កម្ពុជាដំណឹង

របប ហ៊ុន សែន រាំង​ខ្ទប់​១៧គេហទំព័រ​មិន​ឲ្យ​ដំណើរការ​ មុន​និង​ក្នុង​​ថ្ងៃ​បោះឆ្នោត

បើទោះជារងការរិះគន់ ពីការរិតត្បិតសិទ្ធិសេរីភាព ផ្នែកសារព័ត៌មានក៏ដោយ តែរបបដឹកនាំរបស់នាយករដ្ឋមន្ត្រីចាស់វស្សា នៅកម្ពុជា មិនញញើតញញើម ក្នុងការរិតត្បិតលើប្រព័ន្ធផ្សព្វផ្សាយ បន្ថែមទៀតឡើយ។ គេហទំព័ររបស់ស្ថាប័នសារព័ត៌មាន រួមនឹងគេហទំព័ របស់គណបក្សប្រឆាំង សរុបចំនួន១៧ស្ថាប័ន រាប់ទាំងគេហទំព័ររបស់ទស្សនាវដ្ដី មនោរម្យ.អាំងហ្វូ (MONOROOM.info) ផង ត្រូវបានរាំងខ្ទប់ មិនឲ្យដំណើរការ នៅក្នុងប្រទេសកម្ពុជា ចាប់ពីថ្ងៃសៅរិ៍ទី២៨ ខែកក្កដានេះ រហូតដល់ថ្ងៃអាទិត្យ ទី២៩ ខែកក្កដា ដែលជាថ្ងៃបោះឆ្នោតជាតិ។

ស្ថាប័នផ្សព្វផ្សាយ ដែលជាម្ចាស់គេហទំព័ររងគ្រោះ ព្រោះការសម្រេច របស់រដ្ឋាភិបាលក្រុងភ្នំពេញ ត្រូវបានគេស្គាល់ថា ជាស្ថាប័នសារព័ត៌មាន​ឯករាជ្យ ទាំងក្នុងនិងក្រៅស្រុក ដែលតែងផ្ដល់ព័ត៌មានសុក្រិត និងស៊ីជម្រៅ ដូចយ៉ាង វិទ្យុសម្លេងសហរដ្ឋអាមេរិក (khmer.voanews.com) វិទ្យុសម្លេងអាស៊ីសេរី (rfa.org/khmer) វិទ្យុសម្លេងប្រជាធិបតេយ្យ (vodhotnews.com) វិទ្យុវាយោ (vayofm.com) វិទ្យុសម្លេងព្រះសង្ឃឯករាជ្យ (imnsj.org) និងទស្សនាវដ្ដីមនោរម្យ.អាំងហ្វូ (monoroom.info) ជាដើម។ នេះ បើតាមបញ្ជីមួយច្បាប់ ដែលទស្សនាវដ្ដីមនោរម្យ.អាំងហ្វូ ទើបនឹងទទួលបាន ក្នុងថ្ងៃនេះ។ បញ្ជីនោះ បញ្ចប់ត្រឹម១៥ស្ថាប័ន តែគេហទំព័ររបស់សារព័ត៌មាន ខេមបូឌៀដេល្លី (cambodiadaily.com) និងសារព័ត៌មាន ភ្នំពេញប៉ុស្ដិ៍ (postkhmer.com) ក៏ត្រូវបានរាយការណ៍មកដែរ ថាបានរងការរាំងខ្ទប់ ដូចគ្នា។

រីឯគេហទំព័រ និងខ្សែភ្ជាប់ផ្សេងទៀត ដែលរងការរាំងខ្ទប់ នៅក្នុងបញ្ជីដដែលនោះ មួយចំនួនជារបស់គណបក្សប្រឆាំង ឬសារព័ត៌មានគាំទ្រគណបក្សប្រឆាំង និងមួយចំនួនទៀត គ្រាន់តែជាគណនី ឬជាទំព័រមួយ នៅលើគេហទំព័រធំៗ ដូចយ៉ាង «Stuble.info» «Vithyu.com» និង «Pinterest.com» ប៉ុណ្ណោះ។

រដ្ឋាភិបាលចង់គ្រប់គ្រង់សារព័ត៌មាន!

អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន លោក ផុស សុវណ្ណ ត្រូវបានវិទ្យុសម្លេងសហរដ្ឋអាមេរិក (VOA) ស្រង់សំដីមកចុះផ្សាយ ដោយទទួលស្គាល់ថា រដ្ឋាភិបាលពិតជាបានបញ្ជា ទៅក្រុមហ៊ុនផ្ដល់សេវាអ៊ីនធឺណិត ឲ្យរាំងខ្ទប់ការចូលមើល របស់អ្នកប្រើប្រាស់សេវារបស់ខ្លួន។

ដោយបញ្ជៀស មិនបញ្ជាក់ពីមាត្រាណាមួយនៃច្បាប់ ដែលអនុញ្ញាតឲ្យរដ្ឋាភិបាលធ្វើដូច្នេះនោះ លោក ផុស សុវណ្ណ គ្រាន់តែអះអាងថា ខ្លឹមសារព័ត៌មាន ដែលត្រូវបានចេញផ្សាយ ដោយប្រព័ន្ធផ្សព្វផ្សាយខាងលើ «ប៉ះពាល់ទៅដល់ការរារាំង ដូចដែលមានចែងក្នុងច្បាប់បោះឆ្នោត»។ លោកថា៖

«ច្បាប់កម្ពុជាយើង យើងឱ្យថ្ងៃពីរហ្នឹង ថ្ងៃ ស ហ្នឹង គឺយើងមិនឱ្យផ្សាយអ្វីទេណាប្អូន ដោយសារនៅពេលកន្លងទៅ អង្គភាពប៉ុន្មានហ្នឹង ដូចមានភាគច្រើន យើងវាអត់គ្រប់គ្រងអត់បាន និយាយត្រង់»។

នៅលើបណ្ដាញសង្គម លោក គល់ បញ្ហា នាយកអង្គការខុមហ្វ្រែល (Comfrel) ដែលមានជំនាញខាងការបោះឆ្នោត បានប្រតិកម្មចំពោះការរាំងខ្ទប់គេហទំព័រ ទាំងជាង១០ខាងលើ ដូច្នេះថា៖

«បន្ថែមលើបញ្ហាកំពុងមាន, ការបោះឆ្នោត និងលទ្ធផលឆ្នោត អាចប៉ះពាល់ ខ្វះតម្លាភាព និងសុចរិតភាព ព្រោះប្រព័ន្ធផ្សព្វផ្សាយឯករាជ្យ និងគេហទំព័ររបស់ពួកគេ ត្រូវបានបិទ»។

ការរាំងខ្ទប់ដំណើរការ របស់គេហទំព័រផ្សព្វផ្សាយ ទាំង១៧ ជាយុទ្ធនាការមួយទៀត របស់រដ្ឋាភិបាលលោក ហ៊ុន សែន នៅក្នុងចំណោមយុទ្ធនាការជាបន្តបន្ទាប់ នៃការបង្ក្រាបទៅលើប្រព័ន្ធផ្សព្វផ្សាយឯករាជ្យ។ កាលពីអំឡុងខែសីហា ចូលមកខែកញ្ញា ឆ្នាំ២០១៧ វិទ្យុឯកជនក្នុងស្រុក ជាង៣០ស្ថាប័ន បានរងការបង្ខំឲ្យបិទទ្វា ដោយសារវិទ្យុទាំងនោះ លក់ម៉ោងផ្សព្វផ្សាយរបស់ខ្លួន ទៅឲ្យវិទ្យុអាស៊ីសេរី និងវិទ្យុសម្លេងសហរដ្ឋអាមេរិក។ បន្ទាប់មក នៅក្នុងយុទ្ធនាការផ្សេងទៀត ដែលរដ្ឋាភិបាលអះអាងថា ជាការត្រួតពិនិត្យ ផ្នែកពន្ធដារនោះ សារព័ត៌មាន ខេមបូដា ដេលី (The Cambodia Daily) និងវិទ្យុអាស៊ីសេរី ក៏ត្រូវបង្ខំចិត្តបិទទ្វា និងចាកចេញ ពីប្រទេសកម្ពុជាដូចគ្នាដែរ។

ប្រទេសកម្ពុជា ឈរនៅលេខរៀង ទី១៤២ ពីក្នុងចំណោម ១៨០ប្រទេស នៅក្នុងបញ្ជីចំណាត់ថ្នាក់ ស្ដីពីសិទ្ធិសេរីភាពសារព័ត៌មាន ឆ្នាំ២០១៨ របស់អង្គការអ្នកយកព័ត៌មានគ្មានព្រំដែន ដែលជាលេខរៀងមួយ ដ៏អាក្រក់។ ចំណាត់ថ្នាក់នេះ បានធ្លាក់ចុះ១០លេខ បើប្រៀបនឹងចំណាត់ថ្នាក់ឆ្នាំកន្លងទៅ ដែលកម្ពុជាទទួលបាន។ ជាមួយនឹងចំណាត់ថ្នាក់ថ្មីនេះ អង្គការអ្នកយកព័ត៌មានគ្មានព្រំដែន បានអះអាងថា ប្រព័ន្ធផ្សព្វផ្សាយដ៏ច្រើនលើសលប់ នៅក្នុងប្រទេសកម្ពុជា សុទ្ធសឹងជាកម្មសិទ្ធ របស់ក្រុមសាច់ញាតិ និងមនុស្សជំនិតរបស់លោក ហ៊ុន សែន ខណៈប្រព័ន្ធផ្សព្វផ្សាយឯករាជ្យ ដែលមានចំនួនសេសសល់ ដ៏តិចតួចនោះ តែងរងការបង្ក្រាប ដោយគ្មានមេត្តាសោះឡើយ ពីសំណាក់របបដឹកនាំរបស់លោក៕



You may also like

កម្ពុជា

ហ៊ុន សែន ត្រៀម​ចំអក​ឲ្យ សម រង្ស៊ី ថាជា«ទន្សាយរត់បានឆ្ងាយ»

ទំនុកចម្រៀងថ្មីមួយទៀត «បងជា ទន្សាយរត់បានឆ្ងាយ» កំពុងត្រៀមចេញ នៅក្នុងថាសចម្រៀងលើកក្រោយ។ នេះ បើតាមការអះអាងរបស់លោក ហ៊ុន សែន នាយករដ្ឋមន្ត្រីកម្ពុជា ចេញពីពិធីបើកការដ្ឋានសាងសង់មន្ទីរពេទ្យ «មិត្តភាពកម្ពុជា-ចិន ត្បូងឃ្មុំ» ...
កម្ពុជា

សម រង្ស៊ី តម្រូវ​ឲ្យ «ហ៊ុន សែន ត្រូវ​ដោះលែង កឹម សុខា មុន​គេ»

ការប្ដូរជំហររបស់របបដឹកនាំក្រុងភ្នំពេញ ដែលមានគម្រោង​កែច្បាប់ជាថ្មី ដើម្បីបើកលទ្ធភាព ឲ្យមន្ត្រីគណបក្សសង្គ្រោះជាតិ ទាំង១១៨នាក់ អាចមានសិទ្ធិ ធ្វើសកម្មភាពនយោបាយ​ឡើងវិញ បន្ទាប់ពីពួកគេ ត្រូវបានតុលាការហាមឃាត់ តាំងពីខែវិច្ឆិកា ឆ្នាំ២០១៨មកនោះ មិនត្រូវបានលោក សម ...
កម្ពុជា

ហ៊ុន សែន បញ្ជាតាម​សារបែកធ្លាយ​ឲ្យ«សម្លាប់ក្រុមប្រឆាំង»​ក្នុងស្រុក​ឲ្យអស់

មេដឹកនាំដ៏មានអំណាច របស់កម្ពុជា លោក ហ៊ុន សែន បានបញ្ជាទៅមនុស្សក្រោមបង្គាប់​លោក ឲ្យ«សម្លាប់ក្រុមប្រឆាំង» នៅក្នុងប្រទេសឲ្យអស់ ដោយលោកបានបញ្ជាក់ថា ការព្យួរប្រព័ន្ធអនុគ្រោះពន្ធ ពីសំណាក់សហភាពអ៊ឺរ៉ុប គឺជា«ឱកាស»​សម្រាប់​​របបដឹកនាំ​របស់លោក  ក្នុងការ«លត់​ពួកអានៅ​ខាងក្នុង»​ដូច្នេះ​ហើយ។ ...

Comments are closed.

កម្ពុជា

សម រង្ស៊ី ថាមិនខ្វល់​ពីសំដី«កូនក្នុងខោ-កូនក្រៅខោ»​របស់ កឹម សុខា

កម្ពុជា

បន្ទាប់ពី​ទទួលវ៉ាក់សាំងចិន ហ៊ុន សែន សុំជំនួយ​វ៉ាក់សាំង​ ពីប្រទេសឥណ្ឌា

មេដឹកនាំកម្ពុជា លោក ហ៊ុន សែន បាន​ស្នើ​សុំជំនួយ​វ៉ាក់សាំង​បង្ការជំងឺកូវីដ១៩ (Covid-19) ពីប្រទេសឥណ្ឌា បន្ទាប់ពីប្រទេសនេះ បានប្រកាសដាក់​ឲ្យប្រើប្រាស់យ៉ាងបន្ទាន់ នូវថ្នាំវ៉ាក់សាំងរបស់ខ្លួន ឈ្មោះ«Covaxin» និង«Covishield» សម្រាប់ពលរដ្ឋឥណ្ឌា ...
កម្ពុជា

Covid-19៖ កម្ពុជាប្រកាស​រកឃើញ​ករណីឆ្លង កើនឡើង​ដល់៤៣៩នាក់

មកទល់នឹងព្រឹកថ្ងៃអាទិត្យ​ទី១៧ ខែមករា ឆ្នាំ២០២១នេះ កម្ពុជាប្រកាសបានរកឃើញ ករណីឆ្លងជំងឺកូវីដ (Covid-19) កើនឡើង​ដល់៤៣៩នាក់ បន្ទាប់ពីបានរកឃើញករណីឆ្លង លើពលករខ្មែរ​៣នាក់បន្ថែមទៀត ដែលទើបធ្វើដំណើរ​មកពីប្រទេសថៃ។ នេះ បើតាមសេចក្ដីប្រកាសព័ត៌មាន របស់ក្រសួងសុខាភិបាលកម្ពុជា ...