កម្ពុជាដំណឹង

RSF ព្រមានក្រុងភ្នំពេញ នឹងលើក​សំនុំរឿង​ចាប់ចង​អ្នកកាសែត ឡើង​ទៅ EU

លោក រស់ សុឃិត ចាងហ្វាងកាសែតជាតិខ្មែរ ត្រូវបានថតរូប ក្នុងអំឡុងពេលចាប់ខ្លួន។ (រូបថតនគរបាល)
លោក រស់ សុឃិត ចាងហ្វាងកាសែតជាតិខ្មែរ ត្រូវបានថតរូប ក្នុងអំឡុងពេលចាប់ខ្លួន។ (រូបថតនគរបាល)

អង្គការអ្នកយកព័ត៌មានគ្មានព្រំដែន (RWB /RSF) អះអាងថា នឹងលើកយកសំនុំរឿង ចាប់ចងអ្នកកាសែត នៅក្នុងប្រទេសកម្ពុជា ឡើងទៅសហភាពអ៊ឺរ៉ុប (EU) ដើម្បី​អំពាវនាវ​ឱ្យស្ថាប័នអន្តរ-រដ្ឋាភិបាលមួយនេះ រឹតបន្តឹងវិធានការ ព្យួរប្រព័ន្ធអនុគ្រោះពន្ធ «EBA» បន្ថែមពីលើវិធានការ ដែលមានស្រាប់។

ការតំឡើងសម្លេង របស់ស្ថាប័នអន្តរជាតិ ដែលមានជំនាញខាងការឃ្លាំមើល សេរីភាព​សារព័ត៌មាន នៅជុំវិញ​ពិភពលោក ធ្វើឡើង បន្ទាប់ពីហេតុការណ៍ចាប់ចង និងរឹតត្បិត លើអ្នកសារព័ត៌មាន និងស្ថាប័ន​ផ្សព្វផ្សាយ បានកើតឡើង​ជាហូរហែ នៅក្នុងប្រទេស​កម្ពុជា រាប់ចាប់តាំង​ពីចុងខែមីនា ឆ្នាំ២០២០​នេះមក។

ហេតុការណ៍ចុងក្រោយបំផុត គឺការចាប់ខ្លួនលោក រស់ សុឃិត ចាងហ្វាងកាសែតជាតិខ្មែរ កាលពីថ្ងៃទី២៥ ខែមិថុនា ឆ្នាំ២០២០ ភ្លាមៗបន្ទាប់ពីអ្នកសារព័ត៌មានរូបនេះ បាន​បង្ហោះ​អត្ថបទរិះគន់ធ្ងន់ៗ ទៅលើ​លោក​នាយករដ្ឋមន្ត្រី ហ៊ុន សែន និងការដឹកនាំរបស់លោក។ អត្ថបទ​ចំនួន២ ដែលអ្នកកាសែតខាងលើ បានសរសេរ​នៅលើ​​គណនេយ្យ​ហ្វេសប៊ុក​​របស់​ខ្លួន មានចំណងជើង​ទាំងស្រុងថា៖

«លោក ហ៊ុន សែន នឹងបាត់បង់អ្វីៗទាំងអស់ បើនៅតែចចេស ចង់លើកបន្តុបកូនខ្លួន ធ្វើជានាយករដ្ឋមន្ត្រីនោះ! យួនមិនគាំទ្រ ហ៊ុន ម៉ាណែត ឡើយ!»

«លោក ហ៊ុន សែន កំពុងទល់ច្រក​ រឿងពលរដ្ឋ​ធ្លាក់ខ្លួន​ក្រីក្រ​ គ្មានលុយសង​ធនាគារ ក៏លើក​ទឹកចិត្ត​ឲ្យធនាគារ រឹបអូសទ្រព្យសម្បត្តិ ពលរដ្ឋណា ស្តាប់តាមក្រុមប្រឆាំង មិន​ព្រម​សង់លុយ ​ឲ្យធនាគារ!»

លោក សុឃិត ត្រូវបានចាប់ខ្លួន នៅខេត្តកំពង់ឆ្នាំង និងត្រូវបានចោទប្រកាន់ នៅ៣ថ្ងៃ​ក្រោយមក (ថ្ងៃទី២៨ ខែមិថុនា) ដោយតុលាការរាជធានី ពីបទ«ញុះញង់​ឲ្យប្រព្រឹត្ត​បទ​ឧក្រិដ្ឋ ជាអាទិ៍» តាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។ បើតាមបទ​ចោទប្រកាន់ខាងលើ ចាងហ្វាងកាសែតជាតិខ្មែររូបនេះ អាចជាប់ពន្ធនាគារ ២ឆ្នាំ។

ក្នុងសេចក្តីថ្លែងការណ៍របស់ខ្លួន ចុះថ្ងៃទី២៩ ខែមិថុនា អង្គការ «RSF» ដែលមាន ទីស្នាក់ការធំ ក្នុងរដ្ឋធានីប៉ារីស (បារាំង) បានទាមទារឲ្យមាន​ការដោះលែង​លោក រស់ សុឃិត «ជាបន្ទាន់»។ បើតាមអង្គការខាងលើ អ្នកកាសែត រស់ សុឃិត មិនត្រូវបាន​ចាប់​ខ្លួន ដោយគ្រាន់តែលោកបង្ហោះសារ តាមទំព័រហ្វេសប៊ុក រិះគន់​លោក ហ៊ុន សែន នោះឡើយ។

លោក ដានីញែល បាស្តារដ៍ (Daniel Bastard) នាយកការិយាល័យ តំបន់អាស៊ីប៉ាស៊ីហ្វ្រិក នៃ​អង្គការនេះ បានសរសេរក្នុងទូរសាអេឡិចត្រូនិក ផ្ញើមកកាន់ទស្សនាវដ្ដី​មនោរម្យ.អាំងហ្វូ ឱ្យដឹងថា «RSF» បានតាម​ដាន​ហេតុការណ៍ ​ទាំងអស់​ខាងលើ​​យ៉ាងដិតដល់បំផុត។ មេដឹកនាំអង្គការអន្តរជាតិ បាន​អះអាង ជាភាសាបារាំង ដែលមាន​ខ្លឹមសារ ជាខេមរៈភាសា ដូច្នេះថា៖

«ការឃុំខ្លួនអ្នកសារព័ត៌មាន ដោយសារការបង្ហោះសារចំនួនពីរ ដែលគ្រាន់តែ​រិះគន់​នាយករដ្ឋមន្ត្រី បង្ហាញពី​វិធីសាស្ត្រ នៃរបបផ្តាច់ការដ៏អាក្រក់បំផុត ដែលរដ្ឋាភិបាល​កម្ពុជា កំពុងយកមកអនុវត្ត ក្នុងពេលនេះ។»

«ការបែកធ្លាយសារសម្លេង របស់លោក ហ៊ុន សែន និងបក្សពួក បង្ហាញពីភាព​មិនមាន​ដែនកំណត់​ ក្នុងការ​ចាត់​វិធានការ  ដើម្បីបិទសម្លេងប្រឆាំង ចេញទាំងអស់។ នៅក្នុង​បរិបទនេះ យើងអំពាវនាវ​ទៅសហភាពអ៊ឺរ៉ុប ឲ្យរឹតបន្តឹងបន្ថែមទៀត នូវទណ្ឌកម្ម​ពាណិជ្ជកម្ម ដែលត្រូវបាន​​​សម្រេចធ្វើ​មួយផ្នែក កាលពីពេលថ្មីៗ ប្រឆាំងរបប​ក្រុង​ភ្នំពេញ។»

មកដល់ថ្ងៃនេះ អ្នកសារព័ត៌មានយ៉ាងហោច ៣នាក់ ត្រូវបានចាប់ខ្លួន និងស្ថាប័ន​ផ្សព្វផ្សាយ របស់ពួកគេផង ត្រូវបាន​បង្ខំឲ្យបិទទ្វា។ រីឯគេហទំព័រ ​របស់​ទស្សនាវដ្ដី​មនោរម្យ.អាំងហ្វូ «MONOROOM.info» បានរង​ការរាំង​ខ្ទប់ ដោយមិន​ឲ្យប្រិយមិត្ត​បើក​ចេញ នៅក្នុង​ប្រទេស​កម្ពុជា តាំងពីចុងខែមីនា​រហូតមក។

សម្រាប់អាជ្ញាធរកម្ពុជា ធ្លាប់អះអាង ក្នុងពេលកន្លងមកថា ការចាប់ខ្លួន​អ្នកកាសែត​ទាំងនោះ គឺដោយសារពួកគេ ពុំបានធ្វើទៅតាមតួនាទី និងការទទួលខុសត្រូវ របស់​អ្នកសារព័ត៌មាន​ប៉ុណ្ណោះ។

លោក ជិន ម៉ាលីន អ្នកនាំពាក្យក្រសួងយុត្តិធម៌ បានថ្លែងយ៉ាងខ្លីថា ការចាប់ចង​លើ​អ្នកសារព័ត៌មានខាងលើ គឺជាភារកិច្ចរបស់តុលាការ ដែលជាស្ថាប័នឯករាជ្យ ក្នុង​ការ​អនុវត្តន៍​​ច្បាប់កម្ពុជា។

យ៉ាងណា អង្គការ «RSF» បានបន្តព្រមាន​របបក្រុងភ្នំពេញ តាមរយៈ​សេចក្ដី​ថ្លែងការណ៍ របស់​ខ្លួនទៀតថា ទណ្ឌកម្មពាណិជ្ជកម្ម របស់ «EU» គឺជាការឆ្លើយតប ទៅនឹង​នយោបាយ របស់រដ្ឋាភិបាលលោក ហ៊ុន សែន ក្នុងការ​រឹតត្បិត និងការវាយបង្ក្រាប មិនឈប់ឈរ ទៅលើ​សិទ្ធិសេរីភាព​ពលរដ្ឋ ដែលក្នុងនោះ ក៏មាន​​សេរីភាព​សារព័ត៌មានមួយដែរ ដូច​របាយការណ៍​របស់ «RSF» បានចេញផ្សាយ​យ៉ាងលំអិត​ម្ដងហើយ កាលពីឆ្នាំ២០១៨៕



You may also like

កម្ពុជា

ហ៊ុន សែន មិន​បង្ហាញ​ខ្លួន​ជាសាធារណៈ ជិត១សប្ដាហ៍ហើយ

ជារឿងដ៏កម្រ ដែលនាយករដ្ឋមន្ត្រីកម្ពុជា លោក ហ៊ុន សែន មិន​បង្ហាញ​ខ្លួន​ជាសាធារណៈ ក្នុងរយៈពេល ជាច្រើនថ្ងៃដូច្នេះ។ ហើយវាក៏មិនមែនជាទម្លាប់ របស់បុរសខ្លាំងកម្ពុជាដែរ ដែលមិនបានបង្ហាញរូបថត ដែលលោកតែងធ្វើកីឡា វាយកូនគោល ...
កម្ពុជា

សង្ឃ ហោ សុខុន ត្រូវបាន​«ចាប់ផ្សឹក»​ក្នុងយប់ថ្ងៃពុធនេះ

ព្រះចៅអធិការវត្តច្បារអំពៅ ព្រះតេជគុណ ហោ សុខុន ត្រូវបានក្រុមអាជ្ញាធរ នាំចេញពីវត្ត ដើម្បី«ចាប់ផ្សឹក»​ក្នុងយប់ថ្ងៃទី១៣ ខែកុម្ភៈ ឆ្នាំ២០១៩នេះ។ ប្រភពស្និតនឹងដំណើររឿង បានឲ្យដឹងថា សង្ឃទីប្រឹក្សា ហោ ...
កម្ពុជា

ភរិយា កឹម សុខា ធ្វើ​ដំណើរ​ក្នុង​ចំងាយផ្លូវ ៤០៨០០​គីឡូម៉ែត្រ ដើម្បី​ជួប​ស្វាមី​ក្នុង​គុក​ត្រពាំងផ្លុង

រាប់ពីថ្ងៃដែលប្រធានគណបក្សសង្គ្រោះជាតិ លោក កឹម សុខា ត្រូវបានចាប់ខ្លួន នេះជាការបង្ហោះនៅលើទំព័រហ្វេសប៊ុករបស់លោក ដែលប្រើឈ្មោះលោកដោយផ្ទាល់។ សំណេរនោះ ត្រូវបានបង្ហោះចេញ ក្នុងឱកាសនៃ ថ្ងៃខួបលើកទី ៣៨ នៃអាពាហ៍ពិពាហ៍ ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...