កម្ពុជាដំណឹង

ហ៊ុន សែន ថា ស ខេង «មិនល្ងង់»​ដណ្ដើម​អំណាច​យកទៅ​ឲ្យ សម រង្ស៊ី

ឧបនាយករដ្ឋមន្ត្រី និងជារដ្ឋមន្ត្រីមហាផ្ទៃ លោក ស ខេង «មិនល្ងង់»ធ្វើរដ្ឋប្រហារ ទម្លាក់លោកនាយករដ្ឋមន្ត្រី ហ៊ុន សែន ហើយយកអំណាចទៅឲ្យលោក សម រង្ស៊ី នោះទេ។ នេះ ជាការអះអាងឡើង របស់បុរសខ្លាំងកម្ពុជា ដើម្បីប្រតិកម្មតប ទៅនឹងការបង្ហើបរបស់មេដឹកនាំប្រឆាំង កាលពីប៉ុន្មានថ្ងៃមុន ដែលជឿជាក់ថា លោក ស ខេង កំពុងត្រៀមកម្លាំង ដើម្បីកម្ចាត់នាយករដ្ឋមន្ត្រី ឲ្យបានមុន។

លោក ហ៊ុន សែន ថ្លែងឡើងដូច្នេះ នៅក្នុងពិធីបើកការដ្ឋាន សាងសង់អគារច្រកទ្វារព្រំដែនអន្តរជាតិ ស្ទឹងបត់ និងផ្លូវតភ្ជាប់ទៅផ្លូវជាតិលេខ៥ ពីក្រុងប៉ោយប៉ែត ក្នុងព្រឹកថ្ងៃចន្ទទី២២ ខែមេសា ឆ្នាំ២០១៩នេះ។

នាយករដ្ឋមន្ត្រីកម្ពុជា បានមានប្រសាសន៍ថា៖

«សូម្បីសម្ដេចក្រឡាហោម [ស ខេង] ប្រើគាត់ឲ្យធ្វើរដ្ឋប្រហាទំលាក់ខ្ញុំ គឺក៏មិនចាំបាច់តប ជាមួយអាឡប់ណាទេ។ ឥលូវយើងសាកគិតជាមួយគ្នាមើល! វាមិនដែលម៉ែអាណា ឲ្យឧបនាយករដ្ឋមន្ដ្រី មកផ្ដួលនាយករដ្ឋមន្ដ្រី មានន័យស្មើនឹងអី? មានន័យស្មើនឹងរដ្ឋប្រហារ ចេះប្រើគេទៅរួច។»

«រួចហើយយកអំណាច ទៅឲ្យពីណាគេ? យកអំណាចទៅវាហ្នឹង! នឹកស្មានថា សម្ដេចក្រឡាហោម [ស ខេង] ល្ងង់ណាស់ទៅហ្អី?»

លោក ហ៊ុន សែន បញ្ជាក់ថា លោកបានប្រាប់លោក ស ខេង ដែលលោកអះអាងថា«មិនល្ងង់»នោះ កុំឲ្យឆ្លើយឆ្លង ជាមួយលោក សម រង្ស៊ី ដោយចាត់ទុកមេដឹកនាំប្រឆាំង ថាជា«សត្វធាតុ»។ បុរសខ្លាំងបានថ្លែងឡើងថា៖

«អ៊ីចឹង! មិនបាច់សម្តេចក្រឡាហោមឆ្លើយតបទេ ព្រោះយើងបានឯកភាពគ្នាហើយ ថ្ងៃមុនចូលទៅប្រជុំគណៈរដ្ឋមន្ត្រី ខ្ញុំថា មិនបាច់ឆ្លើយជាមួយវាទេ។ កុំឆ្លើយជាមួយវា។ ឆ្កែខាំជើងយើង យើងកុំយកមាត់យើងទៅខាំឆ្កែ ពីព្រោះអានេះ ស្មើនឹងសត្វធាតុទៅហើយ។»

កាលពីថ្ងៃសុក្រទី១៩ ខែមេសា សប្ដាហ៍មុន មេដឹកនាំប្រឆាំង លោក សម រង្ស៊ី បានថ្លែងតាមវិទ្យុអាស៊ីសេរីបង្ហាញជំនឿថា លោកឧបនាយករដ្ឋមន្ត្រី ស ខេង ដែលជាបុរសខ្លាំងទីពីរ នៃរបបដឹកនាំក្រុងភ្នំពេញ កំពុងត្រៀមកម្លាំងរួចជាស្រេចហើយ។ លោក សម រង្ស៊ី បានស្នើឲ្យលោក ស ខេង ត្រូវបើកប្រតិបត្តិការ​​«វាយកម្ចាត់»​លោក ហ៊ុន សែន ឲ្យបានមុន ដោយមិនត្រូវទុកឲ្យលោក ហ៊ុន សែន ធ្វើប្រតិបត្តិការកម្ទេចមុន នោះឡើយ។

យ៉ាងណា បើទោះជាលោក ហ៊ុន សែន បានហាមមន្ត្រីលោក មិនឲ្យលើកឡើង តបតនឹងលោក សម រង្ស៊ី ក្ដី ក៏លោក ស ខេង បានថ្លែងដោយប្រយោល ក្នុងពិធីបញ្ចុះខណ្ឌសីមា នៅវត្តមួយក្នុងខេត្តព្រៃវែង ទទួលស្គាល់ថា របបដឹកនាំរបស់លោក ហ៊ុន សែន បច្ចុប្បន្ន ពិតជាមាន«កំហុសខ្លះ» តែថា កំហុសទាំងនេះអាចកែសម្រួលបាន មិនធ្ងន់ធ្ងរដែលត្រូវឱ្យផ្តួលរំលំទេ។ ការថ្លែងនោះ ធ្វើឡើងនៅថ្ងៃទី២០ ខែមេសា ឆ្នាំ២០១៩ ពោលគឺនៅមួយថ្ងៃ ក្រោយការអំពាវនាវ របស់លោក សម រង្ស៊ី៕



លំអិតបន្ថែមទៀត

កម្ពុជា

«ឯកឧត្ដម​ទេសរដ្ឋមន្ត្រី» វីល្លៀម គ័ង ត្រូវបាន​បណ្ដេញ​ចេញ​ពីតំណែង

លោក វីល្លៀម គ័ង (William Guang) ដែលជាឈ្មោះពិសេស ហៅក្រៅពីឈ្មោះដើម សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក ត្រូវបានបណ្ដេញចេញពីតំណែង ជាសមាជិកឧត្ដមប្រឹក្សា ពិគ្រោះនិងផ្ដល់យោបល់ ...
កម្ពុជា

អ្នកវិភាគ៖ ពលរដ្ឋខ្មែរ​ចង់ឃើញ​វៀតណាម ដឹងគុណ​ខ្មែរ​ម្ដងវិញ

ការរំលើកម្ដងហើយ ម្ដងទៀត ពីគុណូបការៈ នៃប្រទេសវៀតណាម ចំពោះទង្វើ ដែលត្រូវបានហៅថា ជា«ការរំដោះ» ប្រជាជនកម្ពុជា ពីរបបវាលពិឃាត ខ្មែរក្រហមនោះ វាជារឿងមួយ។ ហើយសម្រាប់ការគោរពដឹងគុណ ពីសំណាក់​គណបក្សប្រជាជនកម្ពុជា ...
កម្ពុជា

សម រង្ស៊ី ប្រាប់ ស ខេង ដែល​ត្រៀម​កម្លាំង​រួច ឲ្យ​កម្ចាត់ ហ៊ុន សែន មុន

លោក សម រង្ស៊ី បានប្រកាសនៅថ្ងៃនេះ ឲ្យបុរសទីពីរនៃរបបក្រុងភ្នំពេញ គឺលោក ស ខេង ដែលមេដឹកនាំប្រឆាំងជឿថា បានត្រៀមកម្លាំងរួចជាស្រេចនោះ ឲ្យបើកប្រតិបត្តិការ​«វាយកម្ចាត់»​លោក ហ៊ុន សែន ...

យល់ស៊ីជម្រៅផ្នែក កម្ពុជា

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...

Comments are closed.