កម្ពុជាដំណឹង

សម រង្ស៊ី ថា​បណ្ដឹង ហ៊ុន សែន នៅ​តុលាការ​បារាំង ជា​«ល្បិច»​បង្វែរ​រឿង

ដំណឹងនៃការដាក់បណ្ដឹង ទៅកាន់តុលាការបារាំង ដោយក្រុមមេធាវីរបស់លោកនាយករដ្ឋមន្ត្រី ហ៊ុន សែន ទទួលបានប្រតិកម្មមកវិញភ្លាមៗ ពីលោក សម រង្ស៊ី មេដឹកនាំប្រឆាំងក្នុងយប់ថ្ងៃនេះ។ តែប្រធានស្ដីទីគណបក្សប្រឆាំង ដែលជាភាគីចុងបណ្ដឹង បានចាត់ទុកបណ្ដឹងនោះ ថាជា«ល្បិច»បង្វែរស្ថានការណ៍ របស់លោក ហ៊ុន សែន ហើយបានថ្លែងអំពាវនាវ កុំឱ្យធ្វើការចាប់អារម្មណ៍។

ប្រព័ន្ធឃោសនារបស់របបក្រុងភ្នំពេញ បានអះអាងថា ពាក្យបណ្ដឹងចំនួនពីរផ្សេងពីគ្នា របស់លោក ហ៊ុន សែន នាយករដ្ឋមន្ត្រី​ និងលោក ឌី វិជ្ជា ស្នងការរងនគរបាលជាតិ ត្រូវបានក្រុមមេធាវីបារាំង ដាក់ឡើងទៅចៅក្រមស៊ើបអង្កេត នៃតុលាការរដ្ឋធានីប៉ារីស ដើម្បីប្ដឹងលោក សម រង្ស៊ី ពីបទបរិហារកេរ្តិ៍ ជុំវិញការបង្ហោះសារ នៅលើបណ្ដាញសង្គម និងការផ្ដល់បទសម្ភាស របស់មេដឹកនាំប្រឆាំង ទាក់ទងនឹងមរណភាព នៃអតីតអគ្គស្នងការនគរបាល លោក ហុក ឡងឌី

សេចក្ដីប្រកាសព័ត៌មានចំនួនពីរ ដែលចេញផ្សាយ ដោយការិយាល័យមេធាវី «S.C.P LEICK RAYNALDY & ASSOCIES» បានឲ្យដឹងថា ការបង្ហោះសារ និងការផ្ដល់បទសម្ភាសនោះ ជាការចោទប្រកាន់ «យ៉ាងឆ្កួតលីលា និងធ្ងន់ធ្ងរ» ដែល«មិនអាចអត់ឱន ឲ្យបានជាដាច់ខាត»។ អត្ថបទជាភាសាបារាំងនោះ បានសរសេរថា៖

«ពេលនេះ វាអាស្រ័យលើតុលាការបារាំង ក្នុងការវិនិច្ឆ័យថា ដែនកំណត់នៃសេរីភាព សម្រាប់ការបញ្ចេញមតិ ត្រូវបានរំលោភបំពាន។»

បើតាមសេចក្ដីជូនដំណឹងនោះ ការចោទប្រកាន់ ដែលលើកឡើង​នៅក្នុងពាក្យបណ្ដឹង ទំនងជាពាក់ព័ន្ធ​នឹងសំណេរមួយ (ខាងក្រោមនេះ) ដែលត្រូវបានបង្ហោះ នៅលើទំព័រហ្វេសប៊ុកលោក សម រង្ស៊ី កាលពីដើមខែមិថុនា ឆ្នាំ២០១៩៖

០២ មិថុនា ២០១៩ / 02 June 2019 – Hun Sen behind Hok Lundy’s death (*) ហ៊ុន សែន ជាអ្នកសម្លាប់ ហុក ឡង់ឌី…

Publiée par Sam Rainsy sur Dimanche 2 juin 2019


នៅចំពោះព័ត៌មានខាងលើ លោក សម រង្ស៊ី បានសំដែងការស្វាគមន៍ និងអះអាងថា វាជាឱកាសសម្រាប់ឲ្យរូបលោក និងលោក ហ៊ុន សែន អាចតតាំងគ្នា នៅចំពោះប្រព័ន្ធយុត្តិធម៌មួយ​នៅបរទេស ដែលល្បីល្បាញថា មានភាពឯករាជ្យ។

តាមរយៈកិច្ចសម្ភាសមួយ ទៅឲ្យវិទ្យុសម្លេងសហរដ្ឋអាមេរិក «VOA» ប្រធានស្ដីទីគណបក្សប្រឆាំង បានអះអាងថា៖

«ខ្ញុំសប្បាយចិត្តមែនទែន ខ្ញុំស្វាគមន៍ពាក្យបណ្ដឹងលោក ហ៊ុន សែន នេះ ពីព្រោះជាឱកាស ជាឱកាសដ៏កម្រ ជាលើកទីមួយហើយ ដែលខ្ញុំនឹងតតាំងជាមួយនឹងលោក ហ៊ុន សែន នៅចំពោះមុខតុលាការបារាំង ដែលជាតុលាការឯករាជ្យ។ ពីមុន ពាក្យបណ្ដឹងលោក ហ៊ុន សែន ជាពាក្យបណ្ដឹងលេងសើច ចំពោះមុខតុលាការអាយ៉ងរបស់គាត់។»

«ម្ដងនេះ យើងមកតតាំង នៅចំពោះមុខតុលាការបារាំង តុលាការឯករាជ្យ អាហ្នឹងទាល់តែមានភស្ដុតាងត្រឹមត្រូវ ទាល់តែយើងលាតត្រដាងការពិត មិនអាចនិយាយតាមតែចិត្ត ដូចដែលគាត់ធ្វើ នៅប្រទេសកម្ពុជាទេ។»

«ល្បិច» ហ៊ុន សែន – សម រង្ស៊ី

ប៉ុន្តែមេដឹកនាំប្រឆាំងរូបនេះ ដែលជាគូបដិបក្ខនយោបាយ ដ៏ស្រួចស្រាវ​របស់លោក ហ៊ុន សែន បានគិតថា ពាក្យបណ្ដឹងខាងលើ បានជួនចំពេល និងជា«ល្បិច»បង្វែរស្ថានការណ៍ ដើម្បីកុំឲ្យបណ្ដាជនចាប់អារម្មណ៍ ពីដំណើររបស់លោក ក្នុងការវិលត្រឡប់​មកកាន់មាតុភូមិវិញ។ 

លោក សម រង្ស៊ី បានផ្ដល់កិច្ចសម្ភាស ពីប្រទេសអូស្ត្រាលីថា៖

«ខ្ញុំគិតថា នេះ គ្រាន់តែល្បិចលោក ហ៊ុន សែន។ លោក ហ៊ុន សែន គាត់ភ័យស្លន់ស្លោរ បន្ទាប់ពីខ្ញុំបានប្រកាសថា ខ្ញុំនឹងមកដល់ប្រទេសកម្ពុជា ថ្ងៃ៩វិច្ឆិកា ខាងមុខ គឺគាត់ភ័យមែនទែន ដូច្នេះ គឺគាត់ដាក់ពាក្យបណ្ដឹងយ៉ាងប្រថុចញុច យ៉ាងតក់ក្រហល់នេះ ដើម្បីធ្វើម៉េច ឲ្យខ្ញុំហ្នឹងជាប់ការងារនៅប្រទេសបារាំង តតាំងជាមួយគាត់ តាមនីតិវិធីតុលាការនៅប្រទេសបារាំងហ្នឹង គ្រាន់តែជាល្បិចទេ។»

មេដឹកនាំប្រឆាំង បានបន្តថ្លែងទៀតថា៖ 

«ខ្ញុំសូមប្រកាសប្រាប់ទៅលោក ហ៊ុន សែន វិញ ខ្ញុំឲ្យមេធាវីខ្ញុំ ដោះស្រាយបញ្ហានេះ ឲ្យក្ដាប់សំនុំរឿងនៅចំពោះតុលាការបារាំងនេះ ខ្ញុំអត់បារម្ភទាល់តែសោះ ខ្ញុំមានជំនឿថា លោក ហ៊ុន សែន នឹងបរាជ័យហើយ។ តែរឿងនេះ មិនជារឿងសំខាន់ប៉ុន្មានទេ រឿងដែលសំខាន់គឺរឿងខ្ញុំវិលត្រឡប់ ទៅប្រទេសកម្ពុជាវិញ ថ្ងៃទី៩វិច្ឆិកាខាងមុខនេះ។»

«គម្រោងរបស់ខ្ញុំ អត់មានអីប្រែប្រួលទេ ថ្ងៃ៩វិច្ឆិកា ឆ្នាំ២០១៩ នៅសល់ពីរខែកន្លះនេះ ខ្ញុំមកដល់ប្រទេសកម្ពុជាវិញហើយ។ ទីពីរ សូមឲ្យបងប្អូនកុំមានមន្ទិលសង្ស័យ ខ្ញុំមកនេះគឺដើម្បីបំផុសកម្លាំងប្រជារាស្ត្រ កម្លាំងកងកម្លាំងប្រដាប់អាវុធស្នេហាជាតិ ដើម្បីទៅចាប់លោក ហ៊ុន សែន មិនមែនឲ្យលោក ហ៊ុន សែន មកចាប់ខ្ញុំទេ។ យើងទាំងអស់គ្នា ទៅចាប់លោក ហ៊ុន សែន យកទៅកាន់ទោស ពីបទធ្វើបាបរាស្ត្រ ពីបទបំផ្លាញជាតិ ពីបទលក់ជាតិ និងពីបទក្បត់ជាតិ។»

ក្នុងករណីដូចគ្នានេះ លោក សម រង្ស៊ី ក៏បានរងបណ្ដឹងមួយផ្សេងទៀត ពីសំណាក់លោក ស ខេង រដ្ឋមន្ត្រីមហាផ្ទៃ ទៅកាន់តុលាការក្នុងប្រទេសកម្ពុជាដែរ។ ពាក្យបណ្ដឹងនោះ ត្រូវបានមេដឹកនាំប្រឆាំង វាយតម្លៃថា លោក ស ខេង គ្រាន់តែធ្វើតាម«បញ្ជា» របស់លោក ហ៊ុន សែន ដើម្បីបញ្ជាក់ពី«ភក្ដីភាព»​របស់ខ្លួន ចំពោះបុរសខ្លាំងកម្ពុជាប៉ុណ្ណោះ។

រីឯការលើកឡើងរបស់លោក នៅលើបណ្ដាញសង្គម ជុំវិញមរណភាពរបស់លោក ហុក ឡងឌី ក្នុងហេតុការណ៍គ្រោះថ្នាក់ឧទ្ធម្ភាគចក្រ កាលពីឆ្នាំ២០០៨នោះ ត្រូវបានលោក សម រង្ស៊ី ពន្យល់ជាថ្មីថា៖

«អាហ្នឹងយើងឲ្យអ្នកបច្ចេកទេស អ្នកដែលមានជំនាញ ខាងយន្ដហោះ ខាងឧទ្ធម្ភាគចក្រ ខាងគ្រោះថ្នាក់យន្ដហោះ គ្រោះថ្នាក់ឧទ្ធម្ភាគចក្រ ថាតើគេមានបច្ចេកទេសយ៉ាងម៉េច ដើម្បីបង្ហាញថា តើមូលហេតុនៃការធ្លាក់ឧទ្ធម្ភាគចក្រនោះ តាមរូបភាពធ្លាក់ទៅ វាទៅជាយ៉ាងម៉េច។ សុទ្ធតែអ្នកជំនាញ អ្នកបច្ចេកទេសគេអាចបញ្ជាក់ពីការពិត។»

«រហូតមកដល់ពេលនេះ លោក ហ៊ុន សែន មិនដែលឲ្យមានការស៊ើបអង្កេតអី ត្រឹមត្រូវទេ ចេះតែលាក់បាំងៗ។ តែឥឡូវនេះ មិនអាចលាក់បាំង នៅចំពោះតុលាការបារាំងបានទេ បើចង់មកប្ដឹងនៅតុលាការបារាំង ត្រូវតែលាតត្រដាងការពិត លាតត្រដាងភស្ដុតាង ហើយខ្ញុំជឿថា ភស្ដុតាងទាំងអស់នោះ គឹអ្នកដែលគេមានជំនាញ គេស្រួលផ្ទៀងផ្ទាត់ គេងាយធ្វើសេចក្ដីសន្និដ្ឋានណាស់៕»



លំអិតបន្ថែមទៀត

កម្ពុជា

ហ៊ុន សែន ប្ដេជ្ញាកម្ចាត់ក្រុមប្រឆាំង ស្មើនឹងគោលដៅ​«កម្ចាត់​ប៉ុលពត»

នាយករដ្ឋមន្ត្រីបីទសវត្សន៍ជាង របស់កម្ពុជា បានប្រកាសនៅថ្ងៃនេះ ថាលោកប្ដេជ្ញា ដាក់គោលដៅ ក្នុងការកម្ចាត់ក្រុមប្រឆាំង ស្មើនឹងគោលដៅរបស់លោក ក្នុងការ«កម្ចាត់​ប៉ុលពត»។ ការថ្លែងដូច្នេះ របស់លោកនាយករដ្ឋមន្ត្រី ហ៊ុន សែន ធ្វើឡើងបន្ទាប់ពីលោកបានរំលឹក ...
កម្ពុជា

Covid-19៖ ថៃដាក់​កម្ពុជា ក្នុងចំណោម​៥ប្រទេស ដែល​មាន​ហានិភ័យ​ខ្ពស់

ប្រទេសកម្ពុជា ជាប់ឈ្មោះក្នុងបញ្ជីប្រទេសទាំង៥ ដែល​មាន​ហានិភ័យ​ខ្ពស់ ក្នុងការឆ្លងជំងឺ «Covid-19» និងដែលថៃត្រូវផ្អាកទំនាក់ទំនង ជាបណ្ដោះអាសន្ន។ នេះ បើតាមការសេចក្ដីសម្រេច របស់ក្រសួងសុខភាពសាធារណៈ របស់ប្រទេសថៃ ដែលចេញផ្សាយឲ្យដឹង ក្នុងថ្ងៃពុធ ...
កម្ពុជា

កូនស្រីធម៌ ហ៊ុន សែន រងបណ្ដឹង​ពី​ប្អូនស្រី ហ៊ុន សែន ពីបទ​បរិហាកេរ្ដិ៍

នៅថ្ងៃអង្គារនេះ អ្នកស្រី ហ៊ុន ស៊ីណាត ប្អូនស្រីបង្កើតលោក ហ៊ុន សែន បានដាក់ពាក្យ​បណ្ដឹង ឡើង​ទៅតុលាការ ប្ដឹងតារា​ចម្រៀង​វ័យជ្រេ នាង ម៉េង កែវពេជ្ជតា ...

Comments are closed.

យល់ស៊ីជម្រៅផ្នែក កម្ពុជា

កម្ពុជា

Covid-19៖ កម្ពុជាមានអ្នកជំងឺ​កើន«ដល់​២២៣៣​ករណី ស្លាប់១០នាក់»

កម្ពុជា

Covid-19៖ កម្ពុជាប្រកាស​«ករណីស្លាប់ទី៩» ពីចំណោម​អ្នកស្លាប់១៥នាក់

ប្រទេសកម្ពុជា បានប្រកាសឲ្យដឹងពី​«ករណីស្លាប់ទី៩» ដោយសារជំងឺកូវីដ-១៩ (Covid-19) ក្នុងរសៀលថ្ងៃសៅរ៍​ទី២៧ ខែមីនានេះ។ ករណីនេះ ជាមរណភាពទី២ ដែលត្រូវបានប្រកាស​ក្នុងថ្ងៃសៅរ៍តែមួយ តែមរណភាពទី១ មិន​ត្រូវបាន​​រាប់​បញ្ចូលថា ស្លាប់ដោយជំងឺរាតត្បាតទេ។ នេះ ...
កម្ពុជា

Covid-19៖ កម្ពុជាមានអ្នកជំងឺស្លាប់ ២នាក់ទៀត ក្រោយ​ផ្លាស់មន្ទីរពេទ្យ

អ្នកជំងឺ ២នាក់ទៀត បានទទួលមរណភាព ដោយសារជំងឺកូវីដ-១៩ (Covid-19)។ ជនរងគ្រោះទាំងពីររូបនោះ ដែល​ម្នាក់ជាជនជាតិខ្មែរ និងម្នាក់ទៀត ជាជនជាតិចិន ត្រូវបានដាក់ឲ្យព្យាបាលដំបូងឡើយ នៅទីកន្លែងផ្សេង ពីមន្ទីរពេទ្យ​រុស្ស៊ី។ រហូតលុះត្រាស្ថានភាពជំងឺធ្ងន់ធ្ងរ ...