អំពីអារម្មណ៍ធុញថប់របស់ស្ត្រី ៖ វាអាចជារឿងធម្មតា ដែលស្ត្រីជាទូទៅរវល់ជាង និងមានភាពតានតឹង ច្រើនជាងបុរស។ កាលសម័យបុរាណ ស្រ្តីបានត្រឹមតែនៅផ្ទះ ទទួលខុសត្រូវ លើការងារផ្ទះតែប៉ុណ្ណោះ តែបច្ចុប្បន្ន ស្រ្តីក្រៅពីធ្វើការងារផ្ទះហើយ ក៏នៅចេញទៅធ្វើការងារ រកប្រាក់កម្រៃនៅខាងក្រៅទៀត។ ប្រហែលជាដោយសារតែរឿងនេះ ទើបស្ត្រីត្រូវបានគេមើលឃើញថា ជាទូទៅមានភាពតានតឹង ច្រើនជាងបុរស។ ប៉ុន្តែតើការយល់ឃើញនេះ ជាការពិតយ៉ាងដូចម្តេច?
ក្រុមអ្នកស្រាវជ្រាវ មកពី «University of Arizona’s School of Family» និង «Consumer Resources» បានសម្រេចចិត្ត ស្វែងរកទិន្នន័យមួយ។ ពួកគេបានយកចំនួនគូស្វាមីភរិយា ១៦៦គូ និងអ្នកចូលរួមម្នាក់ៗ ត្រូវរក្សាទុក នូវកំណត់ហេតុប្រចាំថ្ងៃ ក្នុងរយៈពេល ៤២ថ្ងៃ ដែលពួកគេបានកត់ត្រា ពីភាពតានតឹងប្រចាំថ្ងៃរបស់ពួកគេ។ លទ្ធផលបានបង្ហាញយ៉ាងពិតប្រាកដថា ស្ត្រីបានរាយការណ៍ អំពីចំនួននៃ “ភាពធុញថប់ខ្ពស់” និងថ្ងៃដែលគ្មានទុក្ខព្រួយ តិចជាងបុរស។
នេះ បង្ហាញពីគន្លឹះសំខាន់ៗមួយចំនួន ទាក់ទងនឹងស្ត្រី និងភាពតានតឹង ដែលស្ត្រីត្រូវយល់ដឹង:
ថែទាំរាងកាយរបស់អ្នក
មនុស្សស្រីជារឿយៗ គឺពូកែខ្វល់ពីអ្នកដទៃ ដូចជាខ្វល់ពីគ្រួសារ កូន ប្តី មិត្តភក្តិ ប៉ុន្តែភ្លេចខ្វល់ខ្លួនឯង។ ជាការពិតណាស់ ភាពតានតឹងចិត្ត ពិតជាបង្កឱ្យមានផលប៉ះពាល់ ដល់រាងកាយ។ ដូច្នេះ ស្រ្តីទាំងឡាយ ត្រូវដោះស្រាយ ជាមួយបញ្ហាស្រ្តេស ដើម្បីជួយផ្តល់ថាមពល ដល់រាងកាយរបស់ខ្លួន តាមរយៈការហាត់ប្រាណ ស្ប៉ា ការញ៉ាំអាហារដែលមានជីជាតិ និងគេងឱ្យបានគ្រប់គ្រាន់ ដើម្បីសុខភាព និងសម្រស់។ ទោះបីជាយ៉ាងណាក៏ដោយ កុំប្រើប្រាស់វិធីអវិជ្ជមាន មកដោះស្រាយ ជាមួយភាពតានតឹងរបស់អ្នក ដោយបណ្តោយឱ្យខ្លួន ធ្វើសកម្មភាពដែលប៉ះពាល់ ដល់សុខភាព ឬបំផ្លាញខ្លួនឯង និងអ្នកដទៃ។
ផ្លាស់ប្តូររបៀបនៃការគិត
កម្រិតនៃភាពតានតឹងចិត្តរបស់អ្នក ឡើង ឬចុះ ខ្ពស់ ឬទាប អាស្រ័យលើរបៀប នៃការគិតរបស់អ្នក។ ការផ្លាស់ប្តូររបៀប ដែលអ្នកកំណត់នូវហេតុការណ៍អ្វីមួយ ថាជាភាពតានតឹង ដោយងាកមកគិតជាថ្មី មកវិញថា វាមិនមែនជាការគំរាមកំហែង តែជាការដែលត្រូវខំប្រឹងប្រែង ឬវាមិនមែនជាវិបត្តិទេ តែជាឱកាសសម្រាប់អភិវឌ្ឍខ្លួន នោះអាចធ្វើឱ្យអ្នកមានអារម្មណ៍ថា មានការគំរាមកំហែង និងភាពតានតឹងចិត្ត តិចជាងមុន។ នៅពេលដែលអ្នកមិនយល់ឃើញថា ស្ថានភាពមួយជាការគំរាមកំហែង នោះភាពតានតឹងចិត្ត ក៏មិនអាចកើតមាន ចំពោះអ្នកបានដែរ។ ការគិតវិជ្ជមានបានច្រើន នឹងជួយអ្នកឱ្យមានភាពរីករាយ ច្រើនទៅតាមនោះដែរ។
ចំណាយពេលសម្រាប់ខ្លួនឯង
វាជាការសំខាន់ សម្រាប់ស្រ្តីគ្រប់រូប រួមទាំងអ្នកម្តាយផងដែរ ក្នុងការធ្វើកិច្ចការខ្លះ សម្រាប់ខ្លួនឯង បើមិនអ៊ីចឹងទេ អ្នកប្រាកដជាប្រឈមមុខ នឹងអារម្មណ៍ធុញថប់។ ការចេះគ្រប់គ្រងភាពតានតឹងចិត្ត គឺការដកខ្លួនចេញ ពីសម្ពាធផ្សេងៗ ភាពរវល់ ហើយប្រើពេលវេលាខ្លះ ដើម្បីធ្វើរឿងដែលធ្វើឱ្យខ្លួនឯងសប្បាយចិត្ត ដូចជាស្តាប់ចម្រៀង ដែលខ្លួនឯងចូលចិត្ត ទៅកន្លែងដែលខ្លួនចូលចិត្ត ហែលទឹក ឬការកម្សាន្តផ្សេងៗ។ ទន្ទឹមនឹងនេះដែរ ប្រសិនបើអ្នករកឃើញថា ខ្លួនឯងតែងឆ្លើយ “ចាស” ឬ “អូខេ” ទៅគ្រប់កិច្ចការទាំងឡាយ ជាច្រើន ដូច្នេះ អ្នកគួររៀននិយាយថា “ទេ” ខ្លះហើយ ដើម្បីដកឃ្លាពីភាពតានតឹងខ្លះ។
