កម្ពុជាដំណឹង

ឈុំ សុជាត ប្រដៅអ្នកសារព័ត៌មាន កុំ«បន្ទរ»តាមព័ត៌មានក្លែងក្លាយ

លោក ឈុំ សុជាតិ អ្នកនាំពាក្យក្រសួងការពារជាតិកម្ពុជា។ (រូបថតក្រសួងការពារជាតិ)
លោក ឈុំ សុជាតិ អ្នកនាំពាក្យក្រសួងការពារជាតិកម្ពុជា។ (រូបថតក្រសួងការពារជាតិ)

ក្នុងឋានៈជាអ្នកនាំពាក្យក្រសួងការពារជាតិ លោក ឈុំ សុជាត កំពុងតាំងខ្លួន ជាអ្នកប្រដៅអ្នកសារព័ត៌មាន ថាកុំចេះតែចុះផ្សាយ «បន្ទរ»​តាមព័ត៌មានក្លែងក្លាយ ដែលធ្វើឲ្យខុស​«វិជ្ជាជីវៈ»​របស់ខ្លួន។

ក្នុងសន្និសីទសារព័ត៌មាន កាលពីព្រឹកថ្ងៃព្រហស្បត្តិ៍ ទី២៥ ខែកក្កដានេះ នៅសាលប្រជុំនៃទីស្តីការគណៈរដ្ឋមន្ត្រី លោក ឈុំ សុជាត បាននិយាយរំឭកឡើងវិញ អំពីការចុះផ្សាយ របស់សារព័ត៌មាន «The Wall Street Journal» ដ៏ល្បី​របស់អាមេរិក ជុំវិញ«កិច្ចព្រមព្រៀងសម្ងាត់» រវាងកម្ពុជា-ចិន អនុញ្ញាតឲ្យចិន ប្រើប្រាស់មូលដ្ឋានកងទ័ពជើងទឹករបស់កម្ពុជា នៅ«រាម» ខេត្តព្រះសីហនុ។

នៅក្នុងសន្និសីទនោះ លោកបានអះអាងជាថ្មីថា កម្ពុជាមិនមានកិច្ចព្រមព្រៀងណាមួយ ជាមួយចិន ឱ្យមានមូលដ្ឋានកងទ័ពចិន នៅលើទឹកដីកម្ពុជា ដូចការចុះផ្សាយនោះឡើយ។ លោកបានបន្ទោស ការផ្សព្វផ្សាយរបស់សារព័ត៌មានខាងលើ រួមនឹងសារព័ត៌មានផ្សេង ដែលបានស្រង់យកមកផ្សាយបន្តនោះ ថាជាការផ្សាយ​«ព័ត៌មានក្លែងក្លាយ (Fake News)» ដែលគ្មានវិជ្ជាជីវៈ ដែលហាក់មានចេតនាបំផ្លាញ ដល់សន្តិសុខរបស់កម្ពុជា និងអធិបតេយ្យភាព​របស់កម្ពុជា។

លោក ឈុំ សុជាត បានទាមទារ​ឲ្យ​«ក្រុម»​ដែល​«បំភ្លៃព័ត៌មាន» អំពីមូលដ្ឋានទ័ពបរទេស នៅកម្ពុជានោះ គួរតែបញ្ឈប់​«ប្រតិដ្ឋ»​រឿងនេះតទៅទៀត។ បន្ទាប់មក លោកបានតាំងខ្លួន ជាអ្នកប្រដែប្រដៅ ទៅកាន់អ្នកសារព័ត៌មានថា៖

«ហើយសារព័ត៌មានទាំងអស់ ក៏មិនត្រូវ”បន្ទរ” តាមព័ត៌មានក្លែងក្លាយ ដែលធ្វើឱ្យខុសវិជ្ជាជីវៈរបស់ខ្លួននោះដែរ។»

បើតាមទិន្នន័យ ដែលទស្សនាវដ្ដីមនោរម្យ.អាំងហ្វូ បានចូលទៅពិគ្រោះ បានឲ្យដឹងថា សារព័ត៌មាន «The Wall Street Journal» ដែលបង្កើតឡើងតាំងពីឆ្នាំ ១៨៨៩ គឺជាកាសែតបោះពុម្ភ​ចេញផ្សាយប្រចាំថ្ងៃ ដែលលក់ដាច់ជាងគេ នៅលើពិភពលោក។

ក្នុងសហរដ្ឋអាមេរិក រាប់ពីខែតុលា ឆ្នាំ២០០៩មក សារព័ត៌មានមួយនេះ ដែលមានទីតាំងនៅក្រុងញ៉ូយក មានអតិថិជនជាវមកអាន ច្រើនជាង​សារព័ត៌មាន ដ៏មានប្រជាប្រិយមួយទៀត ហៅថា «USA Today» នោះផងទៀត។

កាលពីដើមសប្ដាហ៍នេះ រដ្ឋមន្ត្រីការពារជាតិកម្ពុជា លោក ទៀ បាញ់ បានអះអាងថា រដ្ឋាភិបាលក្រុងភ្នំពេញ មិនមានគម្រោងប្ដឹង សារព័ត៌មានខាងលើ ឬចង់ឲ្យសារព័ត៌មាននេះ ចុះផ្សាយកែតម្រូវឡើងវិញ ទាក់ទងនឹង​«កិច្ចព្រមព្រៀង​សម្ងាត់»​នោះទេ៕



You may also like

ដំណឹង

ខ្មាន់កាំភ្លើង​នៅ​តិចសាស់ អាចនឹង​ទទួលទោស​«ប្រហារជីវិត»

ខ្មាន់កាំភ្លើង ដែលបានបាញ់ប្រហារ ក្នុងផ្សារទំនើប នៃក្រុង «El Paso» រដ្ឋតិចសាស់ សហរដ្ឋអាមេរិក និងដែលបណ្ដាលឲ្យមនុស្សស្លាប់ ២០នាក់ របួស១៦នាក់ កាលពីព្រឹកថ្ងៃសៅរ៍ ត្រូវបានចោទប្រកាន់ ...
កម្ពុជា

ស្ថានទូតអាមេរិក បន្តប្រាប់​​ក្រុងភ្នំពេញ​ឲ្យដោះស្រាយ​ករណី កឹម សុខា

ស្ថានទូតអាមេរិក ប្រចាំក្នុងរាជធានីភ្នំពេញ បានបន្តគម្រាមរបបក្រុងភ្នំពេញ ឲ្យដោះស្រាយករណីលោក កឹម សុខា ប្រធានគណបក្សសង្គ្រោះជាតិ ដោយភាពត្រឹមត្រូវ និងការគោរព បើសិនជារបបគ្រប់គ្រងមួយនេះ ចង់មានទំនាក់ទំនងល្អ ជាសហរដ្ឋ​អាមេរិក។ អ្នកស្រី​ ...
ដំណឹង

បោះឆ្នោត​ថៃ៖ អាមេរិក​សាទរ​«សញ្ញាវិជ្ជមាន»​នៃ​ដំណើរការ​ប្រជាធិបតេយ្យ

សហរដ្ឋអាមេរិកបានសំដែងការសាទររបស់ខ្លួន នៅថ្ងៃអង្គារនេះ ចំពោះការបោះឆ្នោតជាតិ នៅក្នុងប្រទេសថៃ ថាជា«សញ្ញាវិជ្ជមាន» ដើម្បីការវិលត្រឡប់ ទៅរករដ្ឋាភិបាលមួយ តាមបែបប្រជាធិបតេយ្យវិញ។ យ៉ាងណា ក្រុមគណបក្សប្រឆាំង បានលើកឡើងថា ការបោះឆ្នោតកាលពីថ្ងៃអាទិត្យ មានជាប់ដិតដាម ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...