ឧបការីរងរដ្ឋមន្ត្រីការពារជាតិអាមេរិក មកកម្ពុជាស្នើឲ្យដោះលែង កឹម សុខា
ក្នុងការបំពេញទស្សនកិច្ច នៅកម្ពុជា ចាប់ពីថ្ងៃទី៥ ដល់ថ្ងៃ១៦ ខែមករា ឆ្នាំ២០១៩ ឧបការីរងរដ្ឋមន្ត្រីការពារជាតិអាមេរិក ទទួលបន្ទុកតំបន់អាស៊ីខាងត្បូង និងអាស៊ីអាគ្នេយ៍ លោក «Joseph H. Felter» បានជួបជជែកជាមួយមន្ត្រីរដ្ឋាភិបាលកម្ពុជា ទាក់ទងនឹងសំណុំរឿងជាច្រើន រួមទាំងសំណុំរឿងលោក កឹម សុខា សិទ្ធិសេរីភាពសង្គមស៊ីវិល និងប្រព័ន្ធផ្សព្វផ្សាយនោះផង។
ស្ថានទូតសហរដ្ឋអាមេរិក ប្រចាំកម្ពុជា បានប្រកាសឲ្យដឹង នៅក្នុងសេចក្ដីប្រកាសព័ត៌មានមួយថា លោក «Joseph H. Felter» បានជួបជាមួយលោក នាង ផាត រដ្ឋលេខាធិការក្រសួងការពារជាតិកម្ពុជា នៅរសៀលថ្ងៃទី១៥ ខែមករា ឆ្នាំ២០១៩នេះ ដោយពិភាក្សាពីចក្ខុវិស័យរួម ដែលចង់ឲ្យតំបន់ឥណ្ឌូប៉ាស៊ីហ្វិកមានភាពបើកចំហ និងមានភាពសេរី។
ក្នុងជំនួបនោះ ក៏មានការពិភាក្សាដែរ ជុំវិញទំនាក់ទំនងដ៏ល្អមួយ រវាងយោធា និងយោធា ថាអាចជួយកម្ពុជា ក្នុងការរក្សាអធិបតេយ្យភាពរបស់ខ្លួនបាន ដោយគ្មានការបង្ខិតបង្ខំ ដើម្បីធានាបាននូវសន្តិភាព វិបុលភាព និងឯករាជ្យរបស់ប្រទេសនេះ សម្រាប់មនុស្សជំនាន់ក្រោយ។
សេចក្ដីជូនដំណឹងរបស់ស្ថានទូត នៃប្រទេសមហាអំណាច បានបញ្ជាក់ថា លោកឧបការីរង រដ្ឋមន្ត្រីការពារជាតិអាមេរិក នឹងពិភាក្សាពីជំហានបន្ទាប់ សម្រាប់លើកកម្ពស់កិច្ចសហប្រតិបត្តិការ រវាងយោធានិងយោធា នៅពេលដែលរដ្ឋាភិបាលកម្ពុជា មានភាពជឿនលឿន ក្នុងការពង្រឹងស្ថាប័ន និងអនុវត្តកំណែទម្រង់ ដែលរួមមានការទម្លាក់ចោលបទចោទប្រកាន់ លើលោក កឹម សុខា ប្រធានគណបក្សសង្គ្រោះជាតិ ហើយអនុញ្ញាតឲ្យសង្គមស៊ីវិល និងប្រព័ន្ធផ្សព្វផ្សាយ មានដំណើរការដោយសេរី។
យ៉ាងណា ស្ថានទូតសហរដ្ឋអាមេរិក មិនបានបញ្ជាក់ថា លោក «Joseph H. Felter» បានជជែកពីករណីលោក កឹម សុខា នៅក្នុងជំនួបជាមួយលោក នាង ផាត នោះទេ។
ប្រធានគណបក្សសង្គ្រោះជាតិ លោក កឹម សុខា ត្រូវបានកងកម្លាំងអាជ្ញាធរ ចូលទៅចាប់ខ្លួន ដល់ក្នុងគេហដ្ឋាន កាលពីយប់ថ្ងៃទី២ ចូលមកថ្ងៃទី៣ ខែកញ្ញា ឆ្នាំ២០១៧ មុននឹងបញ្ជូនខ្លួនលោក ទៅឃុំក្នុងពន្ធនាគារត្រពាំងថ្លុង ជិតព្រំដែនវៀតណាម។ នៅមួយឆ្នាំក្រោយមក លោក កឹម សុខា ត្រូវបានចៅក្រមស៊ើបសួរ ផ្ទេរការឃុំខ្លួននេះ មកនៅក្នុងគេហដ្ឋានរបស់លោកវិញ ឯរាជធានីភ្នំពេញ។
មកដល់ពេលនេះ សំណុំរឿងរបស់លោក កឹម សុខា បានអូសបន្លាយពេល ប្រមាណជិត១ឆ្នាំកន្លះហើយ និងកំពុងស្ថិតក្នុងដំណាក់កាល នៃការស៊ើបសួរនៅឡើយ។
ការឃុំឃាំងមេដឹកនាំគណបក្សប្រឆាំង រួមនឹងចំណាត់ការដទៃទៀត ពីរបបដឹកនាំរបស់លោក ហ៊ុន សែន បានរងការរិះគន់ និងប្រតិកម្មយ៉ាងខ្លាំងក្លា ពីសំណាក់សហគមន៍អន្តរជាតិ ជាពិសេសពីបណ្ដាប្រទេស លោកខាងលិច ដែលជាលំហរទីផ្សារដ៏ធំបំផុត សម្រាប់ឲ្យកម្ពុជា នាំផលិតផលចេញទៅលក់។
ប្រតិកម្មរបស់បស្ចឹមលោក ដែលមកដល់ពេលនេះ មានលក្ខណៈស្រួចស្រាវ ដោយហេតុថា សហភាពអ៊ឺរ៉ុបបានបើកនីតិវិធី ដែលមានរយៈពេល៦ខែ និងបន្ថែម៦ខែទៀត ដើម្បីឈានទៅដក ប្រព័ន្ធអនុគ្រោះពន្ធ «EBA» ចេញពីប្រទេសកម្ពុជា បន្ទាប់ពីសហភាពអ៊ឺរ៉ុប បានមើលឃើញ ពីការមិនអើពើនៃរបបដឹកនាំក្រុង ភ្នំពេញ ក្នុងការងាកត្រឡប់ មករកការដឹកនាំ បែបប្រជាធិបតេយ្យសេរី ពហុបក្ស និងការគោរពសិទ្ធិមនុស្ស ឲ្យបានត្រឹមត្រូវវិញ។
នីតិវិធីខាងលើ របស់សហភាពអ៊ឺរ៉ុប អាចនឹងត្រូវសហរដ្ឋអាេមរិក ដើរតាមដែរ។ កាលពីថ្ងៃពុធ ទី០៩ ខែមករា ឆ្នាំ២០១៩សប្ដាហ៍មុន សមាជិកព្រឹទ្ធសភាអាមេរិក ចំនួនពីររូប បានដាក់សំណើរច្បាប់ថ្មីមួយ ដើម្បីតម្រូវឲ្យរដ្ឋបាលរបស់ប្រធានាធិបតី លោក ដូណាល់ ត្រាំ (Donald Trumps) លប់ចោលការអនុគ្រោះពន្ធអាមេរិក ហៅកាត់ថា «GSP» ចេញពីកម្ពុជាដូចគ្នា៕
