មិនខ្វល់ខ្វាយ នឹងការសាកសួរ… ហើយរារាំង (Blocked) គណនី របស់អ្នកសារព័ត៌មាន ជាពិសេស មិនចង់ឲ្យមានការរិះគន់ ពីអ្នកដទៃ … វាជាគ្រោះថ្នាក់ សម្រាប់លទ្ធិប្រជាធិបតេយ្យ។ ហើយកញ្ញា កឹម មនោវិទ្យា កូនស្រីច្បង របស់ប្រធានគណបក្សសង្គ្រោះជាតិ កំពុងស្ថិតក្នុងបញ្ជីមនុស្ស ដែលមាននិន្នាការបែបនោះ។
ខាងលើនេះ ជាការលើកឡើង របស់លោក ចន ប្រោន (John Brown) អ្នកសារព័ត៌មាន អ្នកនិពន្ធ និងជាអ្នកជំនាញខាងថតរូបមួយរូប ដោយថែមទាំងភ្ជាប់ស្ត្រីវ័យ ៣៥ឆ្នាំ ដែលជាមន្ត្រីជាន់ខ្ពស់មួយរូប របស់គណបក្សប្រឆាំងកម្ពុជា ទៅនឹងក្រុមនុស្ស ដែលមានផ្នត់គំនិត បែប«ផ្ដាច់ការ» នោះទៀត។
លោក ប្រោន បានអះអាងដូច្នេះ បន្ទាប់ពីលោកត្រូវបានកញ្ញា កឹម មនោវិទ្យា រារាំងគណនី នៅលើបណ្ដាញសង្គមទ្វីសធើរ (Twitter)។ លោក បានសរសេរបែបចំអក ប្រាប់ប្រិយមិត្តទាំងឡាយថា៖
«ខ្ញុំមានកិត្តិយសណាស់ ដោយសូមប្រកាសថា ខ្ញុំទើបត្រូវបានដាក់ចូល ទៅក្នុងក្រុមមនុស្ស ដ៏ពិសេសមួយ ដែលរារាំងគណនី (…) ដោយនាង កឹម មនោវិទ្យា ដែលខ្ញុំមើលទៅនាង ដូចជាមិនចូលចិត្តសេរីភាព នៃការបញ្ចេញមតិទេ។»
នៅចំពោះការលើកឡើង របស់ប្រិយមិត្តម្នាក់ ដែលថា រឿងនេះមិនមែនជារឿងល្អនោះ លោក ចន ប្រោន បានបន្តរិះគន់កូនស្រីច្បង របស់ប្រធានគណបក្សប្រឆាំងទៀតថា៖
«រឿងនេះ វាបង្ហញថា នាងមិនចូលចិត្ត ស្ដាប់យោបល់អ្នកដទៃ។ គណបក្សប្រជាជនកម្ពុជា ដែលកំពុងកាន់អំណាច មិនចូលចិត្តស្ដាប់គំនិតប្រឆាំងទេ ហើយវាជារឿងអាក្រក់ណាស់។ បើដូចខ្ញុំ គ្រាន់តែជាបង្ហោះព័ត៌មាន នៅលើបណ្ដាញសង្គម វាមិនអីទេ។ តែសម្រាប់ថ្នាក់ដឹកនាំម្នាក់ វាមិនល្អឡើយ។ ដូចលោក ដូណាល់ ត្រាំ (Donald Trumps – ប្រធានាធិបតីអាមេរិក) អញ្ចឹង។ វាជាផ្នត់គំនិតមួយ របស់ជនផ្ដាច់ការ។»
ទស្សនាវដ្ដីមនោរម្យ.អាំងហ្វូ មិនអាចសុំការបញ្ជាក់ ពីកញ្ញា កឹម មនោវិទ្យា បានទេ ក្នុងករណីនេះ។ កាលពីដើមខែធ្នូ កន្លងមក កូនស្រីប្រធានគណបក្សប្រឆាំងបានរារាំង ឬប្លុក (Blocked) គណនីទ្វីសធើររបស់ទស្សនាវដ្ដី ដែលធ្វើឲ្យទស្សនាវដ្ដីមិនអាចចូល ទៅសាកសួរកញ្ញាដោយផ្ទាល់ នៅទីនោះបានទៀតឡើយ។
ប៉ុន្តែមិនមែន មានតែគណនី របស់ទស្សនាវដ្ដី និងរបស់លោក ចន ប្រោន ប៉ុណ្ណោះទេ។ បើសូម្បីលោក ចន ឡូរី (John Lowrie) មន្ត្រីតស៊ូមតិមួយរូប ដែលតែងការពារជនដែលងាយរងគ្រោះ និងតែងបញ្ចេញមតិ ការពារសិទ្ធិនយោបាយ និងសិទ្ធិពលរដ្ឋ របស់លោក កឹម សុខា ឪពុកនាងក៏ដោយ ក៏ត្រូវកញ្ញា កឹម មនោវិទ្យា រារាំងគណនីមិនឲ្យទាក់ទង ជាមួយកញ្ញាដែរ។
លោក ចន ឡូរី បានលើកឡើងថា៖
«តើខ្ញុំជាឧក្រិដ្ឋជនឬ ដែលគ្រាន់តែលើកឡើង ពីកំហុសរបស់នាង ដែលអាចប៉ះពាល់ ដល់ករណីលោក កឹម សុខា នោះ? ផ្ទុយទៅវិញ [មន្ត្រី]គណបក្សប្រជាជនកម្ពុជា ដែលកំពុងកាន់អំណាច មិនដែលរារាំងគណនីខ្ញុំទេ។»
លោក ចន ប្រោន បានឆ្លើយតប ទៅលើលោក ចន ឡូរី វិញថា៖
«ដោយសារហេតុនេះហើយ ទើបនាង (កឹម មនោវិទ្យា) គឺជាគ្រោះដល់លទ្ធិប្រជាធិបតេយ្យ»៕
