កម្ពុជាដំណឹង

ព្រះរាជាខ្មែរ​យាងទៅ​ចិន មុន ហ៊ុន សែន ដាក់កម្ពុជា​ក្នុង​«ភាពអាសន្ន»

ក្នុងព្រឹកថ្ងៃទី១ ខែមេសានេះ ព្រះមហាក្សត្រកម្ពុជា បានចាកចេញពីប្រទេស ឆ្ពោះទៅ​ប្រទេសចិន នៅខណៈមេរោគ «កូរូណា» ឬ «Covid-19» កំពុងរាតត្បាត និងបន្ទាប់ពី​លោក​នាយករដ្ឋមន្ត្រី ហ៊ុន សែន បានស្នើច្បាប់ ដាក់ប្រទេសក្នុង«ភាពអាសន្ន» ទៅកាន់​រដ្ឋសភា ដែលអាចនឹងចូលជាធរមាន ក្នុងចុងសប្ដាហ៍ខាងមុខ។

ការយាងចាកចេញពីប្រទេស របស់ព្រះករុណា ព្រះបាទសម្តេច​ព្រះបរមនាថ នរោត្តម សីហមុនី ទទួលបានការថ្វាយព្រះរាជដំណើរ ដល់ព្រលានយន្ដហោះ ដោយមេដឹកនាំកំពូលៗ របស់​កម្ពុជា ក្នុងនោះ មានលោក សាយ ឈុំ ប្រធានព្រឹទ្ធសភា លោក ហេង សំរិន ប្រធាន​រដ្ឋសភា និងលោក ហ៊ុន សែន នាយករដ្ឋមន្ត្រី។

ក្នុងព្រះរាជសាររបស់ព្រះមហាក្សត្រ ដែលចុះព្រះហស្ថលេខា ពីម្សិលម៉ិញ (ថ្ងៃទី៣១ ខែមីនា ឆ្នាំ២០២០) ពោលគឺតែមួយថ្ងៃ មុនព្រះរាជដំណើរចាកចេញ បានឱ្យដឹងថា ព្រះករុណា  និង​សម្តេច​ម៉ែ ត្រូវយាងទៅពិនិត្យព្រះរាជសុខភាព នៅរដ្ឋធានីប៉េកាំង ប្រទេស​ចិនកុម្មុយនីស្ដិ៍

ព្រះរាជសារនោះ ឱ្យដឹងបន្ថែមថា ក្នុងពេលព្រះរាជអវត្តមានរបស់​ព្រះមហាក្សត្រ គឺប្រធាន​ព្រឹទ្ធសភា លោក សាយ​ ឈុំ នឹង​ធ្វើ​ជាប្រមុខរដ្ឋស្តី​ទី។

ព្រះរាជដំណើរចេញពីប្រទេស បានធ្វើឡើងពីរថ្ងៃ ក្រោយលោកនាយករដ្ឋមន្ត្រី ហ៊ុន សែន ប្រកាសស្នើច្បាប់ ស្តីពីការគ្រងប្រទេសជាតិ ស្ថិតក្នុង«ភាពអាសន្ន» ទៅកាន់រដ្ឋសភា ដើម្បី​ឲ្យមានការអនុម័ត្រជាបន្ទាន់ និងយ៉ាងយូរនាចុងសប្ដាហ៍នេះ សម្រាប់អ្វីមួយ ដែលបុរស​ខ្លាំង​និយាយថា ដើម្បីចាត់វិធានការ ទល់នឹងមេរោគ «កូរូណា» ឬ«Covid-19»។

ក្នុងការថ្លែង នៅចំពោះក្រុមអ្នក​យកព័ត៌មាន​នោះ មេដឹកនាំរដ្ឋាភិបាលឯកបក្ស បាន​អះអាងជាច្រើនដង ពីការចុះព្រះហស្ថលេខា របស់ព្រះមហាក្សត្រ ដើម្បីដាក់ច្បាប់នេះ ឲ្យចូលជា​ធរមាន​ ក្នុងពេលភ្លាមៗផង។

កាលពីថ្ងៃទី៣១ ខែមីនា ម្សិលម៉ិញ សេចក្តីព្រាងច្បាប់ខាងលើ ក៏ត្រូវបានពិនិត្យរួចរាល់ ក្នុងកិច្ចប្រជុំ គណៈអចិន្ត្រៃយ៍គណៈរដ្ឋមន្ត្រី ដឹកនាំដោយលោក ហ៊ុន សែន និងត្រូវ​បាន​បញ្ជូន ឡើងទៅដល់រដ្ឋសភា រួចជាស្រេចហើយដែរ។ នេះ បើតាមសេចក្តីប្រកាស​ព័ត៌មាន ដែលចេញផ្សាយ ក្រោយកិច្ចប្រជុំនោះ។

មកដល់ថ្ងៃនេះ ក្រសួងសុខាភិបាលកម្ពុជា បានបញ្ចេញតួលេខផ្លូវការ ឲ្យដឹងថា ព្រះរាជា​ណាចក្រទាំងមូល មានករណីឆ្លងជំងឺ «Covid-19» ចំនួន១០៩នាក់ ដែលក្នុងនោះ ២៣នាក់ បានជា​សះស្បើយ។ ក្រសួង​បានអះអាងថា គ្មានករណីឆ្លង នៅក្នុងសហគមន៍ទេ ខណៈប្រទេស​កម្ពុជា គ្មានគោលការណ៍​ធ្វើតេស្ដិ៍ ដើម្បីស្វែងការករណីឆ្លងមេរោគនេះ ចំពោះ​ពលរដ្ឋខ្លួន ជាលក្ខណៈ​ទូលំទូលាយ​ឡើយ៕



You may also like

កម្ពុជា

អ៊ូ ច័ន្ទរ័ត្ន ថា​គ្មាន​បំណង​សុំ​សិទ្ធិ​នយោបាយ​ពី ហ៊ុន សែន ទេ

«គេដក[សិទ្ធិនយោបាយ]ពីយើង ទាំងយើងគ្មានកំហុស ដូច្នេះយើងគ្មានរឿងអី ទៅសុំ[សិទ្ធិនយោបាយនេះ ពី]គេទេ» នេះ ជាការអះអាងឡើងរបស់លោក អ៊ូ ច័ន្ទរ័ត្ន អតីតអ្នកតំណាងរាស្ត្រ មកពីគណបក្សសង្គ្រោះជាតិ នៅព្រឹកនេះ ដើម្បីតបនឹងការធ្វើអត្ថាធិប្បាយមួយចំនួន ...
កម្ពុជា

កម្ពុជា​នៅតែ​មាន​«អំពើ​ពុករលួយ​ធ្ងន់ធ្ងរ​ជាងគេ​ក្នុង​តំបន់ និង​ជាង​ឆ្នាំមុន»

របាយការណ៍សន្ទស្សន៍​ចំណាត់ថ្នាក់ របស់អង្គការតម្លាភាពអន្តរជាតិ (Transparency International) មិនផ្ដល់ក្ដីសោមនស្ស សម្រាប់របបដឹកនាំ របស់លោក ហ៊ុន សែន សព្វថ្ងៃនេះទេ ហើយនៅតែចាត់ទុកកម្ពុជា ថាជាប្រទេសដែលមាន«អំពើ​ពុករលួយ​ធ្ងន់ធ្ងរ​ជាងគេ​ក្នុង​តំបន់ និងខ្លាំងជាងឆ្នាំមុន»។ ...
កម្ពុជា

រដ្ឋាភិបាល​នឹង​ចាត់​វិធានការ​ប្រឆាំង​«អ្នកប្រតិដ្ឋ»​ស្ថានភាព​ជំងឺ ហ៊ុន សែន

អ្នកប្រតិដ្ឋ ឬបង្កើតស្ថានភាពអាក្រក់ ពីសុខភាពរបស់លោកនាយករដ្ឋ ហ៊ុន សែន នឹងត្រូវជាប់ចោទ ពីការប្រព្រឹត្តិ​​បទល្មើសព្រហ្មទណ្ឌ ហើយនឹងរងវិធានការ​យ៉ាងម៉ឺងម៉ាត់ ពីរបបក្រុងភ្នំពេញ។ នេះ បើតាមលោក ផៃ ស៊ីផាន ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...