កម្ពុជាដំណឹង

ហ៊ុន សែន ឲ្យ«កាត់ភ្លើង»ផ្ទះអ្នកវិភាគ ដែល​រិះគន់​ការដាច់​ចរន្ត​ជ្រុលហួស

លោក ហ៊ុន សែន នាយករដ្ឋមន្ត្រីកម្ពុជា។ (រូបថត AFP)

នាយករដ្ឋមន្ត្រីកម្ពុជា បានថ្លែងក្នុងព្រឹកនេះ ឲ្យ«កាត់ភ្លើង»សម្រាប់ផ្គត់ផ្គង់ផ្ទះ របស់អ្នកវិភាគណា ដែលរិះគន់ការគ្រប់គ្រង របស់រដ្ឋាភិបាលលោក ផ្នែកផ្គត់ផ្គង់អគ្គិសនី ដែលនាំឲ្យមានការផ្ដាច់អគ្គិសនី នៅក្នុងប្រទេសតាំងពីច្រើនសប្ដាហ៍ នោះមក។

លោក ហ៊ុន សែន បានថ្លែងដូច្នេះ នៅក្នុងពិធីសម្ពោធ ដាក់ឱ្យដំណើរការជាផ្លូវការ នូវប្រព័ន្ធផ្គត់ផ្គង់ទឹកស្អាត នៅខេត្តកំពត ដែលសាងសង់ឡើង ក្រោមជំនួយរបស់រដ្ឋាភិបាលជប៉ុន។

បន្ទាប់ពីព្រមានក្រុមអ្នកវិភាគ ឲ្យប្រយ័ត្ន«រន្ទះបាញ់» បើសិនជាមើលមកលោក និងរដ្ឋាភិបាលលោក តែនៅក្នុង«ផ្លូវអាក្រក់»នោះ លោក ហ៊ុន សែន បានងាកទៅបញ្ជាមន្ត្រីជំនិតរបស់លោក ដែលអង្គុយនៅខាងក្រោយខ្នង ឲ្យ«កាត់ភ្លើង» (ផ្ដាច់ចរន្ដ) សម្រាប់ផ្ទះអ្នកវិភាគណា ដែលលើកឡើងថា ការដាច់ភ្លើង ជាលេសដើម្បីសង់វារីអគ្គិសនីបន្ថែម។

បុរសខ្លាំងកម្ពុជា បានថ្លែងឡើងថា៖

«អាអ្នកវិភាគ! ហ្អែងប្រយ័ត្នរន្ទះបាញ់! អញប្រឹងណាស់…ស្ថានភាពវាបែបហ្នឹង។ គ្រាន់តែវារីអគ្គិសនីនេះមួយ បាត់ដល់ទៅ ១៤៤ម៉េហ្គាវ៉ាត់។ អញ្ចឹងបើវារីអគ្គិសនីទាំងអស់ ខ្លះបាត់អស់៥០ ខ្លះ១០០ អញ្ចឹង ៤០០ហ្នឹងវាត្រូវហើយ។»

កង្វះចរន្តប្រមាណជា ៤០០មេហ្គាវ៉ាត់ ដែលបណ្ដាលមកពី អាកាសធាតុក្ដៅហួតហែង បានធ្វើឲ្យប្រទេសកម្ពុជា រងការផ្ដាច់ចរន្តញឹកញាប់ និងតម្រូវឲ្យរដ្ឋាភិបាលលោក ហ៊ុន សែន ត្រូវទិញអគ្គិសនី ពីប្រទេសជិតខាង និងពីប្រទេសទួរគី។

នៅក្នុងទិដ្ឋភាពនេះ ក្រុមអ្នកវិភាគ ដែលមានជំនាញបរិស្ថាន បានសំដែងការសង្ស័យ និងលើកឡើង នៅលើបណ្ដាញសង្គម​ថា នេះ​ជា​ល្បិច​របស់​របប​ក្រុងភ្នំពេញ​ ដើម្បីយក​លេស សាងសង់​ទំនប់​វារីអគ្គិសនី​ បន្ថែម​ទៀត។

នាយករដ្ឋមន្ត្រីកម្ពុជា បានបន្តថ្លែងទៀតថា៖

«កុំស្អីឡើង មើលមករដ្ឋាភិបាល ហ៊ុន សែន ដោយកែវភ្នែកអាក្រក់ ប្រយ័ត្នរន្ទះបាញ់! ៗ! ខ្ញុំមិនចង់និយាយទេ តែវាចេញមកវិភាគ របៀបនេះ។ ឥឡូវអញ្ចេះ បើយើងស្គាល់វា អាផ្ទះហ្នឹង ទៅកាត់ភ្លើងហ្មង។ កាត់ភ្លើងអាផ្ទះហ្នឹង តែម្ដង។ ឲ្យទៅកាត់អាផ្ទះហ្នឹង ឲ្យហ្អែងដុតចន្លុះ។»

«មើល៍អាអ្នកវិភាគ ទៅកាត់ភ្លើងផ្ទះអាហ្នឹង! ដើម្បីឲ្យហ្អែងដឹង ថាខ្វះអគ្គិសនីមិនមែន​យកហេតុផល ដើម្បីនឹងធ្វើវារីអគ្គិសនីទេ។ វាថា យើងធ្វើឲ្យដាច់ភ្លើង ដើម្បីបង្កើតលេស បង្កើតវារីអគ្គិសនី។ (…) សុំឲ្យចេញមកវិភាគទៀត តែបើហ្អែងនៅក្នុងស្រុក ច្បាស់ហើយ គឺកាត់ភ្លើងហ្អែង៕»

១) គ្រោះរាំងស្ងួត មិនមែនមានតែនៅកម្ពុជាទេ។ បើកម្ពុជាខ្វះរហូតដល់៤០០មេហ្គាវ៉ាត់ ចុះប្រទេសជិតខាងកម្ពុជា…

Posted by ព្រហ្ម គិត on Saturday, March 16, 2019


លំអិតបន្ថែមទៀត

កម្ពុជា

យន្ត មីន ឡើង​ផ្កាយ៤ និង​មាន​តំណែងជា​រដ្ឋលេខាធិការ​ការពារជាតិ

បន្ទាប់ពីត្រូវបានផ្លាស់ចេញ ពីអភិបាលខេត្ពព្រះសីហនុ លោក យន្ត មីន ដែលសារភាពថាលោក ទទួលខុសក្នុងហេតុការណ៍បាក់រលំអគារចិន កំពស់៧ជាន់ កាលពីចុងសប្ដាហ៍មុន ត្រូវបានព្រះមហាក្សត្រតម្លើងឋានន្តរស័ក្ដិ ជានាយឧត្ដមសេនីយ៍ (ផ្កាយ៤) នៃកងខេមរភូមិន្ទ ...
កម្ពុជា

អ្នកនាំពាក្យថា កាសែតអាមេរិកប្រឌិត​ព័ត៌មាន​«ដ៏ឆ្កួត​លីលា តាម​អំពើចិត្ត»

លោក ឈុំ សុជាត អ្នកនាំពាក្យក្រសួងការពារជាតិ បានហៅសារព័ត៌មាន «The Wall Street Journal» ថាបានប្រឌិតព័ត៌មាន«ដ៏ឆ្កួតលីលា តាមអំពើចិត្ត» ជុំវិញ«កិច្ចព្រមព្រៀងសម្ងាត់» រវាងកម្ពុជា-ចិន ...
កម្ពុជា

CNRP ថ្កោលទោស​ការចាប់ផ្សឹក​សង្ឃ ហោ សុខុន ព្រោះ​ការបញ្ចេញមតិ

ការចាប់ផ្សឹក​ព្រះតេជគុណ ហោ សុខុន អតីតចៅអធិការវត្តច្បារអំពៅ និងជាអតីតសង្ឃទីប្រឹក្សា រងការថ្កោលទោស«យ៉ាងដាច់អហង្កា» ពីគណបក្សសង្គ្រោះជាតិ ដោយហៅទង្វើនេះ ថាជា«ការបង្ក្រាប និងគម្រាមកំហែងដល់សិទ្ធិសេរីភាព»។ គណបក្សប្រឆាំងបានអំពាវនាវឲ្យគណបក្សប្រជានកម្ពុជា និងលោក ហ៊ុន ...

យល់ស៊ីជម្រៅផ្នែក កម្ពុជា

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...

Comments are closed.