អាយុ១៨ឆ្នាំ រងពិការភាពមិនស្លាប់មិនរស់ ព្រោះការវះកាត់ពង្រីកសុដន់
យុវតីស្រស់សោភាម្នាក់ បានធ្លាក់ខ្លួន រងពិការភាពមិនស្លាប់មិនរស់ ត្រូវការសង្គ្រោះបន្ទាន់ នៅក្នុងមន្ទីរពេទ្យ បន្ទាប់ពីរូបនាង បានចូលទៅឲ្យគ្លីនិកមួយ ធ្វើការវះកាត់ពង្រីកសុដន់។ រឿងរ៉ាវនេះ បានឈានទៅដល់ ដំណាក់កាលស្វែងរកយុត្តិធម៌ ពីសំណាក់ក្រុមគ្រួសាររបស់នាង នៅក្នុងតុលាការអាមេរិក ប្រឆាំងនឹងគ្លីនិកខាងលើ។
យុវតី អ៊ីម៉ាលីន ង្វៀន (Emmalyn Nguyen) អាយុ១៨ឆ្នាំ ដែលមានដើមកំណើតវៀតណាម បានចំណាយប្រាក់សន្សំរបស់នាង ប្រមាណជា៦០០០ដុល្លារ ដើម្បីឲ្យបំណង នៃការពង្រីកសុដន់ ក្លាយជាការពិត។ នោះគឺការវះកាត់កែសម្ផស្ស ពង្រីកទំហំសុដន់ នៅក្នុងគ្លីនិក នៅជិតផ្ទះរបស់នាង ក្នុងរដ្ឋកូឡូរ៉ាដូ (Colorado – ភាគកណ្ដាល-ខាងលិច សហរដ្ឋអាមេរិក)។
ប៉ុន្តែ នៅក្នុងដំណើរការវះកាត់នោះ នាង ង្វៀន បានរងអាការៈគាំងបេះដូង ចំនួនពីរដង ហើយក្រុមគ្រូពេទ្យ នៅក្នុងគ្លីនិក មិនបានហៅរកការជួយសង្គ្រោះបន្ទាន់ និងភ្លាមៗ ពីមន្ទីរពេទ្យធំនោះទេ។ ពួកគេបានទាក់ទង ទូរស័ព្ទទៅស្វែងរកការសង្គ្រោះ តែនៅរយៈពេល ៥ម៉ោងក្រោយ បន្ទាប់ពីភាពមិនប្រក្រតីនេះ កើតឡើងជាលើកដំបូង។
ហេតុការណ៍ បានកើតឡើងតាំងដើមខែសីហា ឆ្នាំ២០១៩ ហើយត្រូវបានសារព័ត៌មាន ជាច្រើននៅសហរដ្ឋអាមេរិក យកមកចុះផ្សាយព្រោងព្រាត នៅចុងឆ្នាំនេះ ជាពិសេសបន្ទាប់ពីក្ដីក្ដាំ រវាងក្រុមគ្រួសារយុវតីរងគ្រោះ និងគ្លីនិក កំពុងស្វែងរកពន្លឺ នៃការពិត។
សារព័ត៌មានបានរាយការណ៍ថា បន្ទាប់ពីត្រូវបានដាក់ចូល ក្នុងបន្ទប់វះកាត់រួច នាង ង្វៀន បានទទួលការចាក់ថ្នាំសន្លប់ ជាលើកទីមួយ។ បន្ទាប់មក រូបនាងត្រូវបានក្រុមគ្រូពេទ្យ ទុកចោលមិនយកចិត្តទុកដាក់ អស់រយៈពេល១៥នាទី ខណៈបេះដូងនាង បានផ្អាកដំណើរការ។
មុខប្រែពណ៌ខៀវ រងពិការភាពមិនស្លាប់មិនរស់
រហូតលុះត្រា ស្ត្រីអ្នកថែរក្សាជំងឺម្នាក់ បានមើលឃើញពីអាការៈនេះ ទើបក្រុមគ្រូពេទ្យ នៅក្នុងគ្លីនិក ស្ទុះស្ទារប្រើម៉ាស៊ីន ធ្វើចលនាបេះដូង ដើម្បីឲ្យយុវតី ដឹងខ្លួនឡើងវិញ។ ក្នុងរយៈពេលនោះ ផ្ទៃមុខរបស់នាង ង្វៀន បានប្រែក្លាយជាមានពណ៌ខៀវ។
នៅទីបំផុត គ្រូពេទ្យជំនាញ ខាងសង្គ្រោះបន្ទាន់ បានធ្វើអន្តរាគមន៍ បន្ទាប់ពីទទួលទូរស័ព្ទពីគ្លីនិក នៅ៥ម៉ោងក្រោយមក។ ៥ម៉ោង ដែលគ្រប់គ្រាន់ធ្វើឲ្យយុវតី ធ្លាក់ក្នុងអាការៈ «ខូចប្រព័ន្ធខួរក្បាល» ដ៏ធ្ងន់ធ្ងរ និងមិនអាចព្យាបាលបាន។ ហើយពីពេលនោះមក នាង ង្វៀន បានស្ថិតក្នុងសភាព «មិនស្លាប់មិនរស់» និងរស់បានដោយសារ តែការបន្តក់អាហារសិប្បនិមិត្តប៉ុណ្ណោះ។
អ្នកស្រី លីន ហ្វាំ (Lynn Fam) ម្ដាយយុវតីរងគ្រោះ ត្រូវបានស្រង់សំដី មកបញ្ជាក់ថា៖
«យើងគ្រាន់តែចង់ដឹង ថាតើមានរឿងអ្វីកើតឡើង នៅពេលនោះ ក្នុងគ្លីនិក។ ខ្ញុំបានយល់ព្រម ឲ្យកូនខ្ញុំធ្វើតាមបំណងរបស់នាង (ការវះកាត់ពង្រីកសុដន់) ព្រោះខ្ញុំក៏បានឆ្លងកាត់ តាមវ័យដូចគ្នានេះដែរ តែយើងមិនគិតដល់សោះឡើយ ថាគ្រោះដ៏អាក្រក់ បានកើតឡើង ចំពោះកូនខ្ញុំអញ្ចឹងទេ។»
អ្នកស្រីបន្តថា៖
«រាងកាយស្ដូងស្ដឹងរបស់នាង នៅហ្នឹងមែនហើយ តែនាងមិនបាននៅ ជាមួយពួកយើងទៀតឡើយ។ និយាយទៅ ដូចជាយើងបានបាត់ កូនស្រីរបស់យើង រួចជាស្រេច។»
នៅក្នុងដំណាក់កាល នៃការប្ដឹងផ្ដល់ និងនៅខណៈតុលាការ នៅមិនទាន់បានកាត់សេចក្ដីនេះ គ្រូពេទ្យនៃគ្លីនិកខាងលើ នៅតែបន្តអាជីពរបស់ខ្លួន ជាអ្នកវះកាត់កែសម្ផស្ស បាននៅឡើយ។ ប៉ុន្តែក្រុមគ្រួសារនាង ង្វៀន បានអះអាងបន្ថែមថា បានប្ដឹងស្នើឲ្យតុលាការ បញ្ឈប់អាជីពរបស់គ្រូពេទ្យរូបនោះ ដើម្បីកុំឲ្យហេតុការណ៍របៀបនេះ កើតមានទៅលើជនរងគ្រោះដទៃទៀត នាពេលអានាគត៕
