអាសន្ននោះ អះអាងថា មានចោរ១២នាក់ នៅក្នុងយន្ដហោះ ហើយទាមទារឲ្យយន្ដហោះ ត្រូវបើកបង្ហោះទៅចុះចត នៅប្រទេសប៉ាគីស្ដង់ ដែលនៅជាប់ព្រំដែនឥណ្ឌា។
បន្ទាប់ពីអាជ្ញាធរ បានវែកមុខឃើញរួច បុរសអ្នកលក់ត្បូងពេជ្រ បានឆ្លើយសារភាពថា ទង្វើរបស់ខ្លួន មានបំណងឲ្យក្រុមអាកាសចរណ៍ខាងលើ ឆាប់ក្ស័យធន់ ខណៈក្រុមហ៊ុនមួយនេះ កំពុងជួបបញ្ហាផ្នែកហិរញ្ញវត្ថុស្រាប់។
អាជ្ញាធរបានរកឃើញទៀតថា បុរសរូបនេះធ្លាប់បានយកសត្វកន្លាត ដាក់ចូលក្នុងចានអាហារខ្លួនឯង នៅពេលខ្លួនជិះយន្ដហោះ របស់ក្រុមហ៊ុនអាកាសចរណ៍ដដែល កាលពីពេលមុន។
ប៉ុន្តែហេតុអ្វីក៏ចង់ឲ្យក្រុមហ៊ុនខាងលើ ក្ស័យធន់?
គឺមិនមែនដើម្បីចង់ទិញក្រុមហ៊ុននេះ យកមកគ្រប់គ្រងទេ តែបុរសរូបនេះចង់ឲ្យ «ស្ត្រីម្នាក់» ដែលខ្លួនលង់ស្នេហ៍ អស់ការងារធ្វើ នឹងអាលខ្លួនអាចផ្ដល់ការងារថ្មី ឲ្យរូបនាង។ ស្ត្រីរូបនោះ ជាអ្នកបម្រើការលើយន្ដហោះ របស់ក្រុមហ៊ុនខាងលើ ហើយនាងបានបដិសេធ មិនលាឈប់ពីការងារ (ជាអ្នកបម្រើការលើយន្ដហោះ) របស់នាងនេះឡើយ។
តាមច្បាប់ថ្មី ទាក់ទងនឹងវិស័យអាកាសចរណ៍ តុលាការរបស់ប្រទេសឥណ្ឌា បានសម្រេចកាលពីថ្ងៃព្រហស្បត្តិ៍សប្ដាហ៍នេះ ផ្ដន្ទាទោសបុរសអ្នកមានប្រាក់ និងជាម្ចាស់កំពូលស្នេហ៍ ឲ្យជាប់ក្នុងពន្ធនាគារ អស់មួយជីវិត និងពិន័យជាប្រាក់ អស់ជាច្រើនលានរូពីទៀត៕
