នាយករដ្ឋមន្ត្រីកម្ពុជា បានសំដែងកំហឹង ក្នុងការថ្លែងរបស់លោក នារសៀលថ្ងៃអង្គារនេះ ដាក់«អាខ្លះ»ណាមួយនោះ ដែលលោកអះអាងថា មិនហានស្បថជាមួយលោកទេ តែមកបបួល«ភ្នាល់»ជាមួយលោក។
បើទោះជា«អាខ្លះ»នោះ មិនត្រូវបានបញ្ចេញឈ្មោះឲ្យដឹងក្ដី តែដំណើររឿង«ភ្នាល់»និង«ស្បថ» ដែលបានកើតឡើង ក្នុងមជ្ឈដ្ឋានអ្នកនយោបាយ ក្នុងពេលកន្លងមក មិនមាន«អាខ្លះ»ណាផ្សេង ក្រៅពីលោក សម រង្ស៊ី ដែលជាគូបដិបក្ខនយោបាយ របស់នាយករដ្ឋមន្ត្រីកម្ពុជា នោះឡើយ។
នៅចំពោះមន្ត្រីច្រើនរយនាក់ ក្នុងពិធីបិទសន្និបាត បូកសរុបការងារ ឆ្នាំ២០១៨ និងលើកទិសដៅការងារ ឆ្នាំ២០១៩ របស់ក្រសួងសុខាភិបាល ពីសណ្ឋាគារសូហ្វីតែលភ្នំពេញ បុរសខ្លាំងកម្ពុជាបានថ្លែងឡើងថា៖
«អាខ្លះនោះ វាមិនបបួលស្បថទេ វាបបួលភ្នាល់។ ឥឡូវហ្អែងបបួលស្បថទៅ ថ្ងៃក្រោយ អញមិនភ្នាល់អីទាំងអស់។ អញបបួលស្បថតែម្ដង និយាយខុសឲ្យស្បថ ន៎ែ! អាណាមួលប្រកាច់អញ ស្បថឲ្យងាប់។ ឲ្យវារលាយទាំងពូជតែម្ដង ព្រោះវាមិនព្រមកែទេ។»
លោក ហ៊ុន សែន បន្តថា៖
«តែខ្ញុំអត់និយាយតប ឲ្យដឹងថា ជាអាណាទេ។ តែអាទទាយំឆ្លង អាហ្នឹងដឹងហើយ។»៕
