នាយកវិទ្យុអាស៊ីសេរី ទទួលបន្ទុកការផ្សាយ ផ្នែកខេមរភាសា លោក ហួត វុទ្ធី ហៅ ជុន ច័ន្ទបុត្រ បានអះអាងកាលពីមុននេះ នៅក្នុងសារជូនពរបំណាច់ឆ្នាំមួយ ថាវិទ្យុផ្សាយសម្លេង ដ៏មានប្រជាប្រិយភាពមួយនេះ នឹងធ្វើការផ្សព្វផ្សាយ ពី«ទស្សនវិស័យ និងស្នាដៃនានា» របស់លោក កែម ឡី ដែលអតីតអ្នកធ្វើអត្ថាធិប្បាយនយោបាយ ដ៏ល្បីឈ្មោះ បានបន្សល់ទុក នៅក្នុងម៉ាស៊ីនកំព្យូទ័ររបស់លោក។
លោក ហួត វុទ្ធី បានអះអាងថា៖
«ក្នុងឆ្នាំថ្មីនេះ យើងនឹងបន្តខំកែលំអរផ្សាយ និងបន្ថែមនូវកម្មវិធីថ្មីៗ មួយចំនួន ជូនលោកអ្នកនាង ដូចជានាទីសាសនា និងសង្គម ព្រមទាំងរៀបចំផ្សព្វផ្សាយ ជូនលោកអ្នកនាង នូវទស្សនវិស័យ និងស្នាដៃនានា របស់លោកបណ្ឌិត កែម ឡី បន្សល់ទុក ក្នុងម៉ាស៊ីនកុំព្យូទ័ររបស់លោក ដែលភរិយារបស់លោក បានប្រគល់មកឲ្យវិទ្យុអាស៊ីសេរី ជួយផ្សព្វផ្សាយបន្ត។»
នៅក្នុងសារជូនពរដដែលនោះ លោក ហួត វុទ្ធី បានរំពឹងថា វិទ្យុអាស៊ីសេរីនឹងត្រឡប់ ទៅបើកការិយាល័យរបស់ខ្លួន នៅក្នុងប្រទេសកម្ពុជា នាពេលខាងមុខ ក្រោមលក្ខខណ្ឌថា ប្រទេសកម្ពុជា នឹងបើកឲ្យមានសេរីភាពសារព័ត៌មាន ពេញលេញ និងគ្មានការរារាំង។ នាយកផ្នែកការផ្សាយ ជាខេមរភាសា បានបន្តថា៖
«ទោះបីជាការិយាល័យយើង នៅភ្នំពេញ ត្រូវបន្តបិទទ្វារក៏ដោយ ក៏យើងខិតខំតាមគ្រប់លទ្ធភាព ក្នុងការផ្តល់ព័ត៌មាន ជូនប្រជាពលរដ្ឋខ្មែរ… ហើយយើងនឹងបន្តធ្វើ ជាប្រភពផ្តល់ព័ត៌មានឯករាជ្យ ដែល លោក លោកស្រី អ្នកនាងកញ្ញា អាចទុកចិត្តបាន។»
«ជាថ្មីម្តងទៀត តាងនាមអាស៊ីសេរី ផ្នែកភាសាខ្មែរ ខ្ញុំបាទសូមថ្លែងអំណរគុណ ដល់ប្រិយមិត្តទាំងអស់ ដែលតែងមានភក្តីភាព ចំពោះអាស៊ីសេរី។ យើងនឹងរួមដំណើរ ជាមួយគ្នា ក្នុងបេសកកម្មផ្សព្វផ្សាយ និងទទួលព័ត៌មាន នៅក្នុងឆ្នាំ២០១៩នេះ និងឆ្នាំខាងមុខៗទៀត។»៕
