ជីវិតប្រចាំថ្ងៃវប្បធម៌ និងជីវិត

ហេតុអ្វីបានជា​អ្នក​លេង​ហ្វ៊េសប៊ុក​មួយ​ចំនួន​ចូល​ចិត្ត​បង្ហោះ​រឿងរ៉ាវ​ផ្ទាល់​ខ្លួន?

បច្ចុប្បន្ន Facebook គឺជាបណ្តាញសង្គមដ៏ធំទូលាយមួយ ដែលមនុស្សរាប់លាននាក់ទូទាំងពិភពលោកកំពុងប្រើប្រាស់យ៉ាងមានប្រជាប្រិយភាព។ ទោះបីជាយ៉ាងណាក៏ដោយ របៀបនៃកាប្រើហ្វ៊េសប៊ុក របស់បុគ្គលម្នាក់ៗមានលក្ខណៈខុសៗគ្នា។ អ្នកខ្លះ ប្រើប្រាស់បណ្តាញសង្គមមួយនេះ គ្រាន់តែជាការកម្សាន្ត បង្ហោះរូបភាពម្តងម្កាល តាមដានព័ត៌មាន លក់ផលិតផលតាមអនឡាញ ឬអ្នកខ្លះទៀត បង្ហោះពីបញ្ហាផ្ទាល់ខ្លួនជាសាធារណៈ។

ជាការពិតណាស់ ក្នុងជីវភាពប្រចាំថ្ងៃរបស់យើង មនុស្សគ្រប់រូបចៀសមិនផុតពីការជួបបញ្ហា ឬតានតឹងចិត្តនោះឡើយ។ ដោយសារតែភាគច្រើន មនុស្សចូលចិត្តលេងហ្វ៊េសប៊ុក ដូច្នេះ ពួកគេក៏ប្រើប្រាស់បណ្តាញមួយនេះ ជាកន្លែងសម្រាប់ចែកចាយអារម្មណ៍រំខានទាំងឡាយ។

ខាងក្រោមនេះ គឺជាមូលហេតុមួយចំនួនដែលនាំឱ្យអ្នកដែលលេងហ្វ៊េសប៊ុកចូលចិត្តបង្ហោះរឿងរ៉ាវផ្ទាល់ខ្លួន។

១. ជាមនុស្សឯកា

បុគ្គលខ្លះ គឺជាមនុស្សឯកា ចូលចិត្តនៅស្ងប់ស្ងាត់ រហូតដល់ពេលមានបញ្ហា គាត់ក៏ជ្រើសរើសយកការសរសេរពីអារម្មណ៍របស់ខ្លួននៅលើហ្វ៊េសប៊ុក ព្រោះគាត់មិនមែនជាមនុស្សដែលចូលចិត្តនិយាយរឿងក្នុងចិត្តប្រាប់មនុស្សជុំវិញខ្លួននោះទេ តែគាត់ច្រើនតែសរសេរបង្ហោះចោលមួយពេលៗទៅតាមភាពឡើងចុះនៃអារម្មណ៍របស់គាត់ ទោះបីមានឬគ្មានអ្នកណាចាប់អារម្មណ៍ពីអ្វីដែលគាត់បានសរសេរក៏ដោយ។

២. ចង់បន្ធូរអារម្មណ៍តានតឹង

បុគ្គលខ្លះយល់ថា ការបង្ហោះ Status អំពីអារម្មណ៍អាចសម្រួលភាពតានតឹងក្នុងចិត្តបានមួយគ្រាដែរ ជាជាងការបន្តលាក់រឿងសៅហ្មងទាំងនោះក្នុងចិត្ត ដែលវានឹងធ្វើឱ្យពួកគេនៅមិនសុខ ឬគេងមិនលក់ក៏ថាបាន។ គ្រាន់តែបង្ហោះរួច ក៏មានអារម្មណ៍ថាធូរ ដូចដកបន្លាចេញពីទ្រូង ឬយករឿងតានតឹងចេញពីចិត្តដូច្នេះដែរ។

៣. ចង់បញ្ឈឺមនុស្សដែលធ្វើឱ្យប៉ះពាល់អារម្មណ៍របស់ពួកគេ

ពេលខ្លះ ពួកគេគិតថា វាមិនទទួលបានអ្វីមកវិញនោះទេ ចំពោះការបង្ហោះពីអារម្មណ៍ ខឹងឬអន់ចិត្តចំពោះបុគ្គលណាម្នាក់ តែគាត់ចាំបាច់ត្រូវតែបង្ហោះពីបញ្ហាទាំងនោះដោយសារតែគាត់មានចេតនាបញ្ឈឺដល់អ្នកដែលធ្វើឱ្យប៉ះពាល់អារម្មណ៍របស់គាត់។ ឬពេលខ្លះទៀត គាត់មិនអាចតទល់ជាមួយបុគ្គលនោះដោយចំៗ ឬបើកចំហបាន ដូច្នេះគាត់សុខចិត្តវាយប្រហារគេដោយប្រយោលតាមរយៈពាក្យបញ្ឆិតបញ្ឆៀងដែលគាត់សរសេរបង្ហោះលើហ្វ៊េសប៊ុករបស់គាត់ និងមួយទៀតគាត់យល់ថា បុគ្គលនោះឃើញហើយ អាចនឹងខឹងចិត្ត ឬនៅមិនសុខ បើសិនបានឃើញអ្វីដែលគាត់បង្ហោះ។

ពេលខ្លះ ហ្វ៊េសប៊ុកក្លាយជាទីលាន សម្រាប់ភាគីពីរនាក់ ឬច្រើននាក់ ធ្វើសង្គ្រាមពាក្យសម្តីដាក់គ្នាទៅវិញទៅមក តាមរយៈការវាយប្រហារដោយការសរសេររិះគន់ ឬបង្ហោះពាក្យសម្តីជេរប្រមាថ ឬឌឺដងដាក់គ្នា។

៤. គ្មានមនុស្សដែលអាចពិគ្រោះជាមួយបាន

បុគ្គលមួយចំនួន យល់ថា គ្មាននរណាម្នាក់អាចជាមនុស្សដែលយល់ចិត្តគាត់ ឬអាចឱ្យគាត់ពិភាក្សាជាមួយបានទេ។ ដូច្នេះហើយ ទើបគាត់សុខចិត្តទម្លាយរឿងទាំងនោះឱ្យគេឯងបានដឹង ទោះបីជាដឹងថានឹងមានអ្នកពេបជ្រាយគាត់ក៏ដោយ តែគាត់ក៏នៅតែមានសង្ឃឹមថានឹងមានអ្នកផ្សេងទៀតសួរនាំពីគាត់ ចង់ដឹងសុខទុក្ខរបស់គាត់ផងដែរ ធ្វើឱ្យគាត់មានអារម្មណ៍ថា គាត់មិនឯកា។

៥. ចង់បានពាក្យលើកទឹកចិត្ត

ភាសាលើកទឹកចិត្ត ពាក្យផ្អែមពីរោះ គឺជាអ្វីដែលអ្នកកំពុងមានបញ្ហាស្មុគស្មាញក្នុងចិត្ត ត្រូវការជាចាំបាច់។ ដូច្នេះហើយ ទើបពួកគេជ្រើសរើសការបញ្ចេញអារម្មណ៍តាមរយៈហ្វ៊េសប៊ុក ដើម្បីទទួលបាននូវការលើកទឹកចិត្តពីមិត្តភក្តិផ្សេងទៀត ហើយក៏ជាកម្លាំងចិត្តមួយសម្រាប់គេផងដែរ។

៦. បង្ហោះឡើងក្លាយទម្លាប់

អ្នកខ្លះប្រហែលជាចូលចិត្តលេងហ្វ៊េសប៊ុករបស់ដល់ជក់ចិត្ត ដែលជំរុញឱ្យគាត់បង្ហោះរាល់ថ្ងៃមិនថាសកម្មភាពផ្ទាល់ខ្លួន ឬរឿងក្នុងចិត្ត។ ដូច្នេះ អ្វីដែលកើតឡើងចំពោះគាត់ គឺគាត់តែងតែបង្ហោះជាប្រចាំ មិនថាជារឿងសប្បាយ ឬកើតទុក្ខឡើយ។

៧. ចង់ឱ្យគេចាប់អារម្មណ៍

ការវក់លេងបណ្តាញសង្គមយូរទៅ អាចធ្វើឱ្យបុគ្គលមួយចំនួនកើតជំងឺតួឯកផងដែរ។ ពេលខ្លះគេគិតថា បញ្ហាដែលកើតឡើងចំពោះគេ សុទ្ធតែជារឿងសំខាន់ ដែលគេចាំបាច់ត្រូវតែបង្ហោះដើម្បីទទួលបាននូវការចាប់អារម្មណ៍ពីអ្នកដទៃ។ ដូច្នេះហើយ ទោះបីធុញថប់ ឬជួបបញ្ហាស្មុគស្មាញយ៉ាងណាក៏ដោយ តែនៅពេលមានអ្នកផង ចាប់អារម្មណ៍ពីបញ្ហា ឬរឿងផ្ទាល់ខ្លួនរបស់គេ នោះនឹងធ្វើឱ្យសាមីខ្លួន មានអារម្មណ៍សប្បាយចិត្ត ឬមានមោទភាពចំពោះខ្លួនឯងទៀតផង។

៨. ដើម្បីបង្កើតមិត្តភក្តិ

បុគ្គលខ្លះគិតថា ការបង្ហោះរឿងរ៉ាវផ្ទាល់ខ្លួន ធ្វើឱ្យគាត់ទទួលបាននូវមតិយោបល់ (Comments) ផ្សេងៗ ពីមិត្តភក្តិក្នុងហ្វ៊េសប៊ុករបស់គាត់ ហើយវាក៏ជាចំណែកមួយនៃការបង្កើតមិត្តភក្តិផងដែរ ក្នុងការដែលគាត់អាចចែករំលែកគំនិតគ្នាទៅវិញទៅមកបាន។

ប្រិយមិត្តដែលកំពុងអានអត្ថបទនេះ ហើយដឹងថាខ្លួនឯងជាមនុស្សដែលចូលចិត្តបង្ហោះបញ្ហាផ្ទាល់ខ្លួន តើគិតថាចំណុចខាងលើណាមួយដែលត្រូវជាមួយអ្នក?

ទោះបីជាយ៉ាងណាក៏ដោយ ការបង្ហោះរាល់បញ្ហានៅលើបណ្តាញហ្វ៊េសប៊ុក មិនសុទ្ធតែជាជម្រើសល្អនោះទេ។ គ្មានច្បាប់ណាមួយហាមឃាត់នូវសិទ្ធិសេរីភាពរបស់យើងក្នុងការសរសេរអ្វីដែលយើងចង់សរសេរនោះទេ តែការដែលសរសេរដោយមិនបានគិតឱ្យដិតដល់ ឬមានលក្ខណៈស៊ីជម្រៅ ឬគ្រោតគ្រាតខ្លាំងពេក វាអាចធ្វើឱ្យប៉ះពាល់ដល់កិត្តិយសខ្លួនឯង និងអ្នកដទៃដែលពាក់ព័ន្ធផងដែរ។ ដូច្នេះ បុគ្គលទាំងឡាយគប្បីបង្កើតឱកាសឱ្យខ្លួនឯងឱ្យបានច្រើននៅពេលមានបញ្ហាតាមរយៈការបង្កើតមិត្តភាពនៅពិភពខាងក្រៅ ដែលគេអាចជាមនុស្សដែលស្តាប់ពីបញ្ហារបស់យើងបាន ការចូលរួមក្នុងសកម្មភាពសង្គមនានា ការដើរកម្សាន្ត ឬលេងកីឡា ក៏សុទ្ធសឹងតែអាចជួយយើងឱ្យរំដោះខ្លួនពីភាពតានតឹង និងចំណាយពេលច្រើនលើហ្វ៊េសប៊ុកបាន៕



You may also like

កម្ពុជា

ហ៊ុន សែន អះអាងថា នឹងមិន​«បិទបណ្ដាញសង្គម»​នៅកម្ពុជា​ដាច់ខាត

លោកនាយករដ្ឋមន្ត្រី ហ៊ុន សែន បានអះអាងថា នៅក្នុងរយៈពេល​នៃការកាន់អំណាចរបស់លោក លោកនឹងមិនបញ្ជាឲ្យ«បិទបណ្ដាញសង្គម»នៅកម្ពុជាជាដាច់ខាត។ បណ្ដាញសង្គមដែលលោកនាយករដ្ឋមន្ត្រីអះអាងនោះ មានជាអាទិ៍ ដូចជា ហ្វេសប៊ុកជាដើម។ ថ្លែងក្នុងពិធីបើកការដ្ឋានសាងសង់សំណង់ផ្សេងៗ ក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ...
ទំព័រហ្វេសប៊ុករបស់ចលនាមាតាធម្មជាតិ នៅមុន និងក្រោយការបាត់រូប ពីលើបណ្ដាញសង្គម។ (រូបថតផ្តិតពីអេក្រង់)
កម្ពុជា

ទំព័រហ្វេសប៊ុក«មាតាធម្មជាតិ» បាន​បាត់រូប​ពីបណ្ដាញសង្គម

នៅពេលនេះ ទំព័រហ្វេសប៊ុកផ្លូវការ របស់ចលនា​«មាតាធម្មជាតិ» ដ៏ល្បីល្បាញ បាន​បាត់រូប​ពីបណ្ដាញសង្គម បន្ទាប់ពីសកម្មជនរបស់ចលនានេះ ចំនួន៣នាក់ ត្រូវបាន​អាជ្ញាធរ​​របបក្រុងភ្នំពេញចាប់ខ្លួន កាលពីថ្ងៃព្រហស្បត្តិ៍ ទី៣ ខែកញ្ញាម្សិលម្ងៃ។ ទំព័រហ្វេសប៊ុករបស់ចលនា«មាតាធម្មជាតិ» មានអាស័យដ្ឋាន ...
កម្ពុជា

តុលាការកម្ពុជា​កោះហៅ​«ម្ចាស់គណនេយ្យខ្មោច»​ហ្វេសប៊ុក ឲ្យឡើងសវនាការ

ពីក្នុងចំណោមមនុស្សទាំង៦៨នាក់ ដែលរងការកោះហៅ ពីសំណាក់សាលាដំបូង​រាជធានី​ភ្នំពេញ ឲ្យឡើងសវនាការ នៅចុងខែវិច្ឆិកាខាងមុខ មានមួយភាគ គឺជា​«ម្ចាស់​គណនេយ្យខ្មោច» នៅលើបណ្ដាញសង្គម។ នេះ បើតាមការអះអាង របស់អ្នកជំនាញ ដែលវិភាគ​ទៅលើដីកាកោះមួយច្បាប់ មាន៦ទំព័រ ...

Comments are closed.

ជីវិតប្រចាំថ្ងៃ

បារាំង៖ ប្រតិទិន​​នៃវិស្សមកាល ក្នុងឆ្នាំសិក្សា ២០២០-២០២១

ជីវិតប្រចាំថ្ងៃ

រងការពង្រត់តាំងពីនៅតូច ទើប​ជួបជុំ​ ជាមួយ​ឪពុកម្ដាយ​វិញ​ នៅ​៣២ឆ្នាំ​ក្រោយ

បុរសជនជាតិចិនម្នាក់ ទើប​ជួបជុំ​ ជាមួយឪពុកម្ដាយបង្កើតខ្លួនវិញ នៅថ្ងៃនេះ បន្ទាប់ពីបានបែក ពីអ្នកមានគុណ ដោយការចាប់ពង្រត់មួយ តាំងពី៣២ឆ្នាំមុន។ ការជួបជុំ ឪម៉ែ-កូន វិញនេះ ធ្វើឡើងដោយសារ របាយការណ៍មួយរបស់​អាជ្ញាធរ ...
ជីវិតប្រចាំថ្ងៃ

បារាំង៖ ថ្ងៃបុណ្យ​ដែល​ត្រូវ​ឈប់​សម្រាក ប្រតិទិន​ឆ្នាំ២០២០

ក្នុងប្រទេសបារាំង ថ្ងៃបុណ្យ​ដែល​ត្រូវ​ឈប់​សម្រាក មាន១១ថ្ងៃ ស្របតាមច្បាប់ការងារ ជាធរមាន របស់ប្រទេសនេះ។ ពីចំណោមនោះ ថ្ងៃបុណ្យចំនួន៥ គឺជាទិវាបុណ្យជាតិ-អន្តរជាតិ សម្រាប់ឧទ្ទិស​ឲ្យការរំលឹក​ឡើងវិញ នៃប្រវត្តិនានា ដែលជាការតស៊ូ ដើម្បីសេរីភាព ...