កម្ពុជាដំណឹង

សេរីភាព​សារព័ត៌មាន​នៅ​កម្ពុជា​ បន្ត​ជាប់លេខ​ដ៏អាក្រក់ ក្នុង​ឆ្នាំ២០១៩

ពណ៌ក្រហមជាពណ៌របស់ក្រុមប្រទេស ដែលមានសេរីភាពសារព័ត៌មានដ៏អាក្រក់ រាប់ទាំងប្រទេសកម្ពុជាមួយផង។ នេះបើតាមរបាយការណ៍សន្ទស្សន៍ ក្នុង​ឆ្នាំ២០១៩ របស់អង្គការអ្នកយកព័ត៌មានគ្មានព្រំដែន (RSF-RWB) ដែលទើបនឹងចេញផ្សាយ កាលពីថ្ងៃទី១៦ ខែមេសា ឆ្នាំ២០១៩។

នៅក្នុងបញ្ជីសន្ទស្សន៍នោះ កម្ពុជាជាប់លេខ១៤៣ ពីក្នុងចំណោមប្រទេស ចំនួន១៨០ នៅលើពិភពលោក។ ចំណាត់ថ្នាក់នេះ បានធ្លាក់១លេខ បើប្រៀបនឹងឆ្នាំ២០១៨ ដែលប្រទេសកម្ពុជាជាប់លេខ ១៤២ និងធ្លាក់១១លេខ បើប្រៀបនឹងឆ្នាំ២០១៧ ដែលប្រទេសកម្ពុជាជាប់លេខ ១៣២។

អង្គការអ្នកយកព័ត៌មានគ្មានព្រំដែន ដែលមានទីស្នាក់ការធំ នៅក្នុងរដ្ឋធានីប៉ារីស ប្រទេសបារាំង បានអះអាងថា សារព័ត៌មាននៅកម្ពុជា ត្រូវបានកាន់កាប់សឹងតែទាំងស្រុង ដោយមនុស្សជំនិត របស់គណបក្សកាន់អំណាច និងរបស់លោកនាយករដ្ឋមន្ត្រី ហ៊ុន សែន។

របាយការណ៍បានសរសេរថា រាប់ចាប់ពីពាក់កណ្ដាលឆ្នាំ២០១៧មក ប្រព័ន្ធផ្សព្វផ្សាយឯករាជ្យជាច្រើន ត្រូវបានបង្ខំឲ្យបិទទ្វា បណ្ដាលមកពីការប្រកាសសង្គ្រាម ដែលធ្វើឡើងដោយលោក ហ៊ុន សែន ដើម្បីលាងសម្អាតមតិរិះគន់ ឲ្យបានមុនការបោះឆ្នោតជាតិ ឆ្នាំ២០១៨ និងធ្វើឲ្យយ៉ាងណា អាចឲ្យលោកនៅបន្តកាន់អំណាច ទៅមុខទៀតបាន។

អង្គការអន្តរជាតិ ដែលមានជំនាញខាងការពារសិទ្ធិអ្នកសារព័ត៌មាន បានបន្តថា សារព័ត៌មានសំខាន់ៗមួយចំនួន ដូចយ៉ាងអង្គភាព «Fresh News» ជាដើម គ្រាន់តែជាម៉ាស៊ីនឃោសនា របស់របបដឹកនាំឯកបក្ស ក្រុងភ្នំពេញតែប៉ុណ្ណោះ។

ខណៈសារព័ត៌មានភ្នំពេញប៉ុស្ដិ៍ ត្រូវបានទិញយក ដោយអ្នកជំនួញជាតិម៉ាឡេស៊ីម្នាក់ ដែលស្និតនឹងលោក ហ៊ុន សែន។ បន្ទាប់ពីត្រូវកំណត់ ឲ្យសរសេរលំអៀង ទៅរករដ្ឋាភិបាលនោះ បុគ្គលិកច្រើននាក់ របស់សារព័ត៌មាននេះ បានសុំលាឈប់។

របាយការណ៍បន្តថា ផ្ទុយទៅវិញ បើអ្នកសារព័ត៌មានណា ឬសូម្បីតែអ្នកបកប្រែ របស់អ្នកសារព័ត៌មានណា ហ៊ានធ្វើការស៊ើបអង្កេត ទៅលើប្រធានបទរសើបៗ ទាក់ទងនឹងមុខមាត់ របស់អាជ្ញាធរ ដូចយ៉ាងពេស្យាកម្ម ទៅលើកុមារមិនទាន់គ្រប់អាយុនោះ ពួកគេនឹងច្បាស់ត្រូវចាប់បោះបញ្ចូលគុក ជាក់ជាមិនខាន។

យ៉ាងណា សេរីភាពសារព័ត៌មាន នៃបណ្ដាប្រទេសពណ៌ក្រហម នៅគ្រាន់ជាងបណ្ដាប្រទេស ដែលមានពណ៌ខ្មៅ។ ក្រុមប្រទេសពណ៌ខ្មៅ មានសេរីភាពសារព័ត៌មាន រងការរឹតត្បិតធ្ងន់ធ្ងរ ដែលភាគច្រើនជាប្រទេស នៅក្នុងទ្វីបអាហ្វិក ប្រទេសកុម្មុយនីស្ដិ៍ និងប្រទេសដែលមានមេដឹកនាំ អង្គុយក្នុងអំណាចចាក់ឫស មានដូចជា វៀតណាម (១៧៦) ចិន (១៧៧) កូរ៉េខាងជើង ៏(១៧៩) និងទួរមេគីស្ដង់ (១៨០) ដែលជាប់ចំណាត់ថ្នាក់ ចុងក្រោយគេបង្អស់។

រីឯប្រទេសស្អាតស្អំ បើកចិត្តទូលំទូលាយជាងគេ សម្រាប់អ្នកសារព័ត៌មាន ក្នុង​ឆ្នាំ២០១៩ គឺប្រទេសណ័រវេស (១) បន្តដោយប្រទេសហ្វាំងឡង់ (២) និងស៊ុយអែដ (៣)។ ប្រទេសទាំងនេះ ស្ថិតក្នុងបណ្ដាប្រទេស ដែលមានពណ៌ស៕



You may also like

កម្ពុជា

ហ៊ុន សែន៖ «ហ្អែង​មិន​ពេញចិត្ត​ទេ ហ្អែង​ទៅនៅក្រៅ​ទៅ […] កុំនៅស្រុកខ្មែរ»

«ហ្អែងពេញចិត្ត ក៏នៅស្រុកខ្មែរ ហ្អែង​មិន​ពេញចិត្ត​ទេ ហ្អែងទៅនៅក្រៅទៅ» នេះ ជាសារនយោបាយ របស់មេដឹកនាំកម្ពុជា លោក ហ៊ុន សែន ទៅកាន់​អ្នកវិភាគទាំងឡាយ ដែលតែងរិះគន់ ចំពោះជំហររដ្ឋាភិបាលរបស់លោក ...
របាយការណ៍

ពេលដែលទូរទស្សន៍​របស់កូនស្រី​នាយករដ្ឋមន្ត្រី ផ្សាយតួលេខខុស …

ដំរីជើងបួន… សម្រាប់ទូរទស្សន៍បាយ័ន្ដ «BTV» របស់អ្នកស្រី ហ៊ុន ម៉ាណា កូនស្រីនាយករដ្ឋមន្ត្រី ដែលបាន​«ផ្សាយតួលេខខុស» ជុំវិញការឆ្លងរាតត្បាត នៃជំងឺកូវីដ-១៩ (Covid-19) នៅក្នុងជួរកងទ័ព ដែលជាការស្រង់​សំដី​លោក ...
កម្ពុជា

ហ៊ុន សែន លេងបាន​តែកីឡា​កូន​គោល ខណៈ សម រង្ស៊ី លេងកីឡាជាច្រើន

លោកនាយករដ្ឋមន្ត្រី ហ៊ុន សែន បានអះអាងថា លោកមកដល់វ័យនេះ លេងកីឡាបានតែកីឡាវាយកូនគោលមួយប៉ុណ្ណោះ បើទោះជាលោកចូលចិត្តកីឡាទាំងអស់យ៉ាងណាក៏ដោយ។ កាលពីប៉ុន្មានថ្ងៃមុន លោក សម រង្ស៊ី ដែលមានអាយុច្រើនជាងលោក ហ៊ុន ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...