ឧបនាយករដ្ឋមន្ត្រី និងជារដ្ឋមន្ត្រីមហាផ្ទៃ លោក ស ខេង «មិនល្ងង់»ធ្វើរដ្ឋប្រហារ ទម្លាក់លោកនាយករដ្ឋមន្ត្រី ហ៊ុន សែន ហើយយកអំណាចទៅឲ្យលោក សម រង្ស៊ី នោះទេ។ នេះ ជាការអះអាងឡើង របស់បុរសខ្លាំងកម្ពុជា ដើម្បីប្រតិកម្មតប ទៅនឹងការបង្ហើបរបស់មេដឹកនាំប្រឆាំង កាលពីប៉ុន្មានថ្ងៃមុន ដែលជឿជាក់ថា លោក ស ខេង កំពុងត្រៀមកម្លាំង ដើម្បីកម្ចាត់នាយករដ្ឋមន្ត្រី ឲ្យបានមុន។
លោក ហ៊ុន សែន ថ្លែងឡើងដូច្នេះ នៅក្នុងពិធីបើកការដ្ឋាន សាងសង់អគារច្រកទ្វារព្រំដែនអន្តរជាតិ ស្ទឹងបត់ និងផ្លូវតភ្ជាប់ទៅផ្លូវជាតិលេខ៥ ពីក្រុងប៉ោយប៉ែត ក្នុងព្រឹកថ្ងៃចន្ទទី២២ ខែមេសា ឆ្នាំ២០១៩នេះ។
នាយករដ្ឋមន្ត្រីកម្ពុជា បានមានប្រសាសន៍ថា៖
«សូម្បីសម្ដេចក្រឡាហោម [ស ខេង] ប្រើគាត់ឲ្យធ្វើរដ្ឋប្រហាទំលាក់ខ្ញុំ គឺក៏មិនចាំបាច់តប ជាមួយអាឡប់ណាទេ។ ឥលូវយើងសាកគិតជាមួយគ្នាមើល! វាមិនដែលម៉ែអាណា ឲ្យឧបនាយករដ្ឋមន្ដ្រី មកផ្ដួលនាយករដ្ឋមន្ដ្រី មានន័យស្មើនឹងអី? មានន័យស្មើនឹងរដ្ឋប្រហារ ចេះប្រើគេទៅរួច។»
«រួចហើយយកអំណាច ទៅឲ្យពីណាគេ? យកអំណាចទៅវាហ្នឹង! នឹកស្មានថា សម្ដេចក្រឡាហោម [ស ខេង] ល្ងង់ណាស់ទៅហ្អី?»
លោក ហ៊ុន សែន បញ្ជាក់ថា លោកបានប្រាប់លោក ស ខេង ដែលលោកអះអាងថា«មិនល្ងង់»នោះ កុំឲ្យឆ្លើយឆ្លង ជាមួយលោក សម រង្ស៊ី ដោយចាត់ទុកមេដឹកនាំប្រឆាំង ថាជា«សត្វធាតុ»។ បុរសខ្លាំងបានថ្លែងឡើងថា៖
«អ៊ីចឹង! មិនបាច់សម្តេចក្រឡាហោមឆ្លើយតបទេ ព្រោះយើងបានឯកភាពគ្នាហើយ ថ្ងៃមុនចូលទៅប្រជុំគណៈរដ្ឋមន្ត្រី ខ្ញុំថា មិនបាច់ឆ្លើយជាមួយវាទេ។ កុំឆ្លើយជាមួយវា។ ឆ្កែខាំជើងយើង យើងកុំយកមាត់យើងទៅខាំឆ្កែ ពីព្រោះអានេះ ស្មើនឹងសត្វធាតុទៅហើយ។»
កាលពីថ្ងៃសុក្រទី១៩ ខែមេសា សប្ដាហ៍មុន មេដឹកនាំប្រឆាំង លោក សម រង្ស៊ី បានថ្លែងតាមវិទ្យុអាស៊ីសេរីបង្ហាញជំនឿថា លោកឧបនាយករដ្ឋមន្ត្រី ស ខេង ដែលជាបុរសខ្លាំងទីពីរ នៃរបបដឹកនាំក្រុងភ្នំពេញ កំពុងត្រៀមកម្លាំងរួចជាស្រេចហើយ។ លោក សម រង្ស៊ី បានស្នើឲ្យលោក ស ខេង ត្រូវបើកប្រតិបត្តិការ«វាយកម្ចាត់»លោក ហ៊ុន សែន ឲ្យបានមុន ដោយមិនត្រូវទុកឲ្យលោក ហ៊ុន សែន ធ្វើប្រតិបត្តិការកម្ទេចមុន នោះឡើយ។
យ៉ាងណា បើទោះជាលោក ហ៊ុន សែន បានហាមមន្ត្រីលោក មិនឲ្យលើកឡើង តបតនឹងលោក សម រង្ស៊ី ក្ដី ក៏លោក ស ខេង បានថ្លែងដោយប្រយោល ក្នុងពិធីបញ្ចុះខណ្ឌសីមា នៅវត្តមួយក្នុងខេត្តព្រៃវែង ទទួលស្គាល់ថា របបដឹកនាំរបស់លោក ហ៊ុន សែន បច្ចុប្បន្ន ពិតជាមាន«កំហុសខ្លះ» តែថា កំហុសទាំងនេះអាចកែសម្រួលបាន មិនធ្ងន់ធ្ងរដែលត្រូវឱ្យផ្តួលរំលំទេ។ ការថ្លែងនោះ ធ្វើឡើងនៅថ្ងៃទី២០ ខែមេសា ឆ្នាំ២០១៩ ពោលគឺនៅមួយថ្ងៃ ក្រោយការអំពាវនាវ របស់លោក សម រង្ស៊ី៕
