ថ្ងៃទី១៤ ខែកុម្ភៈ ឆ្នាំ២០១៩ ដែលជាថ្ងៃបុណ្យនៃក្ដីស្រឡាញ់ លោកនាយករដ្ឋមន្ត្រី ហ៊ុន សែន បានអះអាងដកឃ្លា មិននិយាយពីនយោបាយឡើយ។ លោកបានយកឱកាសនេះ ដើម្បីរំលឹកដល់យុវវ័យទាំងឡាយ កុំឲ្យប្រព្រឹត្តិ«ខុសប្រពៃណីទំនៀមទម្លាប់»ខ្មែរ ដោយលើកពីរូបលោក និងភរិយាលោកមកបង្ហាញ ថាជា«ប្ដីប្រពន្ធ​ទទួលស្គាល់​ដោយសង្គម»។

នាយករដ្ឋមន្ត្រីបីទសវត្សរ៍ជាងរបស់កម្ពុជា បានថ្លែងរបៀបកំប្លែង នៅលើបណ្ដាញសង្គមថា៖

«ថ្ងៃនេះជាថ្ងៃ ១០ កើត ខែមាឃ ឆ្នាំច បើនិយាយជាថ្ងៃតាមចន្ទគតិបែបនេះ ប្រហែលជាគ្មានក្មួយៗចៅៗណា​ចាប់អារម្មណ៍ទេមើលទៅ តែបើនិយាយថាជាថ្ងៃ១៤កុម្ភៈ ប្រហែលជាមានអ្នកចាប់អារម្មណ៍ច្រើន អ្នកខ្លះប្រហែលជាបានរៀបចំផែនការរួចរាល់ហើយផងក៏មិនដឹង។»

«ថ្ងៃនេះតាមិនចង់និយាយ ពីរឿងនយោបាយអីទេ គ្រាន់តែចង់និយាយ ទៅកាន់ចៅៗដែលទើបពេញវ័យ។ ចៅៗសុទ្ធតែដឹងហើយថា អ្វីដែលគួរធ្វើ និងអ្វីដែលមិនគួរធ្វើ ជាពិសេស នៅថ្ងៃទិវានៃក្តីស្រលាញ់នេះតែម្តង។ តានិយាយនេះ មិនមែនចង់ជ្រៀតជ្រែកចូលកិច្ចការយុវវ័យនោះទេ តែការប្រព្រឹត្ត”ខុសប្រពៃណីទំនៀមទម្លាប់”ខ្មែរ ក៏មិនមែនជាកិច្ចការយុវជនយុវនារីដែរ។»

យ៉ាងហោចណាស់ក្រសួងអប់រំ យុវជន និងកីឡា និងក្រសួងវប្បធម៌ និងវិចិត្រសិល្បៈ បានចេញសេចក្ដីណែនាំបន្តបន្ទាប់គ្នា ដោយរំលឹកទៅដល់យុវជនផ្ទាល់ និងមាតាបិតារបស់យុវជនផង ឲ្យទប់ស្កាត់ទង្វើដែលមិនគប្បី នៅក្នុងទិវាបុណ្យនៃក្ដីស្រឡាញ់នេះ កាលពីប៉ុន្មានថ្ងៃមុន ដែលផ្ទុយពីលោក ហ៊ុន សែន ដែលធ្វើរំលឹក នៅក្នុងថ្ងៃនេះតែម្ដង។

ដោយមានអមមកជាមួយ នូវរូបថតមួយសន្លឹក ដែលលោកថតជាមួយភរិយាលោក គឺអ្នកស្រី ប៊ុនរ៉ានី ហ៊ុនសែន នោះផង បុរសខ្លាំងកម្ពុជាបានរំលឹក​ពីប្រវត្តិនៃការស្រឡាញ់គ្នាដំបូង រវាងលោកនិងភរិយា ដែលលោកអះអាងថា ជាការ«តស៊ូជាមួយគ្នា» រហូតមានថ្ងៃនេះ។ លោកបានរៀបរាប់ថា៖

«តាមកដល់អាយុប៉ុណ្ណេះ តាក៏ធ្លាប់ឆ្លងកាត់ជីវិតយុវវ័យដែរ តាដឹងថា អារម្មណ៍រំភើបពេលជួបអ្នកដែលខ្លួនស្រលាញ់វាយ៉ាងដូចម្តេច។ នៅក្នុងសម័យយុវវ័យរបស់តា និងយាយ ទោះពេលនោះយើងស្ថិតក្នុងសម័យសង្គ្រាមតស៊ូ ទោះជាពួកយើងស្រលាញ់គ្នាយ៉ាងណា ក៏ពួកយើងនៅតែគោរពគ្នា រក្សាប្រពៃណី តស៊ូជាមួយគ្នារហូតដល់​ក្លាយជា​ប្តីប្រពន្ធ ដែលទទួលស្គាល់ដោយសង្គម។»

«តាបានអានអត្ថបទ របស់អ្នកស្រាវជ្រាវសង្គមម្នាក់ ដែលគេបានកត់សម្គាល់ថា ចៅៗ​យុវវ័យឥឡូវ ហាក់ដូចជាមានភាពចាស់ទុំច្រើន បើប្រៀបធៀបមើលពីឥរិយាបទឆ្នាំមុនៗ នៅថ្ងៃបុណ្យនៃក្តីស្រលាញ់នេះ។ ចៅៗភាគច្រើនចេះគិតគូរហើយ មិនប្រព្រឹត្តអ្វីដែលផ្ទុយនឹងប្រពៃណីខ្មែរឡើយ។ ការសិក្សានេះ ធ្វើឱ្យតាសប្បាយចិត្ត។»

លោកនាយករដ្ឋមន្ត្រី បានបញ្ចប់វគ្គរំលឹកយុវវ័យរបស់លោក ដោយការជូនពរដូច្នេះថា៖

«សូមចៅៗ បង្ហាញនូវការស្រលាញ់ ដោយក្តីគោរព ក្នុងថ្ងៃ១៤កុម្ភៈនេះ»៕



You may also like

កម្ពុជា

លឺ ឡាយស្រេង សុំ ហ៊ុន សែន ត្រឡប់​ចូល​កម្ពុជា​វិញ ព្រោះ​នឹក​ស្រុក

លោក លឺ ឡាយស្រេង អតីតឧបនាយករដ្ឋមន្ត្រី មកពីគណបក្សហ្វុនស៊ីនប៉ិច បានថ្លែងស្នើសុំ ទៅលោកនាយករដ្ឋមន្ត្រី ហ៊ុន សែន ឲ្យអនុញ្ញាតឲ្យរូបលោក បានវិលត្រឡប់ចូលប្រទេសកម្ពុជាវិញ ឲ្យបានយ៉ាងហោចណាស់ ក្នុងឱកាសបុណ្យចូលឆ្នាំប្រពៃណីខ្មែរ ...
វប្បធម៌ និងជីវិត

ធ្វើ​យ៉ាងម៉េច​ទើប​នារី​ដែល​អ្នក​លួចបេតី ស្រលាញ់​អ្នកវិញ ?

ស្រលាញ់​អ្នកវិញ ៖ ធម្មតា ពេលអ្នកលួចស្រលាញ់នារី ណាម្នាក់ មិនមែននៅសុខៗ ក៏ទៅប្រាប់គេត្រង់ៗ ថាអ្នកស្រលាញ់នាងនោះទេ។ ពេលខ្លះ នាងមិនទាន់បានត្រៀមចិត្ត ឬពេលខ្លះ បើនាងបដិសេធភ្លាមៗ អ្នកក៏ខូចចិត្ត។ ...
កម្ពុជា

សម រង្ស៊ី ពន្យល់​ពី​«ការ​បោកបញ្ឆោត»​របស់ ហ៊ុន សែន

ប្រធានស្តីទីគណបក្សសង្គ្រោះជាតិ លោក សម រង្ស៊ី បានចេញលិខិតអំពាវនាវមួយ ទៅកាន់ថ្នាក់ដឹកនាំ សកម្មជន និងអ្នកគាំទ្រគណបក្សសង្គ្រោះជាតិទាំងអស់ ត្រូវ «រក្សាជំហរឲ្យរឹងមាំ កុំចាញ់ការសម្លុត និងការបោកបញ្ឆោត» ពីលោក ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...