ហ៊ុន សែន «ធ្លោយមាត់»ថា ទូរទស្សន៍ឯកជនជាម៉ាស៊ីនឃោសនាឲ្យរដ្ឋាភិបាល
ប្រសិនជាអង្គការអ្នកយកព័ត៌មានគ្មានព្រំដែន ធ្លាប់បានបរិហារថា ប្រព័ន្ធផ្សព្វផ្សាយ ត្រូវបានលោក ហ៊ុន សែន និងគណបក្សកាន់អំណាច កាន់ក្ដាប់យ៉ាងណែន នៅក្នុងដៃនោះ នៅថ្ងៃនេះ គឺលោក ហ៊ុន សែន ខ្លួនលោកជាអ្នក«ធ្លោយមាត់»ថា បណ្ដាស្ថានីយ៍ទូរទស្សន៍ឯកជននៅក្នុងប្រទេស គឺជា«ក្បាលម៉ាស៊ីន»ឃោសនា ឲ្យការងាររដ្ឋាភិបាលរបស់លោក។ បុរសខ្លាំងកម្ពុជា ដែលអង្គុយនៅក្នុងអំណាច តាំងពីជាងបីទសវត្សមកនោះ ថែមទាំងបានអះអាងទៀតថា បុគ្គលិកជាច្រើន ពីក្នុងស្ថានីយ៍ទូរទស្សន៍ទាំងនោះ បានទទួលប្រាក់ ពីលោកនោះផង។
សំដីអះអាងនោះ ធ្វើឡើងតាមរយៈសារសម្លេងមួយ ដែលលោក ហ៊ុន សែន បានថតផ្ញើរទៅកាន់ លោក អ៊ុក វូរ៉ា អគ្គនាយកស្ថានីយ៍ទូរទស្សន៍ CNC ដើម្បីបញ្ជាឲ្យមេដឹកនាំស្ថាប័នផ្សព្វផ្សាយឯកជនរូបនេះ ចុះចេញពីតំណែង បន្ទាប់ពីមានបញ្ហាប្រទាំងប្រទើសផ្ទៃក្នុងមួយ នៅក្នុងក្រុមហ៊ុន។
លោកនាយករដ្ឋមន្ត្រី បានថ្លែងឡើងថា៖
«ក្រៅតែពីរឿងកងទ័ព គឺខ្ញុំមិនដែលធ្វើការ ទាំងយប់អាធ្រាតបែបនេះទេ។ ក៏ប៉ុន្តែស្ថានីយ៍ទូរទស្សន៍មួយ ដែលជាក្បាលម៉ាស៊ីន [ឃោសនា] សម្រាប់ការងាររាជរដ្ឋាភិបាល ខ្ញុំត្រូវតែធ្វើការឈឺឆ្អាល។»
លោក ហ៊ុន សែន បន្ត«ធ្លោយមាត់»ទៀតថា៖
«ទូរទស្សន៍ទាំងអស់ គឺបុគ្គលិក CNC ហើយ ដែលទទួលបានការឧបត្ថម្ភគាំទ្រ ពីខ្ញុំ និងពីភរិយារបស់ខ្ញុំ ច្រើនជាងគេបង្អស់។ បាយ័ន បានតិចតួចណាស់ ក៏ប៉ុន្តែបុគ្គលិក CNC CTN គឺសុទ្ធតែជាបុគ្គលិក ដែលខ្ញុំ (…) មួយចំនួនណានោះ មិនទាំងអស់ទេ គឺបានទទួលប្រាក់ឧបត្ថម្ភ តាមពិធីបុណ្យទាននានា គឺខ្ញុំយកចិត្តទុកដាក់ ពីបញ្ហានេះ។»
បុរសខ្លាំងកម្ពុជា នៅបានគម្រាមដល់ម្ចាស់ស្ថានីយ៍ទូរទស្សន៍ លោក គិត ម៉េង ដែលគេស្កាល់ថា ជាមនុស្សជំនិតរបស់លោក នោះទៀតថា៖
«នេះ ខ្ញុំយល់ដល់លោក [អ៊ុក វូរ៉ា] ហើយ បានជាខ្ញុំនិយាយ។ បើខ្ញុំមិនយល់ទេ ខ្ញុំប្រាប់ [គិត] ម៉េង ដោយដេញលោកចោល។ បើ ម៉េង មិនហ៊ានដេញលោកចោលទេ គឺ ម៉េង សាកល្បងជាមួយខ្ញុំ ម៉េង ក្លាយទៅជាសត្រូវរបស់ខ្ញុំ។ ហើយ ថាតើមុខរបររបស់ ម៉េង នឹងជួបប្រទះអ្វីខ្លះ? នៅក្នុងស្ថានភាព ដែលទទួលការគាំទ្រពីខ្ញុំ ផ្នែកមុខរបរ។ (…) គិត ម៉េង មិនអាចជ្រើសរើសលោក ហើយទាត់ចោលខ្ញុំបានទេ។»
កាលពីពាក់កណ្ដាលខែកុម្ភៈ ឆ្នាំ២០១៨កន្លងទៅ អង្គការអ្នកយកព័ត៌មានគ្មានព្រំដែន (Reporters Without Borders/ Reporters sans frontières) ដែលមានទីស្នាក់ការកណ្ដាលក្នុងរដ្ឋធានីប៉ារីស ប្រទេសបារាំង បានចេញរបាយការណ៍មួយអះអាងថា ប្រព័ន្ធផ្សព្វផ្សាយធំៗ នៅក្នុងប្រទេសកម្ពុជា សុទ្ធតែត្រូវបានគណបក្សកាន់អំណាច ក្ដាប់យ៉ាងណែននៅក្នុងដៃ ក្នុងនោះក្រុមហ៊ុនប្រព័ន្ធផ្សព្វផ្សាយធំបំផុតចំនួន៤ មានអ្នកគ្រប់គ្រងជាសមាជិករដ្ឋាភិបាល ឬជាសាច់ញាតិរបស់លោក ហ៊ុន សែន។
ផ្ទុយទៅវិញ ប្រព័ន្ធផ្សព្វផ្សាយឯករាជ្យ ដែលមិនចំណុះ ឲ្យរដ្ឋាភិបាលលោក ហ៊ុន សែន មិនមានវាសនាល្អប៉ុន្មានទេ។
អង្គការឃ្លាំមើល សិទ្ធិសេរីភាពសារព័ត៌មានខាងលើ បានរកឃើញថា ក្នុងរយៈពេលប៉ុន្មានខែចុងក្រោយ ស្ថាប័នសារព័ត៌មានឯករាជ្យ ជាច្រើនស្ថាប័ន បានរងការគម្រាមកំហែង រហូតត្រូវបង្ខំចិត្តបិទទ្វា ខណៈអ្នកសារព័ត៌មាន របស់ស្ថាប័នទាំងនោះ រួមនឹងគ្រួសាររបស់ពួកគេផង បានរងការគម្រាមកំហែង ដោយផ្ទាល់ ឬដោយប្រយោល ពីបញ្ហាសន្តិសុខ-សុវត្ថិភាពធ្ងន់ធ្ងរ៕
