នៅខណៈលោក ហ៊ុន សែន កំពុងចាប់ដៃថតរូប ជាមួយបណ្ដាជនដែលមកទទួលស្វាគមន៍លោក ស្រាប់តែ«ស្បែកជើងហោះ»មួយ បានហោះកាត់ក្បែរនោះ។ ជាទិដ្ឋភាពដែលបង្កភាពរអាក់រអួលមួយភ្លែត ទៅដល់កម្មវិធី ក៏ដូចជាស្នាមញញឹមរបស់នាយករដ្ឋមន្ត្រីចាស់វស្សាកម្ពុជា ដែលធ្វើដំណើរទៅកាន់រដ្ឋធានី នៃសហរដ្ឋអាមេរិក ដើម្បីចូលរួមជំនួបកំពូល អាមេរិក-អាស៊ាន។
ហេតុការណ៍បានកើតឡើង នៅវេលាល្ងាចថ្ងៃពុធ ទី១១ ខែឧសភា ឆ្នាំ២០២២ កណ្ដាលរដ្ឋធានី វ៉ាស៊ីនតោន សហរដ្ឋអាមេរិក។
ម្ចាស់ស្បែកជើង ត្រូវបានគេស្គាល់ឈ្មោះ គឺលោក អ៊ុក ទូច ជាពលរដ្ឋខ្មែរអាមេរិកាំង មកពីរដ្ឋកាលីហ្វ័នី។ លោកបានថ្លែងនៅក្នុងវីដេអូមួយ ដែលត្រូវបានបង្ហោះចែកតៗគ្នា ពាសពេញបណ្ដាញសង្គម ឲ្យដឹងថា៖
«ខ្ញុំបានយកស្បែកជើង គប់ក្បាល ហ៊ុន សែន ព្រោះ ហ៊ុន សែន ជាជនផ្ដាច់ការ «Dictator» ដែលសម្លាប់គ្រួសាររបស់ខ្ញុំ នៅកម្ពុជា។ ខ្ញុំគ្រាន់តែយកស្បែកជើង គប់ក្បាលគាត់ទេ តែគាត់យកគ្រាប់បែកគប់ពួកបាតុករ ងាប់មិនចេះតិច នៅស្រុកខ្មែរ (…) ហ៊ុន សែន សម្លាប់មនុស្សច្រើនណាស់ សម្លាប់លិទ្ធិប្រជាធិបតេយ្យ (…) គាត់សម្លាប់ឳពុកម្ដាយខ្ញុំ ដូច្នេះខ្ញុំទប់អត់បានទេ។»
លោក អ៊ុក ទូច បានរៀបរាប់នៅក្រោយព្រឹត្តិការណ៍ «ស្បែកជើងហោះ» ថាក្រុមកងអង្គរក្ស របស់នាយករដ្ឋមន្ត្រីកម្ពុជា បានស្ទុះមករករូបលោក ក្នុងបំណងចង់ក្របួចកអាវលោក និងចង់វាយរូបលោក តែភ្នាក់ងារនគរបាលអាមេរិក នៅមានវត្តមាននៅទីនោះ បានចេញមកការពារ និងប្រាប់ឲ្យលោកចាកចេញពីទីនោះ។
រូបភាពនៃ«ស្បែកជើងហោះ» នៅចំពោះលោក ហ៊ុន សែន ត្រូវបានថតជាប់ជាវីដេអូ និងបង្ហោះចេញផ្សាយ នៅពាសពេញបណ្ដាញសង្គម មុននឹងទទួលបានការចែករំលែកព្រោងព្រាត ដោយក្រុមអ្នកប្រើប្រាសបណ្ដាញសង្គម។ អ្នកប្រើប្រាស់បណ្ដាញសង្គមនៅបរទេស បានចាត់ទុកការបង្ហោះស្បែកជើងនេះថា ជា«សិទ្ធិបញ្ចេញមតិ» ក្នុងនាមជាពលរដ្ឋមួយរូប៕
