រដ្ឋបាលរបស់ប្រធានាធិបតីអាមេរិក បានអះអាងក្នុងថ្ងៃអាទិត្យនេះថា យោធាភូមាបានប្រពឹត្តឧក្រិដ្ឋកម្ម«ប្រល័យពូជសាសន៍» និងឧក្រិដ្ឋកម្ម«ប្រឆាំងមនុស្សជាតិ»ធ្ងន់ធ្ងរ ប្រឆាំងបណ្ដាជនភាគតិច រ៉ូហ៊ីងយ៉ា ដែលរស់នៅក្នុងខេត្តមួយ ស្ថិតនៅភាគខាងលិចប្រទេស។ សំណុំរឿងឧក្រិដ្ឋកម្មនេះ ត្រូវបានដាក់ឡើង ទៅកាន់តុលាការយុត្តិធម៌អន្តរជាតិ (ICJ) នៅក្រុងឡាអេ (ប្រទេសហូឡង់)។
បណ្ដាជនភាគតិចរ៉ូហ៊ីងយ៉ា រាប់ម៉ឺនសែននាក់ បានភៀសខ្លួនចេញពីប្រទេសភូមា ចាប់ពីឆ្នាំ២០១៧មក បន្ទាប់ពីពួកគេបានរងគ្រោះ ជាបន្តបន្ទាប់នូវការបង្ក្រាបយ៉ាងរង្គាល ពីសំណាក់កងកម្លាំងយោធា នៃប្រទេសនេះ។
របាយការណ៍របស់អង្គការសហប្រជាជាតិ បានឲ្យដឹងថា គ្រាន់តែនៅក្នុងប្រទេសបង់ក្លាដេសមួយ បណ្ដាជនរ៉ូហ៊ីងយ៉ាមានចំនួន ដល់ទៅជាង៨៥ម៉ឺននាក់ បានភៀសខ្លួន ទៅកាន់ជំរុំជនភៀសខ្លួននៅទីនោះ ខណៈជនជាតិរ៉ូហ៊ីងយ៉ា ប្រមាណជាង៦០ម៉ឺននាក់ទៀត កំពុងនៅជាប់គាំងក្នុងរដ្ឋ «Rakhine» ដែលកំពុងរងការគាបសង្កត់យ៉ាងខ្លាំង ពីយោធាភូមា។
ថ្លែងក្នុងការតាំងពិព័ណ៌ «វិថីរបស់ភូមា ឆ្ពោះទៅរកឧក្រិដ្ឋកម្មប្រល័យពូជសាសន៍» ក្នុងសារមន្ទីរ «Holocaust Memorial» (រដ្ឋធានីវ៉ាស៊ីនតោន) នៅថ្ងៃអាទិត្យទី២១ ខែមីនា រដ្ឋមន្រ្តីការបរទេសអាមេរិក លោក អាន់តូនី ប្លិងខិន (Antony Blinken) បានប្រកាសថា យោធាភូមាបានប្រព្រឹត្តឧក្រិដ្ឋកម្ម«ប្រល័យពូជសាសន៍» និងឧក្រិដ្ឋកម្ម«ប្រឆាំងមនុស្សជាតិ» ប្រឆាំងនឹងជនជាតិរ៉ូហ៊ីងយ៉ា ហើយចេតនាពិតរបស់យោធាភូមា គឺហួសពីការបណ្ដេញជនជាតិភាគតិច តែជាការព្យាយាមកម្ទេចជាតិសាសន៍រ៉ូហ៊ីងយ៉ា ចោលតែម្តង។
លោក ប្លិងខិន ថ្លែងនៅក្នុងសុន្ទរកថារបស់លោកថា៖
«ការបង្ក្រាបទៅលើជនជាតិរ៉ូហ៊ីងយ៉ា បានរីករាលដាល និងមានលក្ខណៈជាប្រព័ន្ធ។ នេះជាចំណុចសំខាន់ សម្រាប់ការកំណត់ អំពីឧក្រិដ្ឋកម្មប្រឆាំងមនុស្សជាតិ។»
របាយការណ៍មួយ ដែលចេញផ្សាយក្នុងឆ្នាំ២០១៨ ដោយក្រសួងបរទេសអាមេរិក និងដែលដកស្រង់ដោយបណ្ដាញទូរទស្សន៍ «CNN» បានបង្ហាញពីអំពើហិង្សា ប្រឆាំងនឹងជនជាតិភាគតិច រ៉ូហ៊ីងយ៉ា ដែលរបាយការណ៍បញ្ជាក់ថា មានលក្ខណៈ«ហួសនិស្ស័យ» «ជាប្រព័ន្ធ» និងមាន«ទិសដៅ ក្នុងការបំបាក់ស្មារតី ក៏ដូចជាទិសដៅ នៃការប្រមាញ់បណ្ដាជន រ៉ូហ៊ីងយ៉ា» ឲ្យផុតពូជសាសន៍។
ប្រសិនជាឧក្រិដ្ឋកម្មប្រល័យពូជសាសន៍ ត្រូវបានរកឃើញ ដោយតុលាការ«ICJ» ដែលជាស្ថាប័នយុត្តិធម៌ដ៏សំខាន់ របស់អង្គការសហប្រជាជាតិនោះ ប្រទេសភូមាអាចនឹងរងទណ្ឌកម្មធ្ងន់ធ្ងរផ្សេងទៀត បន្ថែមពីលើទណ្ឌកម្ម ដែលប្រទេសភូមាទទួលបាន មកទល់នឹងពេលនេះ៕
