«ហ៊ុន សែន រង់ចាំ​ដល់ថ្ងៃ​៣១កុម្ភៈ ទើបហ៊ានចាក់វ៉ាក់សាំង របស់ចិន» នេះ ជាការចំអកឡើង របស់លោក សម រង្ស៊ី មេដឹកនាំប្រឆាំង នៅចំពោះផ្លាស់ប្ដូរ​ជំហររបស់នាយករដ្ឋមន្ត្រីកម្ពុជា ដែលបានសម្រេចថា លោក«ឈប់ចាក់វ៉ាក់សាំង» ដែលជា​ជំនួយរបស់ប្រទេសចិន ក្រោមហេតុផលថា លោកមានអាយុ​ច្រើនជាង៦០ឆ្នាំ។

លោក ហ៊ុន សែន បានប្រកាសឲ្យដឹង ពីការប្ដូរជំហររបស់លោក តាមរយៈសំណេរផ្ទាល់ដៃ នៅលើបណ្ដាញសង្គម កាលពីល្ងាចថ្ងៃសុក្រ ទី៥ ខែកុម្ភៈ ឆ្នាំ២០២១នេះ។ បុរសខ្លាំងនៅកម្ពុជា បានសរសេរថា៖

«ខ្ញុំទើបបានទទួលព័ត៍មាន តាមរយៈក្រសួងសុខាភិបាល ដែលបានទទួលលិខិតផ្លូវការ ពីការិយាល័យនៃ​ទីប្រឹក្សា​សេដ្ឋកិច្ច និងពាណិជ្ជកម្ម ប្រចាំស្ថានទូត​នៃសាធារណរដ្ឋប្រជាមានិតចិន ប្រចាំ​ព្រះរាជាណាចក្រ​កម្ពុជា ដែលបញ្ជាក់ថា វ៉ាក់សាំងឈ្មោះសុីណូហ្វាម (SinoPharm) ចាក់បានតែមនុស្ស​មានអាយុពី ១៨ឆ្នាំ ទៅ៥៩ឆ្នាំតែប៉ុណ្ណោះ។»

មេដឹកនាំរដ្ឋាភិបាលកម្ពុជា​ បានបន្តថា៖

«សម្រាប់ខ្ញុំ ដែលមានអាយុជាង៦៨ឆ្នាំទៅហើយ មិនទាន់អាចចាក់បានទេ។ ដូចនេះគម្រោងចាក់វ៉ាក់សាំង ដែលគ្រោងចាក់នៅថ្ងៃទី១០ កុម្ភៈ ២០២១ នៅមន្ទីរពេទ្យកាល់ម៉ែត្រ នឹងត្រូវលុបចោល អាស្រ័យដោយទាំងខ្ញុំ ទាំងមន្ត្រីជាន់ខ្ពស់ផ្សេងទៀត​ភាគច្រើន មានអាយុលើសពី ៦០ឆ្នាំទៅហើយ មិនអាចចាក់បានទេ។»

ប៉ុន្មាននាទីក្រោយមក លោក សម រង្ស៊ី ដែលជាគូបដិបក្ខនយោបាយ ដ៏ស្រួចស្រាវរបស់លោកនាយករដ្ឋមន្ត្រី បានសរសេរចំអក តបនឹងការប្ដូរជំហរខាងលើ ជាមួយនឹងពាក្យសំដី «ថ្ងៃ៣១កុម្ភៈ» ដែលបុរសខ្លាំងធ្លាប់ប្រើកន្លងមក។

ក្នុងចម្លើយ​ទៅនឹងសំនួរ របស់ប្រិយមិត្តម្នាក់ លោក សម រង្ស៊ី បានសរសេរឡើងថា៖

«ហ៊ុន សែន កំពុងភ័យ ពីព្រោះវ៉ាក់សាំងចិននេះ ប្រទេសនៅទ្វីបអឺរ៉ុប និងនៅទ្វីបអាមេរិកខាងជើង គេមិនទាន់ទទួលស្គាល់ទេ ដោយសារ​មិនទាន់មាន ការធានាប្រសិទ្ធភាព និងសុវត្ថិភាព របស់វ៉ាក់សាំងនេះ ឲ្យបានគ្រប់គ្រាន់នៅឡើយទេ។ ហ៊ុន សែន រង់ចាំ​ដល់ថ្ងៃ​៣១កុម្ភៈ ទើបហ៊ានចាក់វ៉ាក់សាំង របស់ចិននេះ។»

កាលពីព្រឹក​ថ្ងៃព្រហស្បត្តិ៍ ទី៤ ខែកុម្ភៈ លោក ហ៊ុន សែន បានថ្លែងតាមសារសម្លេងមួយ ប្រកាសឲ្យដឹងថា វ៉ាក់សាំង «SinoPharm» ដែលជាជំនួយរបស់ចិន ប្រមាណ ៦០ម៉ឺនដូស ក្នុងចំណោម ១លានដូស នឹងមកដល់ប្រទេសកម្ពុជា នៅថ្ងៃទី​០៧ ខែកុម្ភៈ ឆ្នាំ២០២១។ នៅថ្ងៃនោះ កម្ពុជានឹងរៀបចំពិធីដ៏ធំដុំ ដើម្បីទទួលវ៉ាក់សាំង​ទាំងនោះ ដល់​ព្រលាន​យន្ដហោះពោធ៍ចិនតុង ក្រោមវត្តមានរបស់លោក ហ៊ុន សែន នាយករដ្ឋមន្ត្រី លោក ទៀ បាញ់ ឧបនាយក​រដ្ឋមន្ត្រី-រដ្ឋមន្ត្រី​ការពារជាតិ និងលោក ហោ ណាំហុង ឧបនាយករដ្ឋមន្ត្រី។

ក្នុងសារសម្លេង​ដដែល លោក ហ៊ុន សែន បានបញ្ជាក់ទៀតថា លោកនឹងរៀបចំពិធី​ចាក់វ៉ាក់សាំង សម្រាប់​រូបលោក​ដំបូងគេ នៅថ្ងៃទី១០ ខែកុម្ភៈ រួមជាមួយមន្ត្រីគ្រាក់ៗរបស់លោក ជាច្រើននាក់ទៀត៕

០៥ កុម្ភៈ ២០២១ / 05 February 2021 -Breaking news on Chinese vaccine.For the first time China warns that its vaccine…

Posted by Sam Rainsy on Friday, February 5, 2021


លំអិតបន្ថែមទៀត

កម្ពុជា

សម រង្ស៊ី បន្តផ្ញើរសារឲ្យ «ស ខេង វ៉ៃ ហ៊ុន សែន មុន ហ៊ុន សែន វ៉ៃ ស ខេង»

ជាថ្មីម្ដងទៀត មេដឹកនាំប្រឆាំងកម្ពុជា លោក សម រង្ស៊ី បានថ្លែងឲ្យដឹងថា រវាងលោក ហ៊ុន សែន នាយករដ្ឋមន្ត្រី និងលោក ស ខេង ...
របាយការណ៍

ប្រ៊ែដ អាដាម៖ ភាព​ទន់ភ្លន់​របស់​អ៊ឺរ៉ុប​ចំពោះ ហ៊ុន សែន ជា​ពេលខ្ជះខ្ជាយ

នាយកអង្គការឃ្លាំមើលសិទ្ធិមនុស្ស ទទួលបន្ទុកតំបន់អាស៊ី លោក ប្រ៊ែដ អាដាម (Brad Adams) បានអះអាង​ថា ការប្រើប្រាស់​វិធីសាស្ត្រ​ការទូត តាមបែបទន់ភ្លន់ ជាមួយលោកនាយករដ្ឋមន្ត្រី ហ៊ុន សែន ...

យល់ស៊ីជម្រៅផ្នែក កម្ពុជា

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...

Comments are closed.