កម្ពុជាដំណឹង

នាយករដ្ឋមន្ត្រី​«ជេរម៉ែ»​អ្នកវិភាគ ដែល​រិះគន់​ការដឹកនាំ​របស់​លោក

លោក ហ៊ុន សែន នាយករដ្ឋមន្ត្រីកម្ពុជា។ (រូបថត AFP)

នៅចំពោះក្រុមអ្នកវិភាគឯករាជ្យ ដែលតែងលើកពីកំហុស និងចំណុចខ្វះខាត ពីរបបដឹកនាំរបស់លោកនោះ លោក ហ៊ុន សែន បានតំឡើងខ្លួនថា លោកជា«ឪបណ្ឌិត» ឬហៅក្រុមអ្នកវិភាគទាំងនោះ ឲ្យមកចូលស្បថជាមួយលោក។ តែនៅថ្ងៃនេះ លោកបានប្រើយុទ្ធសាស្ត្រថ្មី គឺ«ជេរម៉ែ»អ្នកវិភាគនោះតែម្ដង។

ថ្លែងនៅចំពោះនិស្សិតរាប់ពាន់នាក់ មកពីវិទ្យាស្ថានមួយ ក្នុងពិធីប្រគល់សញ្ញាបត្រ នៅមជ្ឈមណ្ឌលកោះពេជ្រ រាជធានីភ្នំពេញ នៅព្រឹកថ្ងៃចន្ទទី១ ខែមេសា ឆ្នាំ២០១៩នេះ លោក ហ៊ុន សែន បានសំដែងក្ដីខឹងសម្បារ ដាក់អ្នកវិភាគរូបនោះ ដែលលោកមិនបញ្ចេញឈ្មោះ តែលោកអះអាងថា ជាអ្នកវិភាគដែលរត់ចោលស្រុក។

លោកថ្លែងឡើង ដោយប្រើពាក្យអសុរោះជេរប្រទេច​ដូច្នេះ៖

«មានអាឡប់រត់ចោលស្រុកមួយនោះ… ខ្ញុំមិនបានស្ដាប់វានិយាយទេ តែឮប្រពន្ធខ្ញុំប្រាប់ថា មានគេថា រឿងមកពីចែកលុយវាមិនស្មើ។ កន្តួយម៉ែអាគេបាញ់! និយាយឲ្យវាអញ្ចេះតែម្ដងទៅ។ អាហ្នឹងអញ្ចឹង បានវារត់ចោលស្រុកនោះ។»

មេដឹកនាំកម្ពុជាបានពន្យល់ថា ភាសាអសុរោះរបស់លោក ជាគ្រាមភាសា(ភាសាអ្នកស្រុក) ដែលលោកជានាយករដ្ឋមន្ត្រី ក៏មានសិទ្ធិក្នុងការប្រើប្រាស់ដែរ។ លោកថា៖

«អញជេរត្រង់ៗ អញ្ចឹងតែម្ដងទៅ។ អូ… ធ្វើនាយករដ្ឋមន្ត្រី ហាមជេរឬ? ទេ! ធ្វើនាយករដ្ឋមន្ត្រី ជេរបានទេតើ មនុស្សដូចគ្នា។ ប៉ិនលោកសង្ឃម៉េច នៅចេះបញ្ចោរ។ ឯ ហ៊ុន សែន ជាមនុស្សដែរ មើលដាក់ហ្អែងឲ្យវានេះមើល៍ ! តាំងវាថា អាហ្នឹងភាសាអសុរោះ ប៉ុន្តែវា​ជេរ​ម៉ែឯង តាមចិត្ត។ វាជេរយើងស្អីៗ វាជេរតាមចិត្ត។»

ជេរម៉ែ ជា«ភាសាគ្រាម»សម្រាប់លោក ហ៊ុន សែន

បុរសខ្លាំងកម្ពុជា មិនបានបញ្ចេញឈ្មោះ អ្នកវិភាគរូបនោះ ថាជានរណាទេ។ ប៉ុន្តែអ្នកវិភាគ ដែលនិរទេសខ្លួនចេញក្រៅស្រុក មិនមានច្រើនប៉ុន្មានឡើយ ដូចយ៉ាងលោក គឹម សុខ អ្នកវិភាគនយោបាយដ៏ល្បីឈ្មោះ ដែលសព្វថ្ងៃកំពុងរស់នៅ ជាមួយកូនស្រីលោក ក្នុងប្រទេសហ្វាំងឡង់ជាដើម។

ជេរត្រឹមប៉ុណ្ណេះ មិនទាន់អស់ចិត្តលោក ហ៊ុន សែន នៅឡើយ។ មេដឹកនាំកម្ពុជា បានបន្តជេរ ប្រទេចផ្ដាសារប៉ុន្មានម៉ាត់ នៅចុងបញ្ចប់នៃការថ្លែងរបស់លោក ទៅកាន់អ្នកវិភាគរូបនោះ បន្ថែមទៀត។ លោកថា៖

«វាថា ចែកលុយគ្នាមិនគ្រប់! ចែកលុយគ្នាមិនស្មើ បានជាមានរឿង (ផ្លាស់ប្ដូរការគ្រប់គ្រង ប្រព័ន្ធផ្លូវដែក)។ អាហ្នឹងវាជាភាសាគ្រាម ភាសារបស់ស្រុកខ្មែរ វាជេរអញ្ចឹង។ ជេរ… អារន្ទះបាញ់។ ជេរ… អាគេបាញ់៕»



You may also like

កម្ពុជា

EU ទាមទារជាថ្មី ឲ្យក្រុងភ្នំពេញ​ផ្ដើម«ដំណើរការ​ផ្សះផ្សារជាតិ»

សហភាពអ៊ឺរ៉ុប «EU» បានបញ្ចេញប្រតិកម្មរបស់ខ្លួន នៅថ្ងៃទី២ ខែមីនានេះ នៅចំពោះព្រឹត្តិការណ៍ផ្ដន្ទាទោស ទៅលើក្រុម​​មេដឹកនាំ​គណបក្ស​សង្គ្រោះជាតិ ដោយតុលាការនៅកម្ពុជា ដោយស្នើឲ្យរបបដឹកនាំក្រុងភ្នំពេញ ផ្ដើម​«ដំណើរការ​ផ្សះផ្សារជាតិ» តាមរយៈ​កិច្ចសន្ទនារួម និងពិតប្រាកដ ជាមួយគណបក្សប្រឆាំង។ ...
កម្ពុជា

អាមេរិក​ព្រមាន​ក្រុងភ្នំពេញ​ក្នុងជំហរ​ងាកទៅ​ចិន ដូច«ខ្មែរក្រហម»​បានធ្វើ

ការស្វែងរកយុត្តិធម៌ជូនជនរងគ្រោះ នៅក្នុងរបបប្រល័យពូជសាសន៍ ខ្មែរក្រហម «គួរតែជាការព្រមានដ៍ខ្លាំងមួយ ដល់រដ្ឋាភិបាល នឹងក្រុមអ្នកប្រព្រឹត្តអំពើព្រៃផ្សៃ ឬបំបាត់សម្លេង​ប្រជាជន» ខណៈ «យើងត្រូវចងចំាដែរថា ក្រុមខ្មែរក្រហម​បានពឹងផ្អែកយ៉ាង​ងប់ងល់ ទៅលើមហាអំណាចធំមួយ»។ ខាងលើនេះ ជាដំណកស្រង់ឃ្លាសំខាន់ចំនួនពីរ ...
កម្ពុជា

ហ៊ុន សែន ប្ដេជ្ញាធ្វើការ​ជាមួយ ចូ បៃដិន

លោកនាយករដ្ឋមន្ត្រី ហ៊ុន សែន បានសំដែងការប្ដេជ្ញាចិត្ត ដើម្បីធ្វើការ​ជាមួយរដ្ឋបាលរបស់លោក ចូ បៃដិន (Joe Biden) ប្រធានាធិបតីជាប់ឆ្នោតថ្មី របស់សហរដ្ឋអាមេរិក។ នេះ បើតាមលិខិតមួយ ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...