កម្ពុជាដំណឹង

«ប្រ៊ែដ អាដាម ទៅណាហើយ? ខ្ញុំ​នៅ​កាលីហ្វ័រនីញ៉ា !»

ពីឆ្វេងទៅស្ដាំ៖ លោក ប្រ៊ែដ អាដាម នាយករង​ទទួលបន្ទុកកិច្ចការអាស៊ី នៃអង្គការឃ្លាំមើលសិទ្ធិមនុស្ស និងលោក ហ៊ុន សែន នាយករដ្ឋមន្ត្រីតាំងពីឆ្នាំ១៩៨៥ នៅកម្ពុជា។ (រូបថត Getty)
ពីឆ្វេងទៅស្ដាំ៖ លោក ប្រ៊ែដ អាដាម នាយករង​ទទួលបន្ទុកកិច្ចការអាស៊ី នៃអង្គការឃ្លាំមើលសិទ្ធិមនុស្ស និងលោក ហ៊ុន សែន នាយករដ្ឋមន្ត្រីតាំងពីឆ្នាំ១៩៨៥ នៅកម្ពុជា។ (រូបថត Getty)

ការប្រកាសសួររកលោក ប្រ៊ែដ អាដាម (Brad Adams) ពីសំណាក់លោកនាយករដ្ឋមន្ត្រី ហ៊ុន សែន ទទួលបានការឆ្លើយតប ពីលោក អាដាម វិញថា «ខ្ញុំ​នៅ​កាលីហ្វ័រនីញ៉ា !»។ នាយករង​ទទួលបន្ទុកកិច្ចការអាស៊ី នៃអង្គការឃ្លាំមើលសិទ្ធិមនុស្ស (Human Rights Watch) បានបន្ថែមចម្លើយ​ នៅលើទំព័រទ្វីសធើរផ្លូវការ របស់លោក ដោយហៅលោក ហ៊ុន សែន ថាជា«ជនផ្ដាច់ការ» របស់ប្រទេសកម្ពុជា​​ ដែលចេះតែចេញ​សេចក្ដីថ្លែងការណ៍ បែប​«ល្ងង់ខ្លៅ»។

កាលពីរសៀលថ្ងៃទី០១ ខែមិថុនា ឆ្នាំ២០២០ នៅចំពោះមន្រ្តីរាជការ និងក្រុមការងារ​បច្ចេកទេស ស្ថាបនាហេដ្ឋារចនាសម្ព័ន្ធផ្លូវ នៅក្រុងព្រះសីហនុ លោក ហ៊ុន សែន បាន​ប្រកាសសួររកលោក ប្រ៊ែដ អាដាម ដើម្បីអ្វីមួយ ដែលលោកនាយករដ្ឋមន្ត្រីអះអាងថា ឲ្យលោក អាដាម និងអង្គការឃ្លាំមើលសិទ្ធិមនុស្ស ត្រូវចេញមុខ មក«ស្រែករិះគន់»​អំពីបញ្ហា​សិទ្ធិមនុស្ស​នៅសហរដ្ឋ​អាមេរិក។

បុរសខ្លាំងនៅកម្ពុជា បានថ្លែងដោយសម្លេងធ្ងន់ៗថា៖

«ប្រ៊ែដ អាដាម ទៅណាហើយ? អា Human Right ស្អី Wacth ហ្នឹង ម៉េចមិនឮសូរស្រែក សិទ្ធិមនុស្សទៅឯណា? ពេលកម្ពុជាទប់បាតុកម្ម គេថាកម្ពុជារំលោភសិទ្ធិមនុស្ស ដល់ពេល​ប្រទេសដទៃទប់បាតុកម្ម គេថាវិធានការ ការពារសណ្តាប់ធ្នាប់សង្គម។ ខុសគ្នាខ្លាំងម្ល៉េះ?»

«ពេលកម្ពុជាមានវិធានការ ទប់ស្កាត់បាតុកម្ម គេថាកម្ពុជារំលោភ លើសិទ្ធិបញ្ចេញមតិ លើសិទ្ធិតវ៉ា ក៏ប៉ុន្តែដល់ប្រទេសប្រជាធិបតេយ្យគេធ្វើវិញ គេទប់ដូចគ្នា ជួនកាលមាន​ការប៉ះទង្គិចបង្ហូរឈាម គេថាវិធានការសណ្តាប់ធ្នាប់សង្គម។»

លោក ហ៊ុន សែន បានព្រមានលោក ប្រ៊ែដ អាដាម កុំបន្តនិយាយ ពីបញ្ហាសិទ្ធិមនុស្ស នៅកម្ពុជា និងបានហៅមេដឹកនាំ​អង្គការអន្តរជាតិរូបនេះ ថាមិនមែនជា«មនុស្ស» បើមិននិយាយ ពីបញ្ហាសិទ្ធិមនុស្ស នៅសហរដ្ឋអាមេរិក។ លោក ហ៊ុន សែន បានថ្លែងថា៖

«ប្រ៊ែដ អាដាម ត្រូវតែនិយាយ។ បើហ្អែងមិននិយាយ ថ្ងៃក្រោយហ្អែងកុំនិយាយប៉ះពាល់ខ្មែរ បើហ្អែងមិននិយាយ ពីស្រុកអាមេរិក។ ពួកសិទ្ធិមនុស្សទាំងឡាយ នៅលើលោកកីយ៍ ទៅណា​អស់ហើយ ម៉េចក៏ស្ងាត់ឈឹង? (…)រឿងបង្ក្រាបបាតុករ នៅអាមេរិកពេលនេះ បើ ប្រ៊ែដ អាដាម មិននិយាយទេ ប្រ៊ែដ អាដាម មិនមែនជាមនុស្សទេ។»

ក្នុងលិខិត​​មួយច្បាប់ ដែលផ្ញើរទៅកាន់​អ្នកសារព័ត៌មាន លោក ប្រ៊ែដ អាដាម បានតប​ទៅលោក ហ៊ុន សែន វិញថា លោករីករាយនឹងឆ្លើយ នឹងរាល់សំនួរខាងលើ របស់មេដឹកនាំកម្ពុជា។ លោកបានសរសេរថា៖

«ខ្ញុំ​នៅ​កាលីហ្វ័រនីញ៉ា ! ជាមួយនឹងសហការីដទៃទៀត ខ្ញុំបានចូលរួម ដើរដង្ហែរ​ជា​បាតុកម្ម​អហិង្សា ប្រឆាំងនឹងអំពើហិង្សា បង្កឡើងដោយក្រុមនគរបាល និងដើម្បីគាំទ្រ ដល់ចលនា “#BlackLivesMatter”។»

លោក អាដាម អះអាងទៀតថា លោកនិងកូនប្រុសលោក ត្រូវបាននគរបាល ប្រើឧស្ម័នបាញ់ ឲ្យហូរទឹកភ្នែក នៅក្នុងបាតុកម្មនោះផង។

ចំពោះសំនួររបស់លោក ហ៊ុន សែន ដែលថា អង្គការសិទ្ធិមនុស្ស «នៅឯណា» នាយករង​ទទួល​បន្ទុកកិច្ចការអាស៊ី របស់អង្គការអន្តរជាតិ បានលើកយកមកបង្ហាញ ដោយ​«ត្រួសៗ» នូវរបាយការណ៍ និងសេចក្ដីថ្លែងការណ៍សំខាន់ៗ ជាច្រើន ដែលចេញផ្សាយ ដោយអង្គការរបស់លោក ជុំវិញព្រឹត្តិការណ៍ចុងក្រោយ នៅសហរដ្ឋអាមេរិក។

លោក ប្រ៊ែដ អាដាម បានបញ្ជាក់ទៀតថា បើចង់ដឹងពីចម្លើយច្បាស់ជាងនេះ លោក ហ៊ុន សែន បណ្ដាអ្នកហែហម  និងប្រព័ន្ធឃោសនារបស់លោក គ្រាន់តែចូលទៅពិគ្រោះគេហទំព័រ របស់អង្គការរបស់លោក នោះនឹងដឹងពីសកម្មភាព របស់អង្គការឃ្លាំមើលសិទ្ធិមនុស្សទាំងអស់ហើយ។

ប៉ុន្តែមេដឹកនាំរបស់អង្គការអន្តរជាតិ នៅបានបន្ថែមពាក្យប៉ុន្មានម៉ាត់ នៅលើ​ទំព័រ​ទ្វីសធើរ​ផ្លូវការ របស់លោកទៀតថា៖

«ជនផ្ដាច់ការរបស់​កម្ពុជា បានវាយប្រហារខ្ញុំ និងអង្គការឃ្លាំមើលសិទ្ធិមនុស្ស ថាមិនបាន​រិះគន់ អំពើហិង្សារបស់ក្រុមនគរបាល នៅសហរដ្ឋអាមេរិក។ បើលោក ហ៊ុន សែន បាន​ពិគ្រោះ​គេហទំព័របស់យើង គាត់នឹងមិនធ្វើសេចក្ដីថ្លែងការណ៍​ ដ៏ល្ងង់ខ្លៅ ដូច្នេះទេ។»

«សិទ្ធិមនុស្ស មានលក្ខណៈជាសាកល។ មើល៍លោក ហ៊ុន សែន ! តើលោកនឹង​គោរព​សិទ្ធិ​ទាំង​នេះ នៅពេលណា?»



លំអិតបន្ថែមទៀត

កម្ពុជា

ថ្ងៃកំណត់ភ្នាល់៖ សម រង្ស៊ី ស្ងប់ស្ងៀម ខណៈក្រុមស្និត ហ៊ុន សែន ចំអក

រហូតមកដល់ថ្ងៃកំណត់ ថ្ងៃអាទិត្យទី៣ ខែមិនា ឆ្នាំ២០១៩នេះ ភាគីម្ខាងនៃការភ្នាល់ គឺលោក សម រង្ស៊ី បានរក្សាភាព«ស្ងប់ស្ងៀម» ដោយមិនឃើញបញ្ចេញប្រតិកម្មអ្វីឡើយ ខណៈភាគីម្ខាងទៀត គឺលោក ហ៊ុន ...
កម្ពុជា

«ប្រទេសរំដួល និយាយ​ប្រឆាំង​ក៏ជាប់គុក និយាយតាម​ក៏ជាប់គុក»

ធ្វើម៉េចទៅអញ្ចឹង? នៅប្រទេស«រំដួល» និយាយ​ប្រឆាំង​ក៏ជាប់គុក ហើយបើងាក មក​និយាយ​តាម ក៏ជាប់គុក? នេះជាប្រតិកម្មមួយ ពីក្នុងចំណោម ប្រតិកម្មជាច្រើន ជុំវិញ​ការចាប់ខ្លួន អ្នកសារព័ត៌មានមួយរូប កាលពីថ្ងៃទី៧ ខែមេសាកន្លងទៅ ...
កម្ពុជា

ភរិយា កែម ឡី ប្ដេជ្ញាបន្ត​«បេសកកម្ម»​ស្វាមី​ដើម្បី​លទ្ធិ​ប្រជាធិបតេយ្យ

អ្នកស្រី ប៊ូ រចនា ភរិយាមេម៉ាយនៃសពលោកបណ្ឌិត កែម ឡី បានសំដែងការប្ដេជ្ញាចិត្ត ថាអ្នកស្រីនឹងបន្ត​«បេសកកម្ម»​របស់ស្វាមី រហូតដល់ប្រទេសកម្ពុជា មានលទ្ធិប្រជាធិបតេយ្យ​​ពិតប្រាកដ។ ការថ្លែងរបស់អ្នកស្រី ធ្វើឡើងក្នុងការប្រារព្ធខួបឆ្នាំទី​៣ នៃការធ្វើឃាត ...

Comments are closed.

យល់ស៊ីជម្រៅផ្នែក កម្ពុជា

កម្ពុជា

សម​​ រង្ស៊ី បង្កើតសមាគមការពារ​សិទ្ធិ នៃអតីត​អ្នកជំងឺ​កូវីដ-១៩

កម្ពុជា

ហ៊ុន សែន ថាខេត្តដែលកំហិត​ឲ្យធ្វើ​ចត្តាឡីស័ក ជា«ការបង្កើតរដ្ឋ​ក្នុងរដ្ឋ»

លោកនាយករដ្ឋមន្ត្រី ហ៊ុន សែន បានហៅការសម្រេច របស់អភិបាលខេត្តក្រុងមួយចំនួន ថាជា«ការបង្កើតរដ្ឋ​ក្នុងរដ្ឋ» ជុំវិញសេចក្ដីសម្រេច​របស់ពួកគេ ក្នុងការដាក់កំហិតឲ្យធ្វើចត្តាឡីស័ក សម្រាប់ពលរដ្ឋណាដែលធ្វើដំណើរឆ្លងខេត្ត។ បុរសខ្លាំងនៅកម្ពុជា បានបញ្ជាឲ្យមេដឹកនាំ នៅតាមខេត្តក្រុងទាំងនោះ ត្រូវធ្វើការផ្លាស់ប្ដូរ​សេចក្ដីសម្រេច​នោះ​ជាបន្ទាន់។ ...
កម្ពុជា

Covid-19៖ កម្ពុជាមានអ្នកជំងឺ​កើន«ដល់​២២៣៣​ករណី ស្លាប់១០នាក់»

ប្រទេសកម្ពុជា​បន្តរកឃើញ​អ្នកផ្ទុកមេរោគកូវីដ-១៩ (Covid-19) ចំនួន៨៦នាក់ ដែលធ្វើឲ្យចំនួនសរុបកើនឡើង ដល់​២២៣៣​ករណី នៅថ្ងៃទី២៨ ខែមីនា ឆ្នាំ២០២១នេះ។ រីឯអ្នកជំងឺដែលទទួលមរណភាព ដោយសារជំងឺនេះ ត្រូវបានប្រកាសតួលេខជាផ្លូវការ មានចំនួន១០នាក់ រាប់មកដល់ម៉ោងនេះ។ ...