នៅថ្ងៃអាទិត្យ ទី១០ ខែកក្កដា ឆ្នាំ២០២២ខាងមុខនេះ កម្ពុជានឹងធ្វើការកាន់ទុក្ខសពអតីតនាយករដ្ឋមន្ត្រីជប៉ុន លោក ស៊ីនហ្សូ អាបេ (Shinzo Abe) ដែលបានធ្វើមរណភាព កាលពីថ្ងៃសុក្រម្សិលមិញ បន្ទាប់ពីរកការបាញ់ប្រហារ ពីខ្មាន់កាំភ្លើងម្នាក់។ នេះ បើតាមការប្រកាសរបស់នាយករដ្ឋមន្ត្រីកម្ពុជា លោក ហ៊ុន សែន នៅក្នុងសារសម្លេងមួយរបស់លោក ផ្សាយនៅលើបណ្ដាញសង្គម កាលពីប៉ុន្មាននាទីមុន។
នៅក្នុងសារសម្លេងនោះ បុរសខ្លាំងនៅកម្ពុជា បានលើកពីស្នាដៃ ពីការដឹកនាំ និងពីគុណូបការៈដ៏ច្រើន របស់លោក អាបេ ជាពិសេសទំនាក់ទំនងដោយផ្ទាល់ រវាងប្រទេសជប៉ុន និងកម្ពុជា នៅក្នុងសម័យកាលដឹកនាំរបស់លោក អាបេ។
លោក ហ៊ុន សែន បានថ្លែងឲ្យដឹងថា៖
«គុណបំណាច់ដ៏ធំ របស់ឯកឧត្ដម ស៊ីនហ្សូ អាបេ ជាមួយនឹងប្រជាជនកម្ពុជា ក៏ដូចជាប្រជាជន ក្នុងតំបន់មេគង្គ និងតំបន់អាស៊ាន បានធ្វើឲ្យយើងនឹកឃើញ ទៅដល់សកម្មភាពដ៏សប្បុរស និងស្មោះត្រង់ ដែលយើងចាំបាច់ត្រូវធ្វើកាយវិការ ដើម្បីបង្ហាញនូវសាមគ្គីភាព និងការសោកស្ដាយ សម្រាប់មរណភាពរបស់ឯកឧត្ដម ស៊ីនហ្សូ អាបេ។»
មេដឹកនាំកម្ពុជា បានបញ្ជាឲ្យបណ្ដាគ្រឹះស្ថាននានា ទាំងសាធារណៈ និងឯកជនទាំងអស់ ត្រូវទម្លាក់ទង់ជាតិពាក់កណ្ដាលដង ដើម្បីចូលរួមមរណទុក្ខខាងលើ។
លោក ស៊ីនហ្សូ អាបេ អតីតនាយករដ្ឋមន្ត្រីជប៉ុន អាយុ៦៧ឆ្នាំ ត្រូវបានខ្មាន់កាំភ្លើងបាញ់ ឲ្យរងរបួសធ្ងន់ធ្ងរ កាលពីថ្ងៃសុក្រ ទី៨ ខែកក្កដា ឆ្នាំ២០២២ ក្នុងពេលលោកកំពុងថ្លែង ក្នុងយុទ្ធនាការស្វែងរកសំឡេងឆ្នោត សម្រាប់ការបោះឆ្នោតសភាជាន់ខ្ពស់។ លោកបានទទួលមរណភាព នៅវេលាម៉ោងប្រមាណជា៥រសៀល (ម៉ោងក្នុងប្រទេសជប៉ុន)។
គួរបញ្ជាក់ដែរថា ថ្ងៃអាទិត្យទី១០ ខែកក្កដា ខាងមុខនេះដដែល ក៏ជាថ្ងៃខួបលើកទី៦ នៃឃាតកម្មទៅលើលោកបណ្ឌិត កែម ឡី អ្នកវិភាគនយោបាយ និងសង្កម ដែលត្រូវបានឃាតករបាញ់សម្លាប់ ក្នុងហាងទំនិញស្ដារម៉ាត ភ្លើងស្ដុបបូកគោ កណ្ដាលរាជធានីភ្នំពេញ កាលពីឆ្នាំ២០១៦កន្លងទៅនោះដែរ។ ក្នុងថ្ងៃរំឮកខួបនេះ បណ្ដាសង្គមស៊ីវិល និងមនុស្សម្នាច្រើននាក់ មានគម្រោងធ្វើការជួបជុំគ្នា ដើម្បីរៀបចំប្រារព្ធពិធីសាសនា ដើម្បីឧទ្ទិសដល់វិញ្ញាណក្ខន្ធអ្នកធ្វើអត្ថាធិប្បាយនយោបាយ និងសង្គម ដ៏ល្បីល្បាញរូបនេះ៕
