កម្ពុជាដំណឹង

ស្ថានទូតអាមេរិក បន្តប្រាប់​​ក្រុងភ្នំពេញ​ឲ្យដោះស្រាយ​ករណី កឹម សុខា

ស្ថានទូតអាមេរិក ប្រចាំក្នុងរាជធានីភ្នំពេញ បានបន្តគម្រាមរបបក្រុងភ្នំពេញ ឲ្យដោះស្រាយករណីលោក កឹម សុខា ប្រធានគណបក្សសង្គ្រោះជាតិ ដោយភាពត្រឹមត្រូវ និងការគោរព បើសិនជារបបគ្រប់គ្រងមួយនេះ ចង់មានទំនាក់ទំនងល្អ ជាសហរដ្ឋ​អាមេរិក។

អ្នកស្រី​ អ៊ីមីលី ហ្សីប៊ើរ (Emily Zeeberg) អ្នកនាំពាក្យស្ថានទូតសហរដ្ឋអាមេរិក ​បាន​ផ្ញើ​សារ​អេឡិកត្រូនិក (email) កាលពីថ្ងៃអាទិត្យ ឲ្យអ្នកសារព័ត៌មាន អះអាងពីជំហរខាង​លើ​នេះ ដោយបញ្ជាក់ថា សហរដ្ឋ​អាមេរិក​ជា​សមាជិក​ហត្ថលេ​ខី ​នៃ​សន្ធិ​សញ្ញា​សន្តិ​ភាព​ ទីក្រុង​ប៉ារីស ​ដែល​មាន​១៨​ ប្រទេស​ ហើយ​ថា ​សហរដ្ឋ​អាមេរិក​មាន​ការ​ទទួល​ខុស​ត្រូវ ក្នុង​ការ​ត្រួត​ពិនិត្យ​ថាលទ្ធិ​ប្រជា​ធិប​តេយ្យ​ និង​សិទ្ធិ​មនុ​ស្ស​ត្រូវ​បាន​គេ​គោរព​ នៅ​ក្នុង​ប្រទេស​កម្ពុជា។

អ្នកនាំពាក្យបានសរសេរថា៖

«លោក កឹម សុខា ​ត្រូវ​បានចោទ​ប្រកាន់​ ពីបទ​ឃុបឃិត​ជាមួយ​សហរដ្ឋ​អាមេរិក​ ដើម្បី​ផ្ដួលរំលំ​រដ្ឋា​ភិបា​ល ដែល​ការ​ចោទ​ប្រកាន់​នេះ​ វា​មិនសម​ហេតុ​សម​ផល​ និង​មិន​ត្រឹមត្រូវ​សោះឡើយ។ ដូច្នេះ​រដ្ឋា​ភិបា​ល​កម្ពុជា​ បាន​ទាញ​ពួកយើង ​ឲ្យ​ទៅជា​ប់​ទាក់​ទង​ដោយ​ផ្ទាល់ ​នៅ​ក្នុងសំនុំរឿង​នេះ។ ហើយកម្ពុជា​មិន​អាច​មាន​ទំនាក់​ទំនង ​ប្រកប​ដោយ​ផ្លែផ្កាជាមួយ​សហរដ្ឋ​អាមេរិក​នោះ​ទេ រហូត​ដល់​ករណី​ទាំង​នេះ​ត្រូវ​បាន​ដោះស្រាយ​ ដោយ​ភាព​ត្រឹមត្រូវ និង​ការ​គោរព។»

ជំហររបស់ស្ថានទូតនៃប្រទេសមហាអំណាច ទំនងជាធ្វើឡើង ដើម្បីតបនឹងសេចក្ដីថ្លែងការណ៍មួយ របស់ក្រសួងការបរទេស និងកិច្ចសហប្រតិបត្តិការអន្តរជាតិ នៃរបបក្រុងភ្នំពេញ ដែលបានប្រតិកម្មនឹងការបង្ហោះសារមួយ នៅលើទំព័រហ្វេសប៊ុកផ្លូវការរបស់ស្ថានទូត កាលពីចុងសប្ដាហ៍មុន ជុំវិញករណីដដែល របស់ប្រធានគណបក្សសង្គ្រោះជាតិ។

លោក កឹម សុខា ប្រធានគណបក្សប្រឆាំងធំជាងគេ ដែលត្រូវបានរំលាយចោល ដោយតុលាការរបបក្រុងភ្នំពេញ កាលពីពាក់កណ្ដាលខែវិច្ឆិកា ឆ្នាំ២០១៧នោះ បានរងការចោទថា ​បាន​ឃុបឃិត​ជាមួយ​សហរដ្ឋ​អាមេរិក​ ប៉ុនប៉ង​ផ្តួល​រំលំ​រដ្ឋាភិបាល​ របស់លោក​នាយក​រដ្ឋមន្ត្រី​ ហ៊ុន សែន ដោយសំអាង​ទៅលើការថ្លែងមួយ​របស់លោក (កឹម សុខា) កាលពីច្រើនឆ្នាំកន្លងទៅ ជាមួយក្រុមអ្នកគាំទ្រ ក្នុងប្រទេសអូស្ត្រាលី។

រាប់ពីថ្ងៃដែលលោក ត្រូវបានចូលទៅចាប់ខ្លួន នៅក្នុងគេហដ្ឋាន រហូតមកដល់ថ្ងៃនេះ លោក កឹម សុខា បានជាប់ឃុំអស់រយៈពេល ជិត ១៨ខែហើយ។

សារ​ដែលបង្ហោះនៅលើបណ្ដាញសង្គម ដោយ​ស្ថានទូត​អាមេរិក​ កាលពី​ល្ងាច​ថ្ងៃសុក្រ បានសរសេរ​ហៅលោក កឹម សុខា ថាជា​មនុស្ស ​«ស្អាត​ស្អំ​» ដែលត្រូវបានឃុំខ្លួនដោយអយុត្តិធម៌ ក្រោមបទចោទប្រកាន់មិនពិត។ សាររបស់ស្ថានទូតបានបន្តថា៖

«មិនមានភស្តុតាងណាមួយ ប្រឆាំងនឹងគាត់ឡើយ ហើយក៏មិនទាន់ [មាន]ការកំណត់ [ដើម្បី]បើកសវនាការកាត់ទោសគាត់ដែរ។ គ្មានភស្តុតាង គ្មានសវនាការកាត់ទោស គ្មានយុត្តិធម៌។ តើអ្នកកំពុងមើលឃើញ រូបភាពរួម[ដូច្នេះឬ]ទេ?»

តែសម្រាប់ក្រសួងការបរទេសកម្ពុជា ការបង្ហោះសារ​ពីសំណាក់ ស្ថានទូតអាមេរិក ដែលមានការចែករំលែក នៅពេលនេះ រហូតដល់ទៅជាង៦៤០០ដងនោះ មានលក្ខណៈ«មិនការទូត» និងបានជ្រៀតជ្រែក ចូលកិច្ចការផ្ទៃក្នុងកម្ពុជា។

សេចក្ដីថ្លែងការណ៍ របស់ក្រសួងការបរទេស បានចាត់ទុកការលើកឡើងនោះ ថាជា«សារអត្ថាធិប្បាយ​តែមួយជ្រុង លើសំណុំរឿងលោក កឹម សុខា» ហើយស្ថានទូតអាមេរិក ត្រូវបានទាមទារឲ្យ«បញ្ឈប់ជាបន្ទាន់ នូវសកម្មភាព​ដែល​មាន​ហេតុផល​​នយោបាយ និងគ្មានការទូតនេះ»។

ចំពោះលោក ជុំ កុសល ទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន បានចាត់ទុកការលើកឡើង របស់មន្ត្រីស្ថានទូតអាមេរិក ថាកំពុងដើរហួសពីតួនាទីរបស់អ្នកការទូត ដែលលោកអះអាងថា គប្បីត្រូវតែជាអ្នកសម្រួបសម្រួល ជាអ្នកនាំសារ និងជាអ្នកតភ្ជាប់ចំណងមិត្តភាព កាន់តែប្រសើរឡើងរវាងប្រទេសទាំងពីរ។

លោក ជុំ កុសល ដែលជាពិធីករនយោបាយ នៅតាមកញ្ចក់ទូរទស្សន៍ក្នុងស្រុក ស្និតនឹងរដ្ឋាភិបាលគណបក្សប្រជាជនកម្ពុជា បានសរសេរ​នៅលើបណ្ដាញសង្គមថា៖

«ឯកអគ្គរដ្ឋទូតសហរដ្ឋអាមេរិកមួយចំនួន ដែលមានបេសកកម្មនៅកម្ពជា គឺតែងដើរហួសតួនាទីរបស់ខ្លួន ជ្រៀតជ្រែកចូល ក្នងកិច្ចការផ្ទៃក្នងកម្ពុជាជារឿយៗ ហើយថែមទាំងមានអគ្គរដ្ឋទូតខ្លះ បានបញ្ចេញឥរិយាបថមិនសក្តិសម ជាមន្ត្រីការទូតនៅចំពោះព្រះភ័ក្រព្រះមហាក្សត្រ និងសមាជិករដ្ឋសភានៃកម្ពុជា ថែមទៀតផង។»

រហូតមកដល់ថ្ងៃនេះ ទំនាក់ទំនងការទូតរវាងសហរដ្ឋអាមេរិក និងកម្ពុជា មិនមានលក្ខណៈពេញលេញទេ ដោយហេតុថា លោក ប៉ាទ្រីក ម័រហ្វី (Patrick Murphy) ឯកអគ្គរដ្ឋទូតថ្មីរបស់ប្រទេសមហាអំណាច ដែលត្រូវបានរដ្ឋបាល លោកប្រធានាធិបតី ដូណាល់ ត្រាំ (Donald Trump) តែងតាំងរួចជាស្រេចនោះ នៅមិនទាន់ចូលមកកាន់តំណែង ក្នុងរាធានីភ្នំពេញនៅឡើយ។

សម្រាប់ក្រុមអ្នកឃ្លាំមើលខ្លះ បានពន្យល់ថា អវត្តមាននៃឯកអគ្គរដ្ឋទូតពេញសមត្ថភាពរបស់ប្រទេសមហាអំណាច នៅក្នុងខណៈនេះ គឺជាសារដ៏សំខាន់មួយ ដើម្បីបញ្ជូនប្រាប់រដ្ឋាភិបាលលោក ហ៊ុន សែន ពីទំនាក់ទំនងខាងការទូត ដែលមិនគ្រប់លក្ខណៈ ក៏ដូចជាបង្ហាញពីមន្ទិល ទាក់ទងនឹងភាពស្របច្បាប់ នៃរដ្ឋាភិបាលឯកបក្សសព្វថ្ងៃនេះដែរ៕



លំអិតបន្ថែមទៀត

កម្ពុជា

សម រង្ស៊ី៖ តុលាការ​ឯករាជ្យ​មួយ នឹង​បកមុខ​ជន​គប់​គ្រាប់បែក​មុខ​អតីតរដ្ឋសភា

មេដឹកនាំប្រឆាំង លោក សម រង្ស៊ី បានបង្ហើបឲ្យដឹងថា ក្នុងពេលឆាប់ៗខាងមុខនេះ តុលាការ​ឯករាជ្យ​មួយ នឹងបង្ហាញជាសាធារណៈ នូវភេរវករ​ដែលបានគប់គ្រាប់បែក កាលពីថ្ងៃទី៣០ ខែមិនា ឆ្នាំ១៩៩៧ ប្រឆាំងបាតុកម្មដោយសន្តិវិធី ...
កម្ពុជា

នេះជា​ផ្ទះ​ដែល​ឯកអគ្គរដ្ឋទូត​អាមេរិក​ស្នាក់នៅ ក្នុង​ចុង​សប្ដាហ៍​កន្លង​មក

ក្នុង​ចុង​សប្ដាហ៍​កន្លង​មក ឯកអគ្គរដ្ឋទូតសហរដ្ឋអាមេរិក ប្រចាំនៅកម្ពុជា លោក ប៉ាទ្រីក ម័រហ្វី (Patrick Murphy) បានធ្វើដំណើរ​ទៅកាន់​ទឹកដីភាគឦសាន នៃប្រទេស​កម្ពុជា ជាពិសេសនៅក្នុងខេត្ត​មណ្ឌលគិរី ដោយស្នាក់ក្នុង​ក្រុង សែនមនោរម្យ ...
កម្ពុជា

អាមេរិក​លើកពី​«សេរីភាព និង ចំណង​ទ្វេភាគី» ដើម្បី​ជូនពរ​ឆ្នាំថ្មី​ដល់​កម្ពុជា

សម្រាប់ឱកាសបុណ្យចូលឆ្នាំថ្មី ប្រពៃណីជាតិនេះ សហរដ្ឋអាមេរិកបានផ្ញើរសារ ជូនពរប្រជាជនកម្ពុជា ប្រកបដោយអត្ថន័យសង្កត់ធ្ងន់ ទៅលើ«សេរីភាព» និងលើកឡើង ពីក្ដីសង្ឃឹម នៃការពង្រឹង«ចំណងទ្វេភាគី» កាន់តែខ្លាំងឡើង ក្នុងឆ្នាំខាងមុខ។ ​អ្នកនាំពាក្យ​ក្រសួង​ការបរទេស របស់ប្រទេសមហាអំណាច ...

Comments are closed.

យល់ស៊ីជម្រៅផ្នែក កម្ពុជា

កម្ពុជា

អាមេរិក​ផ្ដល់វ៉ាក់សាំង Johnson&Johnson ជាង១លានដូស​ជូនកម្ពុជា

កម្ពុជា

សម រង្ស៊ី៖ របបក្រុងភ្នំពេញ និងចិន​ឃុបឃិតគ្នា ដើម្បីកំណត់​តម្លៃ​វ៉ាក់សាំង

បើសិនជាវ៉ាក់សាំងចិនកុម្មុយនីស ហាក់ត្រូវបានកំណត់ ឲ្យក្លាយជាជម្រើសតែមួយគត់នៅកម្ពុជា នោះគឺដោយសារ របបក្រុងភ្នំពេញ និងប្រទេសចិន បានឃុបឃិតគ្នា តាមរយៈអំពើពុករលួយដ៏ធ្ងន់ធ្ងរមួយ ដែលធ្វើឲ្យតម្លៃវ៉ាក់សាំង របស់ប្រទេសកុម្មុយនីស្ដិ៍ មានតម្លៃថ្លៃលើសលុប។ នេះបើតាមការលើកឡើងរបស់លោក សម ...
កម្ពុជា

កម្ពុជា៖ អ្នកជំងឺស្លាប់កើនដល់ ជាង១ពាន់នាក់ – ថ្ងៃនេះស្លាប់៣៩នាក់

ប្រទេសកម្ពុជា មានអ្នកជំងឺកូវីដ-១៩ (Covid-19) ស្លាប់កើនឡើងដល់ ជាង១ពាន់នាក់ បន្ទាប់ពីអ្នកជំងឺ៣៩នាក់​ទៀត បានស្លាប់ក្នុង​ថ្ងៃពុធទី១៥ ខែកក្កដា ឆ្នាំ២០២១។ នេះ បើតាមសេចក្ដីប្រកាសព័ត៌មាន របស់ក្រសួង​សុខាភិបាល​កម្ពុជា ដែលចេញផ្សាយ​នៅមុននេះបន្តិច។ ...