ទិដ្ឋភាព«ជំនួប»ផ្ទាល់មុខ រវាងលោកនាយករដ្ឋមន្ត្រី ហ៊ុន សែន និងមេដឹកនាំ គណបក្សប្រឆាំង លោក កឹម សុខា ក្នុងពិធីបុណ្យសព ម្ដាយក្មេកលោក ហ៊ុន សែន បានបង្ហូទឹកប៉ាកកា មិនតិចទេ សម្រាប់ក្រុមអ្នកវិភាគ និងអ្នកឃ្លាំមើល បញ្ហាសង្គម និងនយោបាយខ្មែរ។
សម្រាប់លោក គឹម សុខ អ្នកវិភាគឯករាជ្យ ដែលកំពុងរស់នៅនិរទេសខ្លួន ក្នុងប្រទេសណ័រវេស បានអបអរសាទរជំនួបនេះ ថាជាការបង្ហាញ នូវ«ប្រពៃណីវប្បធម៌នយោបាយល្អមួយ»។
បើទោះជាលោកយល់ថា ស្ថានការណ៍នយោបាយកម្ពុជា នឹងពុំមានការប្រែប្រួលអ្វីធំដុំ ចេញពីជំនួប បែបនេះដ៏ដោយចុះ ក៏លោក គឹម សុខ ពន្យល់ថា មេដឹកនាំទាំងសងខាង បានប្រើប្រាស់ជំនួបនេះ ដើម្បីយុទ្ធសាស្ត្រនយោបាយ តែរៀងៗខ្លួន។ លោកថា លោកនាយករដ្ឋមន្ត្រី ទទួលបានផលចំណេញ ខណៈមេដឹកនាំប្រឆាំង បានបង្ហាញពីគំនិត ដ៏ជ្រៅមួយ។
នៅលើបណ្ដាញសង្គម លោក គឹម សុខ បានពន្យល់ថា លោក ហ៊ុន សែន បានចំណេញ២យ៉ាង ៖
«ទី(១) មុខមាត់ និងទី(២) បង្កើតជាការសង្ស័យរវាងគ្នា ក្នុងចំណោមក្រុមប្រឆាំង ជាពិសេស ពីពួកអ្នកហ្វឹកហាត់ការងារមួលបង្កាច់ ដែលចាំតែចោទ ដោយមិនចេះពិចារណាវែងឆ្ងាយ។ ពួកនេះនឹងដណ្ដើមគ្នា ស្រែកកញ្ជ្រោកឆ្លើយឆ្លងគ្នា យ៉ាងទ្រហឹង តាមបណ្ដាញសង្គម ហ្វេសប៊ុក ទាក់រកម៉ូយដុំម៉ូយរាយ តាមស្នៀតប្រូ និងទាយនយោបោក របស់ពួកគេ។»
សម្រាប់ប្រធាន គណបក្សសង្គ្រោះជាតិ ដែលត្រូវបានលោក គឹម សុខ ពន្យល់ថា មានគំនិតនយោបាយជ្រៅ នៅក្នុងជំនួបនេះ គឺមេឹកនាំប្រឆាំង«ចែករំលែកមេរៀនចិត្តធម៌ ដល់លោក ហ៊ុន សែន, មានន័យថា លោក កឹម សុខា ហ៊ានធ្វើល្អ អន់ឱន និងអនុគ្រោះ ចំពោះលោក ហ៊ុន សែន បើទោះបីជាសម្ដេចប្រធាន គណបក្សប្រជាជនកម្ពុជា [រូបនេះ] ធ្វើបាបគាត់ យ៉ាងណាក៏ដោយ»។
ជំនួប ហ៊ុន សែន-កឹម សុខា ផ្ដល់ផលតិច…
ផ្ទុយពីបានមើលឃើញ ពីយុទ្ធសាស្ត្រនយោបាយ ខ្លីឬវែង ដូចបានរៀបរាប់ខាងលើ អ្នកវិភាគ ដែលមានសំដី មិនសំចៃមាត់រូបនេះ បានរំពឹងថា ចេញពី«ជំនួប» រវាងមេដឹកនាំទាំងពីរ ស្ថានការណ៍នយោបាយ នៅកម្ពុជា នឹងមិនមានការផ្លាស់ប្ដូរអ្វី គួរឲ្យកត់សម្គាល់ឡើយ។
«លោក ហ៊ុន សែន មិនហ៊ានបន្ធូរសេរីភាពនយោបាយ នៃលោក កឹម សុខា ដល់កម្រិតឲ្យខូចផែនការ អំណាច “តត្រកូលហ៊ុន”ទេ។ រីឯលោក កឹម សុខា វិញ ក៏នឹងមិនសម្លាប់ កិត្តិនាមនយោបាយរបស់គាត់ ដោយការលេងល្បែង របស់លោក ហ៊ុន សែន ដែរ។»
អ្នកវិភាគ បានសរសេរពន្យល់ ទៀតថា៖
«លោក កឹម សុខា បង្ហាញជំហរត្រូវផ្លូវ ក្នុងការទាមទារ ឲ្យមានការផ្សះផ្សាជាតិ ហើយជម្លោះនយោបាយ ពិតជាត្រូវសម្រុះសម្រួលគ្នា តាមផ្លូវនយោបាយមែន ក៏ប៉ុន្តែគាត់មិនអាចងាកចេញ ពីគោលការណ៍ទាមទារយុត្តិធម៌ សមនឹងទទួលយកបាន ដូចដែលគាត់ធ្លាប់បានសន្ទនា ជាមួយអង្គទូតនានា កន្លងមកនោះទេ។»
នៅទីបញ្ចប់ លោក គឹម សុខ ក៏បានយកលោក សម រង្ស៊ី មេដឹកនាំប្រឆាំង មួយរូបទៀត ចូលមកក្នុងការប្រមើលមើល របស់លោក ដែលធ្វើទៅលើជំនួប នៃមេដឹកនាំទាំងពីរនាក់ មុននេះដែរ។ អ្នកវិភាគ បានលើកឡើងថា៖
«ទាំងលោក កឹម សុខា និងលោក សម រង្ស៊ី បើអ្នកណាម្នាក់ ហ៊ានលេង ដាច់ដោយឡែក ពីគ្នា តាមល្បែងរបស់លោក ហ៊ុន សែន នោះពួកគាត់ គួរប្រកាស ឈប់ធ្វើនយោបាយ ល្អជាង ពីព្រោះការលេងល្បែង [របស់]លោក ហ៊ុន សែន រៀងៗខ្លួន ដោយឡែកពីគ្នា កិត្តិនាមផ្ទាល់ខ្លួនក៏ចប់ ហើយស្មារតីប្រជាធិបតេយ្យជាតិ ក៏ធ្លាក់យ៉ាប់៕»
