សាលារាជធានីព្រមានពី«ភាពទ្រុឌទ្រោម»នៃអាគារចំណាស់ពីឆ្នាំ១៩៥០
អាគារក្នុងរូបថតខាងលើនេះ អាចនឹងបាក់ស្រុត នៅក្នុងថ្ងៃណាមួយ ដោយសារតែ«ភាពទ្រុឌទ្រោម»របស់វា បណ្ដាលមកពីអាយុកាល ការប្រេះស្រាំ និងកង្វះការថែទាំ ក្នុងពេលកន្លងមក។ នេះបើតាមសេចក្ដីជូនដំណឹងមួយ របស់សាលារាជធានីភ្នំពេញ ដែលចេញផ្សាយ សម្រាប់បណ្ដាពលរដ្ឋដែលរស់នៅក្នុងអាគារ ឲ្យធ្វើការប្រុងប្រយ័ត្ន។
សេចក្ដីជូនដំណឹងរបស់សាលារាជធានី បានយោងតាមលិខិតចុះថ្ងៃទី១៣ ខែធ្នូ ឆ្នាំ២០១៨ របស់ក្រសួងរៀបចំដែនដី នគរូបនីយកម្ម និងសំណង់ និងបានពន្យល់ថា ស្ថានភាពនៃអគារនេះ មានសភាពទ្រុឌទ្រោម គួរឲ្យព្រួយបារម្ភ ជាពិសេសគ្រឿងបង្គុំសំណង់ប្រមាណជា ៥០% រងការពុកផុយខូចអស់ហើយ ដែលអាចធ្វើឲ្យអាគាររលំបាក់ស្រុត។
នៅក្នុងលិខិតដដែល សាលារាជធានីបានណែនាំ ឲ្យពលរដ្ឋដែលរស់នៅក្នុងអាគារ ត្រូវបញ្ចៀសការផ្ទុកសម្ភារៈដែលធ្ងន់ហួស និងត្រូវរកក្រុមហ៊ុន ឬវិស្វករដែលមានជំនាញច្បាស់លាស់ មកជុសជុលកែលំអ ប្រសិនជាផ្ទះរបស់ពលរដ្ឋនោះ មានសភាពប្រេះស្រាំ ខូចខាតខ្លាំង។
សាលារាជធានីបានបញ្ជាក់ទៀតថា៖
«ក្នុងករណីដែលផ្ទះបងប្អូន មានសភាពទ្រុឌទ្រោមខ្លាំង មិនអាចជុសជុលបាន ត្រូវធ្វើការផ្លាស់ប្ដូរលំនៅដ្ឋានថ្មី ដែលមានសុវត្ថិភាពឲ្យបានឆាប់រហ័ស»៕
