ការផ្ដន្ទាទោស​ទៅលើអ្នកកាសែត សុខ ឧត្ដម គ្រាន់តែជាការបង្ក្រាប ទៅលើ«សារព័ត៌មានសេរី» ដែលតែងកើតឡើងដដែលៗ នៅក្នុងប្រទេសកម្ពុជាប៉ុណ្ណោះ។ ខាងលើនេះ ជាការអះអាងឡើង របស់អ្នកស្រី «Pauline Adès-Mével» អ្នកនាំពាក្យអង្គការ​អ្នកយកការណ៍​គ្មានព្រំដែន (RWB /RSF) ភ្លាមៗ ក្រោយការផ្ដន្ទាទោស ដោយសាលាដំបូងខេត្តកំពង់ឆ្នាំង កាលពីថ្ងៃទី២២ ខែធ្នូ ឆ្នាំ២០២០ ទៅលើលោក សុខ ឧត្ដម ដែលជាម្ចាស់ស្ថានីយ៍វិទ្យុ និងគេហទំព័រឬទ្ធិសែន ខេត្តកំពង់ឆ្នាំង។

តុលាការថ្នាក់ខេត្តនោះ បានផ្ដន្ទាទោសលោក សុខ ឧត្ដម ឱ្យ​ជាប់ពន្ធនាគារ ២០​ខែ និងបង្គាប់ឲ្យបង់​ប្រាក់​ ចំនួន​២០​លាន​រៀល សម្រាប់​ដើម​បណ្ដឹង ពី​បទ​ញុះញង់ ពាក់ព័ន្ធ​នឹងការផ្សាយ​បន្តផ្ទាល់ របស់អ្នកសារព័ត៌មានរូបនេះ អំពីការ​តវ៉ា​របស់ពលរដ្ឋ នៅមុខ​សាលាឃុំ​ ជៀប កាលពី​ថ្ងៃទី១២ ខែឧសភា ឆ្នាំ២០២០ ស្ថិត​ក្នុង​ស្រុក​ទឹកផុស ជុំវិញជម្លោះដីធ្លី ក្នុង​ដែន​ជម្រក​សត្វព្រៃ​ភ្នំ​ឱ​រ៉ាល់ ដែល​ប្រជាពលរដ្ឋ​ចោទ​ថា អាជ្ញាធរ​បាន​ដកហូត​ដីធ្លី រាប់សិប​ហិចតា​​របស់​ពួកគាត់។​

ការសម្រេចសាលក្រមនោះ បានរងប្រតិកម្មខ្លាំងៗ ពីសំណាក់​អង្គការអ្នកយកព័ត៌មានគ្មានព្រំដែន ដែលជំនាញ​ខាងការពារ​សិទ្ធិសេរីភាព​​សារព័ត៌មាន នៅជុំវិញពិភពលោក ដោយទាមទារទៅតុលាការជាន់ខ្ពស់ ឲ្យលប់ចោលការផ្ដន្ទាទោស និងដោះលែងលោក សុខ ឧត្ដម ជាបន្ទាន់។

អ្នកស្រី «Pauline Adès-Mével» អ្នកនាំពាក្យរបស់អង្គការខាងលើ ត្រូវបានស្រង់សំដី យកមកចុះផ្សាយ នៅក្នុងសេចក្ដីថ្លែងការណ៍ របស់អង្គការនេះ ចុះថ្ងៃទី២៤​ ខែធ្នូ ឆ្នាំ២០២០ ដូច្នេះថា៖

«ការឃុំខ្លួនដ៏យូរហួសហេតុ រហូតឈានដល់ការផ្ដន្ទាទោស ដោយគ្មានភស្ដុតាង ទៅលើអ្នកកាសែត សុខ ឧត្ដម ជារឿងមិនសមហេតុ​សមផល និងគ្រាន់តែដើម្បីបង្ក្រាប ទៅលើសារព័ត៌មានសេរី ដែលធ្វើការ​ដោយឯករាជ្យប៉ុណ្ណោះ។»

អ្នកនាំពាក្យបន្តថា៖

«យើងសូមស្នើឲ្យចៅក្រម ទទួលយល់ព្រមបណ្ដឹងឧទ្ធរណ៍ របស់ សុខ ឧត្ដម និងលប់ចោលការផ្ដន្ទាទោស ដែលគ្មានមូលដ្ឋានគ្រឹះ​ខាងលើ ដែលជាថ្មីម្ដងទៀត បានរំខានទៅដល់ សារព័ត៌មានសេរី នៅកម្ពុជា។»

អាជ្ញាធរកម្ពុជាបញ្ជាក់ថា ការចាប់ខ្លួននោះ ធ្វើឡើងដោយអនុវត្ត​តាមច្បាប់កម្ពុជា ដើម្បីទប់ស្កាត់បទល្មើស ដែលក្រុមអាជ្ញាធរទាំងនោះ អះអាងថា ជាការផ្សាយព័ត៌មាន​បំភ្លៃ និង​មាន​លក្ខណៈ «ញុះញង់ ឲ្យប្រព្រឹត្តិបទឧក្រិដ្ឋជាអាទិ៍»។

ក្រោយការចាប់ខ្លួនភ្លាមៗ ស្ថាប័នវិទ្យុ និងគេហទំព័រព័ត៌មាន របស់លោក សុខ ឧត្ដម ក៏ត្រូវ​បាន​ក្រសួងព័ត៌មាន ចេញប្រកាស ​ឲ្យបិទទ្វាដែរ។ នេះ បើតាមសេចក្ដីសម្រេចមួយ របស់​ក្រសួង ដែលចុះហត្ថលេខា ដោយលោករដ្ឋមន្ត្រី ខៀវ កាញារិទ្ធ នៅថ្ងៃទី១២ ខែឧសភា តែទើប​នឹង​ឃើញ​ចេញ​ផ្សាយ នៅថ្ងៃទី១៣ ខែឧសភា។

អង្គការឃ្លាំមើលសិទ្ធិសេរិភាពអ្នកសារព័ត៌មាន បានបញ្ជាក់បន្ថែមថា បើសាលក្រមនេះ ត្រូវបានតំកល់ទុកជាបានការនោះ លោក សុខ ឧត្ដម នឹងក្លាយជា​អ្នកកាសែត​ទី​បី​ហើយ ដែល​ត្រូវបាន​តុលាការ​ផ្ដន្ទាទោស នៅ​ក្នុង​ឆ្នាំ២០២០ បូកបន្ថែមនឹងការបង្ខំ​ឲ្យ​បិទស្ថាប័នព័ត៌មាន របស់អ្នកកាសែតទាំងនោះ និងការរាំងខ្ទប់គេហទំព័រ​ព័ត៌មាន ដែលបានកើតមានជាហូហែរ នៅកម្ពុជា។

កាលពីដើមខែមេសា លោក សុវណ្ណ រិទ្ធី ម្ចាស់ស្ថាប័ន«FBTV» ក៏ត្រូវបានចាប់ខ្លួន ដាក់​ពន្ធនាគារដែរ បន្ទាប់ពីលោក បាន​ចុះផ្សាយ នៅលើបណ្ដាញសង្គម នូវការដកស្រង់សំដី របស់លោកនាយករដ្ឋមន្ត្រី ហ៊ុន សែន ដែលបានថ្លែង ឲ្យអ្នករត់ម៉ូតូឌុប លក់ម៉ូតូ ដើម្បី​ទិញ​អង្ករហូប នៅក្នុងរយៈពេល នៃវិបត្តិ«Covid-19»។

នៅចុងខែមីនា គេហទំព័រ របស់ទស្សនាវដ្ដីមនោរម្យ «MONOROOM.info» បានរង​ការរាំងខ្ទប់ ដោយមិនឲ្យប្រិយមិត្តបើកចេញ នៅក្នុងប្រទេសកម្ពុជា បន្ទាប់ពីស្ថាប័ន​មិនចំណុះ​មួយនេះ បានផ្សាយរបាយការណ៍ ជាបន្តបន្ទាប់ ស្ដីពីជំងឺ «Covid-19» នៅ​កម្ពុជា និងនៅ​ប្រទេស​ចិន។

ចំពោះករណីទាំងពីរចុងក្រោយ ត្រូវបានអង្គការអន្តរជាតិខាងលើថ្កោលទោស (ចុចអានទីនេះ និងទីនេះ) ដោយអង្គការនេះ​ហៅទង្វើ​ទាំងនោះ ថាជាការគម្រាមកំហែង ទៅលើ​សិទ្ធិអ្នកសារព័ត៌មាន និងសិទ្ធិទទួលបានព័ត៌មាន របស់ពលរដ្ឋកម្ពុជា។

នៅក្នុងបញ្ជីសន្ទស្សន៍ របស់អង្គការអ្នកយកព័ត៌មានគ្មានព្រំដែន ប្រទេសកម្ពុជាបានបន្តធ្លាក់ ចំណាត់ថ្នាក់​ប្រចាំឆ្នាំ របស់ខ្លួន ស្ដីពីសេរីភាពសារព័ត៌មាន ពីលេខរៀងទី១៤៣ ក្នុងឆ្នាំមុន មកលេខ១៤៤ ក្នុងឆ្នាំ២០២០នេះ ពីក្នុងចំណោម​១៨០ប្រទេស នៅជុំវិញ​ពិភពលោក៕



You may also like

កម្ពុជា

​អ្នកជំនាញ អ.ស.ប ស្នើឱ្យកម្ពុជា​ផ្អាក​«ច្រកទ្វា​អ៊ិនធើណិត»​ដែល​«រឹតត្បិត»

ក្រុមអ្នកជំនាញ អង្គការសហប្រជាជាតិ ជំរុញឱ្យអាជ្ញាធរកម្ពុជាផ្អាកផែនការ អនុវត្តអនុក្រឹត្យ«ច្រកទ្វា​អ៊ិនធើណិត» ទាក់ទិននឹងការគ្រប់គ្រង ការតាមដានទិន្នន័យរបស់អ្នកប្រើប្រាស់ ដោយហេតុថា អនុក្រឹត្យនេះមានការរឹតត្បិត ​ព្រមទាំងធ្វើឱ្យប៉ះពាល់ ដល់សិទ្ធិឯកជន និងសេរីភាព បែបប្រជាធិបតេយ្យនៅប្រទេសកម្ពុជា។ អ្នកជំនាញ៤នាក់ ...
កម្ពុជា

អាមេរិក​និង​មន្ត្រី​ជំនាញ អ.ស.ប បរិហារ​ការចា​ប់ខ្លួន​យុវជន​និយម កែម ឡី

ទាំងសហរដ្ឋអាមេរិក និងអ្នករាយការណ៍ពិសេស របស់អង្គការសហប្រជាជាតិ ( អ.ស.ប ) សុទ្ធតែបានសំដែងប្រតិកម្មរបស់ផងខ្លួន នៅចំពោះទង្វើចាប់ចងរបស់អាជ្ញាធរ នៃរបបក្រុងភ្នំពេញ ប្រឆាំងយុវជនពីរនាក់កាលពីសប្ដាហ៍មុន នៅខណៈពួកគេបានចូលរួម រំឭកខួបបីឆ្នាំ នៃឃាតកម្មលើលោក​បណ្ឌិត ...
កម្ពុជា

RSF នឹង​ប្រតិកម្មលើការ​ចាប់​អ្នក​កាសែត សុខ ឧត្ដម នៅដើម​សប្ដាហ៍​នេះ

អង្គការអ្នកយកព័ត៌មានគ្មានព្រំដែន (RWB / RSF) គ្រោងចេញសេចក្ដីថ្លែងការណ៍ ប្រតិកម្ម​​ចំពោះករណី​​ចាប់ខ្លួន អ្នកកាសែត សុខ ឧត្ដម ដែលឈាន​ទៅបិទស្ថានីយ៍វិទ្យុ និងគេហទំព័រ «រិទ្ធិសែន» របស់អ្នកកាសែតរូបនេះ ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...