កម្ពុជាដំណឹង

ហ៊ុន សែន ព្រមាន​កុំឲ្យ​យក​«នំបញ្ចុក» ទៅភ្ជាប់​នឹង​នយោបាយ

លោក ហ៊ុន សែន នាយករដ្ឋមន្ត្រីកម្ពុជា។ (រូបថត Reuters)

«នំបញ្ចុក ជារបស់ជាតិ មិនមែនជារបស់បក្សនយោបាយណាមួយទេ» នេះ ជាការអះអាង​ឡើង របស់លោកនាយករដ្ឋមន្ត្រី ហ៊ុន សែន ទាក់ទងនឹងយុទ្ធនាការ​ទទួលទាននំបញ្ចុក នៅទូទាំងប្រទេស ដែលលោកបានបញ្ជាឲ្យធ្វើ កាលពីថ្ងៃចន្ទកន្លងមក។ បុរសខ្លាំងកម្ពុជា បានបន្តព្រមានទៀតថា តាមរយៈយុទ្ធនាការនេះ នឹងគ្មានការចរចាណាមួយ ជាមួយគណបក្សសង្គ្រោះជាតិ នោះឡើយ។

លោកនាយករដ្ឋមន្ត្រី បានថ្លែងដូច្នេះ នៅក្នុងពិធីប្រគល់សញ្ញាបត្រ ដល់និស្សិតច្រើនរយនាក់ នៅព្រឹកថ្ងៃទី០៦ ខែមិថុនា ឆ្នាំ២០១៩នេះ ក្នុងមជ្ឈមណ្ឌលកោះពេជ្រ រាជធានីភ្នំពេញ។ លោក ហ៊ុន សែន ថា «នំបញ្ចុក»ជាអត្តសញ្ញាណជាតិ និងមិនមែនជាបញ្ហាបំបែកបំបាក់ជាតិទេ។

បុរសខ្លាំងកម្ពុជាបន្តថា៖

«នំបញ្ចុក គឺជាឯកភាពជាតិ ជាការសាមគ្គីជាតិ របស់យើងទៅវិញទេ។ ដូច្នេះ នំបញ្ចុកកុំក្លាយជាបញ្ហានយោបាយឲ្យសោះ។ អញ្ចឹងទេ ការទទួលទាននំបញ្ចុក នៅថ្ងៃទី៩ [ខែមិថុនាខាងមុខ] ហើយបន្តបន្ទាប់ទៀត មិនមែនស៊ីតែថ្ងៃទី៩​ហ្នឹងទេ។»

មេដឹកនាំកម្ពុជា បានព្រមានមន្ត្រីគណបក្សប្រឆាំង ថាកុំឆ្លៀតឱកាសកេងចំណេញ ពីយុទ្ធនាការ«នំបញ្ចុក»ខាងលើនេះ មិនមែនជាជំហាន ទៅដល់ការចរចានយោបាយណាមួយនោះ។ លោកថ្លែង​នៅចុងបញ្ចប់ នៃសុន្ទរកថារបស់លោកថា៖

«សុំកុំយកបញ្ហា ដែលខ្ញុំនិយាយនេះ ធ្វើជាការវិភាគអ្វីផ្សេង ក្រៅពីរឿងស៊ីនំបញ្ចុក ព្រោះអ្នកខ្លះគិតថា វាជាជំហាន ទៅដល់ការចរចានយោបាយ ស្អីៗ សុំកុំភាន់ច្រឡំ ខ្ញុំនិយាយតែរឿងនំបញ្ចុកសុទ្ធសាធ និងសាមគ្គីភាព ឯកភាពជាតិ តាមរយៈការទទួលទាននំបញ្ចុក ថ្ងៃ៩មិថុនា នេះតែម្តង។»

លោក ហ៊ុន សែន បានប្រកាសកាលពីថ្ងៃទី០៣ ខែមិថុនា ឆ្នាំ២០១៩ បញ្ជារទៅសមាជិកសមាជិកា គណបក្សប្រជាជន និងអ្នកគាំទ្រគណបក្សប្រជាជន ឲ្យរៀបចំធ្វើ និងទទួលទាននំបញ្ចុកទាំងអស់គ្នា នៅថ្ងៃទី៩ ខែមិថុនាខាងមុខ ដើម្បីឆ្លើយតបទៅនឹងកម្មវិធីនំបញ្ចុកសាមគ្គី ដែលរៀបចំឡើងជាលក្ខណៈអន្តរជាតិ ដោយក្រុមអ្នកគាំទ្រគណបក្សប្រឆាំង ពីក្រៅប្រទេស។

នៅក្រោយការប្រកាសនោះ អនុប្រធានគណបក្សសង្គ្រោះជាតិ លោក អេង ឆៃអ៊ាង បានបង្ហោះសារ នៅលើគណនីហ្វេសប៊ុករបស់លោក បង្ហាញក្ដីសង្ឃឹមថា បើលោក ហ៊ុន សែន និងលោក សម រង្ស៊ី អង្គុយទទួលទាននំបញ្ចុកនេះរួមគ្នា វានឹងក្លាយជាទិវាផ្សះផ្សារបង្រួបបង្រួមជាតិ។

លោក ឆៃអ៊ាង សរសេរថា៖

«ប្រសិនបើ លោក ហ៊ុន សែន និងលោក សម រង្សុី អង្គុយទទួលទាននំបញ្ចុកជាមួយគ្នា នោះទិវានំបញ្ចុក នឹងក្លាយជា ទិវាផ្សះផ្សា និងបង្រួបបង្រួមជាតិ ។ អ្នកនយោបាយ គ្មានសត្រូវ ឬមិត្ត នឹងគ្នា មួយជីវិតឡើយ!»៕



លំអិតបន្ថែមទៀត

លោក រស់ សុឃិត ចាងហ្វាងកាសែតជាតិខ្មែរ ត្រូវបានថតរូប ក្នុងអំឡុងពេលចាប់ខ្លួន។ (រូបថតនគរបាល)
កម្ពុជា

RSF ព្រមានក្រុងភ្នំពេញ នឹងលើក​សំនុំរឿង​ចាប់ចង​អ្នកកាសែត ឡើង​ទៅ EU

អង្គការអ្នកយកព័ត៌មានគ្មានព្រំដែន (RWB /RSF) អះអាងថា នឹងលើកយកសំនុំរឿង ចាប់ចងអ្នកកាសែត នៅក្នុងប្រទេសកម្ពុជា ឡើងទៅសហភាពអ៊ឺរ៉ុប (EU) ដើម្បី​អំពាវនាវ​ឱ្យស្ថាប័នអន្តរ-រដ្ឋាភិបាលមួយនេះ រឹតបន្តឹងវិធានការ ព្យួរប្រព័ន្ធអនុគ្រោះពន្ធ «EBA» ...
កម្ពុជា

សារ​បួងសួង​សុំ​«សុខសន្ដិភាព» របស់ កឹម សុខា ក្នុង​ឱកាស​ចូលឆ្នាំថ្មី

នៅមួយថ្ងៃ មុនថ្ងៃចូលឆ្នាំថ្មីមកដល់ ទំព័រហ្វេសប៊ុករបស់ប្រធានគណបក្សសង្គ្រោះជាតិ លោក កឹម សុខា បានបង្ហោះសារបួងសួងខ្លីៗ ដើម្បីស្នើឲ្យប្រទេសកម្ពុជា និងប្រជាពលរដ្ឋខ្មែរ មាន«សុខសន្ដិភាព» និងការរួមរស់ដោយសុខដុមរមនា។ ក្នុងខណៈនេះ ប្រធានគណបក្សប្រឆាំង ...

យល់ស៊ីជម្រៅផ្នែក កម្ពុជា

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...

Comments are closed.