ប្រទេសចិនបានរំពឹងថា ដល់ពេលវេលា ដែលប្រទេសភូមា ត្រូវចាប់ផ្ដើម កាត់បន្ថយអំពើហិង្សា និងជាពេលវេលា ដែលវិលមករកកិច្ចសន្ទនា។ នេះ បើតាមលោក ហ្សាង ជុង (Zhang Jun) ឯកអគ្គរដ្ឋទូតចិន ប្រចាំអង្គការសហប្រជាជាតិ ដែលបានបញ្ចេញសំឡេង តាមរយៈសេចក្ដីប្រកាសព័ត៌មានមួយ ចេញផ្សាយក្នុងថ្ងៃពុធ ទី១០ ខែមីនា ឆ្នាំ២០២១។
លោកឯកអគ្គរដ្ឋទូតបានបញ្ជាក់ថា៖
«ជាពេលវេលា ដែលត្រូវធ្វើសកម្មភាពការទូត។ ប្រទេសចិនបានចូលរួម នៅក្នុងកិច្ចចរចា នៅក្រុមប្រឹក្សាសន្តិសុខ ក្នុងរយៈពេល៦ថ្ងៃ ដែលស្នើឡើងដោយចក្រភពអង់គ្លេស ដើម្បីសម្រេចបាននូវសេចក្ដីប្រកាសមួយនេះ ដែលប្រកបដោយស្ថាបនា។»
មន្ត្រីទូតចិនដដែល បានបន្តទៀតថា៖
«ជារឿងសំខាន់ណាស់ ដែលសមាជិកនៃក្រុមប្រឹក្សា គួរនិយាយក្នុងសំឡេងតែមួយ។ យើងសង្ឃឹមថា សាររបស់ក្រុមប្រឹក្សាសន្ដិសុខ ទំនងជានឹងធ្វើឱ្យប្រសើរឡើង នូវស្ថានភាពនៅក្នុងប្រទេសភូមា។»
«សហគមន៍អន្តរជាតិ គួរតែបង្កើតបរិយាកាសអំណោយផល សម្រាប់ភាគីពាក់ព័ន្ធទាំងអស់ នៅក្នុងប្រទេសភូមា ដើម្បីឲ្យពួកគេដោះស្រាយជម្លោះ នៅក្នុងក្របខ័ណ្ឌរដ្ឋធម្មនុញ្ញ និងក្របខ័ណ្ឌនៃច្បាប់៕»
