ហ៊ុន សែន ទទួលស្គាល់​ការផ្អាក​កិច្ចប្រជុំ​គណៈរដ្ឋមន្ត្រី មកពី«បញ្ហា​សុខភាព»?

ផ្ទុយពីអ្នកនាំពាក្យ ដែលអះអាងថា ការផ្អាកកិច្ចប្រជុំគណៈរដ្ឋមន្ត្រី កាលពីចុងសប្ដាហ៍មុន មិនពាក់ព័ន្ធនឹងបញ្ហាសុខភាព របស់នាយករដ្ឋមន្ត្រីនោះ នៅព្រឹកថ្ងៃពុធនេះ លោក ហ៊ុន សែន បានចេញមកអះអាង ដែលធ្វើឲ្យគេយល់ថា ការផ្អាកកិច្ចប្រជុំនោះ គឺពិតជាបណ្ដាល មកពី«បញ្ហា​សុខភាព»របស់លោក។

បុរសខ្លាំងកម្ពុជា បានប្រើទំព័រហ្វេសប៊ុករបស់លោក សរសេរឲ្យគេឯងដឹងថា៖

«មកទល់ថ្ងៃ[ពុធ]នេះ សុខភាពខ្ញុំ (គ្រេចស្មា) ក៏កាន់តែល្អប្រសើររឹងមាំ មានកម្លាំងថាមពលពេញលេញ ក្នុងការបំពេញការងារជូនជាតិ។ នៅថ្ងៃ សុក្រទី ២ ខែសីហា [ខាងមុខ]នេះ ខ្ញុំនឹងដឹកនាំ​ប្រជុំ​គណៈរដ្ឋមន្រ្តី​ពេញអង្គ ដូចធម្មតា។»

កាលពីសប្ដាហ៍មុន ទីស្ដីការ​គណៈរដ្ឋមន្ត្រី ប្រកាស​លើក​ពេល​កិច្ច​ប្រជុំ​ពេញអង្គ នៃ​គណៈរដ្ឋមន្ត្រី​ ប្រចាំ​សប្ដាហ៍ ​ដែល​គ្រោងប្រជុំ​ នៅ​ថ្ងៃ​សុក្រ​ទី​២៦ ខែ​កក្កដា ទៅ​ប្រជុំ​នៅ​ពេល​ក្រោយ​ និង​មិនបាន​កំណត់ពេល និង​មិន​បញ្ជាក់​អំពី​មូលហេតុ​ច្បាស់លាស់​ទេ។

អ្នកនាំពាក្យ​រដ្ឋាភិបាល លោក ផៃ ស៊ីផាន ត្រូវបានស្រង់សំដី មកអះអាងថា ការ​លើក​ពេល​នៃ​កិច្ចប្រជុំ គណៈរដ្ឋមន្ត្រី​ នៅពេលនោះ ​មិនជា​ប់ពាក់ព័ន្ធ ​នឹង«បញ្ហា​សុខភាព» ​របស់​លោក ហ៊ុន សែន នោះ​ឡើយ។ លោក ស៊ីផាន ថែមទាំងបាន​ចាត់ទុក​នរណា​ក៏ដោយ ដែល«ប្រមាថម៉ាក់ងាយ» និង«បំប៉ោងព័ត៌មាន» ពីរឿងនេះ ថាជាមនុស្ស«ចង្រៃ»៕