លោកនាយករដ្ឋមន្ត្រី ហ៊ុន សែន បានអះអាងនៅថ្ងៃនេះ ថាលោក«កំពុងជិះឡាន»ធ្វើដំណើរនៅតាមដងផ្លូវ ដោយអើត«មើលពីក្នុងរថយន្ដ» ឃើញប្រជាពលរដ្ឋកម្ពុជា ខិតខំប្រឹងប្រែងធ្វើការងារ។ ប៉ុន្តែអវត្តមានរបស់លោក ដែលមិនបានបង្ហាញខ្លួនជាសាធារណៈ តាំងពីច្រើនសប្ដាហ៍មកនោះ បានបង្កមន្ទិល ជុំវិញបញ្ហាសុខភាពរបស់លោក។
លោក ហ៊ុន សែន បានសរសេរនៅលើបណ្ដាញសង្គម អមជាមួយនឹងរូបថតមួយសន្លឹក ដែលថតរូបលោក ពីក្រោយខ្នង និងបង្ហាញថាលោក«កំពុងជិះឡាន» ក្នុងថ្ងៃនេះថា៖
«ខ្ញុំបានមើលពីក្នុងរថយន្ត ជាមួយនឹងសេចក្តីរំភើបរីករាយ ដែលបានឃើញបងប្អូនប្រជាពលរដ្ឋ និងក្មួយៗខិតខំប្រឹងប្រែងប្រកបការងារ ទោះបីការងារនោះតូចឬធំក្តី គឺបងប្អូនធ្វើដោយទឹកមុខសប្បាយរីករាយ ដើម្បីជីវភាពរស់នៅកាន់តែល្អប្រសើរ។»
ប៉ុន្តែអវត្តមានច្រើនសប្ដាហ៍ នៃការផ្សាយផ្ទាល់ និងការចេញជាសាធារណៈ ជួបភ្ញៀវជាតិ-អន្តរជាតិ ឬជួបសំណេះសំណាលជាមួយមន្ត្រីរាជការ សិស្សនិស្សិត កម្មករកសិករនោះ ជាករណីដ៏កម្រដែលគេមិនធ្លាប់ឃើញលោក ហ៊ុន សែន ធ្វើពីមុនមកទេ។
ការបង្ហាញខ្លួនជាសាធារណៈ របស់លោកនាយករដ្ឋមន្ត្រី លើកចុងក្រោយបង្អស់ គឺនៅថ្ងៃទី២៥ ខែមករា ឆ្នាំ២០១៩ ក្នុងជំនួបជាមួយកម្មករ-កម្មការិនី មកពីរោងចក្រសហគ្រាសចំនួន១២ ក្នុងខេត្តកំពត។
បន្ទាប់ពីពេលនោះមក គឺអស់រយៈពេល ១៩ថ្ងៃហើយ ដែលគេមិនបានឃើញលោក ហ៊ុន សែន បង្ហាញខ្លួនជាសាធារណៈ ជាពិសេសនៅចំពោះព្រឹត្តិការណ៍នយោបាយថ្មីៗ និងចុងក្រោយបង្អស់ ដែលគេគិតថា លោកនាយករដ្ឋមន្ត្រី គួរចេញមុខធ្វើប្រតិកម្ម។
ដំណឹងលេចឮជាច្រើន បានអះអាងថា លោក ហ៊ុន សែន កំពុងសម្រាកព្យាបាលជំងឺ«រលាកឆ្អឹងចង្កេះ» ដែលបានញាំញ៉ីរូបលោក តាំងពីច្រើនឆ្នាំមកហើយ។ មន្ត្រីផ្លូវការច្រើននាក់ របស់គណបក្សសង្គ្រោះជាតិ បានបង្ហើបឲ្យដឹងពីករណីនេះ ដោយពួកគេម្នាក់ៗ សុទ្ធតែអះអាងថា បានទទួលដំណឹងពីមនុស្សនៅជុំវិញលោក ហ៊ុន សែន។
មន្ត្រីរដ្ឋាភិបាល និងគណបក្សប្រជាជនកម្ពុជា ដែលទស្សនាវដ្ដីមនោរម្យ.អាំងហ្វូបានទាក់ទង ដើម្បីសុំការបញ្ជាក់ពីករណីនេះ បានបដិសេធមិនធ្វើអត្ថាធិប្បាយ ជុំវិញសំនួរដ៏រសើបមួយនេះឡើយ។
យ៉ាងណា លោក ហ៊ុន សែន ធ្លាប់បានបង្ហើបជាសាធារណៈ កាលពីចុងខែធ្នូកន្លងទៅ ជុំវិញជំងឺរបស់លោកមួយ ដែលគ្រូពេទ្យបានហាមលោក មិនឲ្យឈរឬអង្គុយយូរ។ លោកនាយករដ្ឋមន្ត្រី បានអះអាងក្នុងពេលនោះថា គ្រូពេទ្យរបស់លោក បានបញ្ជាមិនឲ្យលោក លេងកីឡាវាយកូនគោល ក្នុងរយៈពេលមួយខែ នៃការព្យាបាលជំងឺនោះ។
មន្ត្រីគណបក្សប្រឆាំងបានសំដែងការសង្ស័យថា លោក ហ៊ុន សែន ដែលបានតែងតាំងលោក ហ៊ុន ម៉ាណែត កូនប្រុសច្បងរបស់លោក ឲ្យឡើងកាន់តំណែងធំៗភ្លាមៗ ទាំងនៅក្នុងជួរកងទ័ព ទាំងនៅក្នុងជួរគណបក្ស ទំនងជាដោយសារលោកដឹងខ្លួន ពីស្ថានភាពជំងឺរបស់លោក ហើយលោកកំពុងរៀបចំ ឲ្យកូនរបស់លោក ត្រៀមឡើងស្នងតំណែងពីលោក។
ព្រឹត្តិការណ៍ចុងក្រោយបំផុត ដែលលោក ហ៊ុន សែន បានធ្វើជាមួយកូនប្រុសច្បងលោក គឺនៅព្រឹកថ្ងៃព្រហស្បត្តិ៍ ទី២៤ ខែមករា ឆ្នាំ២០១៩នេះ នៅក្នុងពិធីអបអរសាទរ ខួប២០ឆ្នាំ ថ្ងៃបង្កេីតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ នាទីបញ្ជាការដ្ឋានកងទ័ពជើងគោក ស្ថិតនៅតាមបណ្តោយផ្លូវជាតិលេខ៤ ក្នុងសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
ក្នុងពិធីនោះ គេឃើញលោក ហ៊ុន សែន និងលោក ហ៊ុន ម៉ាណែត ជិះរថយន្ដពីរផ្សេងគ្នា ដើម្បីត្រួតពល។ ផ្ទុយទៅវិញលោក វង្ស ពិសេន ដែលអគ្គមេបញ្ជាការនៃកងយោធពលខេមរភូមិន្ទ (មេទ័ពកំពូល ក្រោមលោក ហ៊ុន សែន តែនៅលើលោក ហ៊ុន ម៉ាណែត) មិនបានចូលត្រួតពល ជាមួយលោក ហ៊ុន សែន និងកូនប្រុសនោះទេ។
លោក សោរ ចាន់ដេត អតីតសមាជិកព្រឹទ្ធសភារបស់គណបក្ស សម រង្ស៊ី បានលើកឡើងកាលពីពេលថ្មីៗនេះថា៖
«លោក ហ៊ុន សែន អាចនៅមិនបានយូរទៀត! តាមការសង្កេតឃើញ ភាពប្រញាប់ប្រញាល់ នៃការបញ្ចេញឥទ្ធិពល ហ៊ុន ម៉ាណែត យេីងអាចធ្វេីការសន្និដ្ឋានបានថា “សុខភាពលោក ហ៊ុន សែន ឆ្លងមិនផុតទេ” ច្បាស់ជាត្រូវដួលមួយរំពេចភ្នែក»។
ប៉ុន្តែភ្លាមៗ ក្រោយពីការលើកឡើងខាងលើ លោក ហ៊ុន សែន បានប្រតិកម្មមកវិញ ដោយប្រាប់ឲ្យលោក សោរ ចាន់ដេត យកចិត្តទុកដាក់ លើសុខភាពខ្លួនលោកប្រសើរជាង ព្រោះលោក សោរ ចាន់ដេត នឹងស្លាប់មុនលោក។ លោកនាយករដ្ឋមន្ត្រី បានថ្លែងឡើង នៅតាមបណ្ដាញសង្គមថា៖
«សូមផ្តាំទៅលោកម្នាក់ ដែលធ្លាប់យកស្រីជាអនិតិជនអាយុក្រោម១៨ឆ្នាំ នៅខេត្តបាត់ដំបង ដែលរត់ទៅនៅកាណាដា ដែលទើបបង្ហោះក្នុង Facebook ថា លោក ហ៊ុន សែន នៅមិនបានយូរទៀត ដែលចង់សំដៅលើសុខភាពខ្ញុំថាមិនអាចរស់បានយូរទៀត។»
«សូមលោកយកចិត្តទុកដាក់ លើសុខភាពខ្លួនឯង ប្រសើរជាងគិតមកដល់រូបខ្ញុំ និងប្រសិនធ្វើនយោបាយ រង់ចាំខ្ញុំស្លាប់ ទើបហ៊ានចូលស្រុក ដើម្បីតស៊ូ សុំរង់ចាំជាតិក្រោយចុះ ព្រោះលោកនឹងស្លាប់មុនខ្ញុំ។»
ប៉ុន្តែសម្រាប់មន្ត្រីប្រឆាំង បើកាលណាលោក ហ៊ុន សែន ធ្លាក់ខ្លួនឈឺ វាអាចប៉ះពាល់ដល់ប្រទេសជាតិ ដោយសារតែបុរសខ្លាំងរូបនេះ ជាមេដឹកនាំ។ លោក សោរ ចាន់ដេត បានបន្តលើកឡើងថា៖
«សូមជម្រាបសម្តច ហ៊ុន សែន ជ្រាបថា ខ្ញុំពុំមានចេតនា “ប្រមាថជីវិតសម្តេច” ទេ ហើយក៏មិនត្រូវ “ខ្វាយខ្វល់សុខភាព” សម្តេចពេកនោះដែរ។ ប៉ុន្តែដោយសារសម្តេចជាអ្នកនយោបាយ និងជាអ្នកដឹកនាំ។ ដូច្នេះ បញ្ហាសុខភាពរបស់សម្ដេច ជាបញ្ហាសំខាន់បំផុត។»
«ព្រោះវាអាចកេីតមាន “រដ្ឋប្រហារ” នៅពេលស្ថានភាពសុខភាព របស់សម្ដេចធ្លាក់ចុះ “ទ្រុឌទ្រោម” កាន់តែខ្លាំងទៅ។ ដេីម្បីបញ្ជៀសការបង្ហូរឈាម រវាងគណបក្សប្រជាជន [ដែល]និយមសម្តេច និងគណបក្សប្រជាជន [ដែល]និយមសម្តេច ស ខេង សម្តេចត្រូវតែប្រកាសអ្នក “ស្នង” ជាបន្ទាន់ឲ្យហេីយទៅ»។
សម្រាប់អ្នកឃ្លាំមើលវិញ បានគិតថា បញ្ហាសុខភាពរបស់មេដឹកនាំ ឬអ្នកនយោបាយណាម្នាក់ មិនមែនជារឿងទាបថោក ឬរឿងឈ្នះចាញ់ សម្រាប់គូបដិបក្ខនោះឡើយ តែគប្បីគិតដល់ប្រទេសជាតិជាធំ ជាពិសេសពីផលអវិជ្ជមាន ដែលកើតចេញពីអវត្តមានយូរថ្ងៃ នៃមេដឹកនាំណាម្នាក់ ដែលខកខានមិនបានបំពេញភារកិច្ច ជូនជាតិ៕
